Hii ni blog maalum kwa kumbukumbu za kimaisha, na matukio yenye mafunzo ndani yake, ndio maana nikaiita 'diary'(shajara). Pia tunakaribisha mijadala yenye kuelimisha

Na kwa kuifanya iweze kuvutia zaidi tunaandika matukio hayo kwa mfumo wa visa, hadithi au tamithilya..

Wewe ukiwa mdau muhimu, unaweza kuchangia na wenzako kwa kutoa hoja (comments). Pia unaweza kutoa maneno ya hekima, utaalamu, au dukuduku lako (kilio chako)kwa jamii ili kuweza kukidhi mahitajio yetu.

MUHIMI, SOMA , CHANGIA, NA TOA kisa chako, au lolote lenye mafunzo ili tuliweke hewani.

TUPO PAMOJA DAIMA


Tushirikiane, Tusaidiane, Tupendane, Tuvumiliane, Tusaidiane, Tusameheane.

Kwa visa motomoto tunapatikana pia kwenye mitandao ya kijamii ya: Facebook, na Twitter, bofya hapa upate visa zaidi;

https://www.facebook.com/emu.three, na kwa ajili ya kuitangaza hii blog, ingia hapa:

https://www.facebook.com/diaryyangu/

`u-like' na pia unaweza kutwitter hapa;

https://twitter.com/emuthree



Showing posts with label Historia na kumbukumbu. Show all posts
Showing posts with label Historia na kumbukumbu. Show all posts

Thursday, July 14, 2016

HAPPY BIRTHDAY -DIARY YANGU


  

Simini kuwa ni mwaka mwingine unaingia,….namshukuru sana mwenyezimungu, nawashkuru sana marafiki na wadau wenzangu…

Siku nilipoamua kuandika mambo ya diary yangu(shajara yangu) kwenye mtandao ili kila mtu ayasome, nilihofia sana, maana sikuwa na uhakika na mitandao…. Nakumbuka nilivyopenda kuweka kumbukumbu zangu kwenye shajara(diary), kila tukio nalihifadhi katika mtindo wa kisa. Ndoto yangu ilikuwa kutunga vitabu, kuwa mwandishi wa tamithilya, ..oh, sijui lini itatimia.

Kiukweli mpaka sasa kuna mambo mengi mazuri yenye kufundisha kufurahisha lakini bado sijaweza kuyaandika yote...kawaida yangu nataka niandike kitu chenye uhalisia, sio kufikirika tu,..lakini pia kiwe na hekima, ili kizazi chochote kiweze kusoma. Nia yangu ni kuelimisha, kuonya na kusaidiana. Inaniuma sana nikiona, mayatima, wajane, masikini wakinyanyaswa...

Huu ni mwaka mwingine sijakata tamaa, ninachofurahi ni kuwa wapo ambao wanaiona kazi yangu kuwa inasaidia jamii….nawashukuru sana. Ni kazi ngumu kwa vile wakati mwingine unakuwa huna pesa ya kununulia vocha, lkn nimejitahidi kadri ya uwezo wangu, kuwakilisha kile nilichoona kinafaa.

Siku ya leo ninachoweza kuwaambia ni kuwa wale wote ambao hawajafika ndani ya diary yangu, (http://miram3.blogspot.com/) wajitahidi kufika humo kuna visa vingi sana…kuna matukio mengi ambay yanasubiria kuandikwa kama story. Matukio hayo ni ya kweli, ila mimi ninachofanya ni kuyaongezea ladha yawe story, tatizo ndio hilo..gharama na muda…

Ama katika kulifanya hili kuna wengine hawafurahishwi, labda walitaka niandike vile na vile, wasisite kunishauri, maana diary yangu kwa kiasi kikubwa mwandishi na mtunzi ni mimi mwenyewe, sijawashirikisha wtu wengine bado,  ila wapo walionihadithia habari za maisha yao nikajaribu kuyaweka kinamna ya visa..nawashukuru sana, siwezi kuwataja maana hawakutaka wajulikane!

Basi kwa wale ambao hawaja-LIKE diary yangu facebook, nawaombeni mfanye hivyo, kama hujafanya hivyo, itanibidi nianze kuwafuta ili niweze kuwaongeza wengine waliopo tayari kulike. Kulike kunasaidia wewe na mimi tuwe pamoja, uone kila kitu ninachokiandika, pia inanipa moyo na mimi.

Ahsanteni na mungu awazidishie Baraka, wale wote tuliokuwa nao pamoja na wote waliojitokeza kunipa moyo, kukomment, kulike...sina cha kuwalipa ila mola ndiye atawalipa...


Happy birthday diary yangu(http://miram3.blogspot.com/)

Ni mimi: emu-three

Monday, February 11, 2013

Uchungu wa Mwana Aujuaye ni mzazi-58




`Nimeamua kuwa mbali kabisa na jamii yangu, na sipendi kukutana na yoyote anayenifahamu, na sikuwa na jinsi ni kuja kuishi na mama huyu mdogo kwa vile ndiye chanzo cha haya yote, vinginevyo, nisingelikuja haoa kwake tena, …..’akaendelea kuhadithia huyu mwanadada, na wakati huu alionekana kama anajisikia vibaya.

‘Kwangu sina ndugu, na wala sina rafiki, ndugu zangu walinitenga, na kama walivyomfukuza mama yangu, nakumuona hafai kuishi na jamii zao, eti kwa vile katenda dhambi kubwa, basi mimi nimetenda dhambi kubwa zaidi ya mama, na kwahiyo sistahili kuwa karibu nao kabisa…’akaendelea kuongea kwa uchungu.

‘Na zaidi ya hayo, sina hata rafiki, maana wale niliowaona ni marafiki, wamekuwa ndio chanzo cha kunitumbukiza kwenye maangamizi zaidi…..je hawa ni ,marafiki au ni maadui, huenda basi sikustahili kuishi kwenye hii dunia…’hapo machozi yakaanza kumlenga lenga.

‘Huenda sistahili kuishi kwenye hii, dunia, na kila nilipoliwazia hili, najikuta nikiwa na wakati mgumu, nikijiuliza je, kama ni hivyo, nifanyeje, nijiue….mbona nilijaribu siku moja na taabu, uchungu na maudhi niliyoyapata siku ile, niliona ni heri, kama ni kufa nisubiri siku hiyo aliyonipangia muumba…’akatulia, na baadaye akangalia tumbo lake.

‘Lakini hata nikiamua kujiua, …je hiki kiumbe kilichopo hapa tumboni, kina kosa gani….?’ Akajiangalia tumboni na baadaye akainua uso,halafu akajikuna kichwa kwa muda mrefu hadi nywele zikatawanyika, kama mtu aliyechanganyikiwa, na nilipokumbuka kuwa alisema mara kwa mara anapandisha mshetani, nikaogopa, na kujiandaa kukimbia…

‘Hapana siwezi kujiua , kwanza lazima nione hawa walionifanyia hivi wanapata adhabu yao,….na wao wanakutwa na machungu kama haya yaliyonikuta mimi….wa kwanza keshaanza kuhangaika…na huyo ndiyo yule aliyejifanya ni tajiri, …na kutumia utajiri wake, kuniharibia maisha yangu, japokuwa kwa ujumla, amekiri kosa lake, lakini kwanini niteseke, wakati yeye yupo anafurahia utajiri wake…..’akatulia kwa muda…

Na yeye keshaanza kuipata adhabu ….hata kama ….akatulia kwa muda akiwaza yale yaliyotokea huko nyuma siku walipokwenda kumtembelea mama yao, akiwa na ndoto na kuanza maisha mapya, japokuwa hakuwa kajiandaa kwa hilo, lakini kutokana na shinikio lililokuwa juu ya uwezo wake, alikubali kuingia kwenye maisha hayo…ya kuwa mke wa mtu……japokuwa haikufanikiwa, ni kwanini haikufanikiwa, …..

************

‘Inabidi tupitie Arusha, maana huko nina biashara zangu, vinginevyo, itabidi nyie muende huko kwenu na mimi nitawakuta huko huko kwenu..’akasema Tajiri.

‘Haiwezekani, sisi tunakwenda pamoja wewe na sisi mguu kwa mguu hadi kwa mama, na tukitoka huko tutakwenda huko kwenye biashara zako, maana baada ya hapo, nitakuwa nimehalalishwa …..’akasema Maua, huku akisita sita kutamka hicho alichokusudia kukisema.

 ‘Hilo halitawezekana, ….mimi nina mpangilio wangu wa maisha na ninajua kwanini nafanya hivyo..maisha yangu yamegubikwa na maadui,….kuna watu hawapendi niwe hivi…kuna watu hawataki niwe tajiri…., wananionea kijicho, nahitajika kuwa makini na watu kama hawo…..’akasema na kuangalia saa yake.

‘Kwanini uwe na maadui….kiasi hicho, inaonyesha kuwa wewe sio mtu mwema, na huo utajiri wako hukuupata kwa halali?’ Akauliza Maua, na yule Tajiri akacheka kwa dharau.

‘Kwa halali..?’ akarudia hayo maneno huku akizidi kucheka, halafu akatulia na kumwangalia Maua kwa macho ya kupepesa, kama vile anamchunguza ndani ya akili yake, halafu akasema;

‘Usione watu ni mtajiri…ukafikiria kuwa utajiri wao umekuja kirahisi,…kuna mambo yamefanyika,….na nikuambie ukweli ukitaka upate utajiri wa kihalali, hutafanikiwa kamwe….na hata hivyo sijui una maana gani kusema `kihalali’ maana dunia hii ilivyo, mambo mengo sio ya halali, hasa yanapofikia kutafuta mali,…ili upate jambo, hasa mali na utajiri kuna dhambi nyingi zinatendeka…’akatulia na kuangalia juu.

‘Sio lazima utende dhambi, ndio upate ,mali au utajiri, hizo ni hulka zenu, nyie watu mnaopenda kutenda dhambi…kwani hakuna njia za halali za kupata mali, zipo, ila kwa vile nyie ni mawakala wa shetani, basi mnaona njia rahisi ni hiyo hiyo ya kishetani…’ akasema huku mama yake mdogo akimfinya lakini hakujali .

‘Na baya zaidi, mnatafuta mali hizo kwa kuwadhulumu wanyonge, ndio maana hamuishi kwa amani..nje na ndani…’akasema Maua huku akisogea mbali na mama yake mdogo, kwani aliona anamsonga, na alijua anafanya hivyo , kwa vile anatamka maneno ambayo kwake yeye aliona yatamharaibia kupata kile alichokitaka.

‘Una maana gani nje na ndani?’ akauliza huyo Tajiri huku akimwangalia Maua kwa macho ya kushangaa, alikuwa akiushangaa ujasiri wa huyu binti.

‘Ndio nje na ndani, nje, mnaogopa kuwawa….ndani mioyo yenu haina amani, kila mara mna wasiwasi…na ni heri niwe masikini kuliko kuwa na utajiri wa namna hiyo..’akasema Maua.

‘Hongera sana binti, napenda sana watu majasiri kama wewe,…unaonekana utanifaa sana, sio tu kama mke, bali pia katika shughulizangu,….’akawa anamwangalia huku akitikisa kichwa.

‘Shughuli zako zipi….?’ Akauliza Maua huku akiwazia jinsi gani atakavyoishi na huyu mtu aliyemzidi umri kwa mbali sana.

‘Nina shughuli nyingi sana,…..wewe unasema upo tayari kuwa masikini, kuliko kupata utajiri kwa njia isiyo halili, unajua nikuambia ukweli,….wengi wanasema hivyo, kwa vile tu wameshindwa kupata, lakini kama wangligundua njia yoyote ya kufanya ili waupate huo utajiri, wangelifanya…. Kiuhakika hizo ni zile hadithi za Sungura za sizitaki mbichi hizo,…ukishindwa kupata unasingizia mengine….tuachieni wenyewe tunaojua kuutafuta utajiri…na nyie mtaishia hivyo hivyo, mkitamani kuwa kama sisi, huku hamjishughulishi….’akasema huku akingalia saa yake.

‘Kwahiyo umesemaje?’ akauliza mama mdogo alipoona huyo jamaa kiangalia saa yake, kwani alijua kuwa huyo jamaa akitoa amri waondoke, hawatakuwa na muda wa kusmhawishi tena, wataondolewa hapo kama wezi.

‘Ninasemaje kuhusu nini…’akasema kwa ukali, hadi Maua akamwangalia huyo Tajiri kwa kushituka, maana muda huo mfupi alikuwa akiongea kwa kawaida, lakini aliposikia sauti ya mama yake mdogo akiuliza, ghafla kabadilika.

‘Si kuhusu hiyo safari….’akasema mama mdogo kwa sauti ndogo ya kunyenyekea,..Maua akawa akijiuliza iweje mama yake ambaye ni mkali kwake, lakini kwa huyo mzee anakuwa mnyonge kiasi hicho.

‘Mimi nawasikiliza nyie, …ila msimamo wangu ni kuwa sipangiwi wapi pa kwenda na kwa muda gani, mimi nina ratiba zangu,…. muda ukifika wa kuondoka ndipo napanga hapo hapo wapi….na lipi, nyie mjiandae na safari,…nauli natoa mimi, msiwe na  wasiwasi na hilo’akasema huku akiinuka akaonyesha ishara kwa walinzi wake.

Maua na mama mdogo wakainuka kuondoka.

********

‘Huyo mwanamke unasema anaitwa nani?’ akauliza Malkia wa Mererani, huku akiwa kashika kiuno.

‘Anaitwa Maua?’ akasema jamaa yake huyo kwenye simu.

‘Maua..maua ya namna gani, njano,….waridi….au, hata akiwa maua, hawezi kufikia uzuri wangu, mimi ni zaidi ya Maua, mimi kila mahali nikienda waandishi wapo nyuma, kuchukua picha zangu ili wapate kuuza mgazeti yao….unasema ni mwenyeji wa wapi?’ akauliza huku wivu ukimsumbua akilini.

‘Singida mpakani, ….’akasema huyo jamaa kwenye simu. Aliposikia kuwa huyo Maua anatokea kijiji mkoa anaotoka yeye, akatikisa kichwa….

‘Kama ni huko….hana jeuri na mimi, wasichana warembo wote wa huko nawafahamu….hilo jina kwangu sio geni…lakini, lakini...’akasema huku akijaribu kufikiria.

‘Sasa bosi, nitashindwa kufanya mambo yako, kwa vile sipo karibu tena na Tajiri…keshanifukuza nisiwe karibu nay eye….’akalalamika huyo jamaa.

‘Ina maana huyo Maua ndiye kasababisha ufukuzwe kazi ..au sio,….?’ Akauliza na hata kabla hajajibiwa akasema;

‘Lakini usijali, nitahakikisha kuwa unarudi kuwa karibu na yeye, maana wewe ndiye mtu wangu wa kunipatia taarifa, ….mwenzako hajawa mzoefu, …sasa sikiliza,….nataka nijue anatokea kijijini gani, na wazazi wake ni akina nani…na hapo Dar anaishi na nani..unasikia?’ akasema.

‘Nitafanya hivyo bosi…’ na simu ikakatika.

‘Maua….Maua…nitaona kama yeye ni Maua, mimi nitakuwa jua kali la kufanya Maua yanyauke……’akasema huku akipiga simu, na akashangaa simu ya huyo anayempigia haipatikani.

‘Ina maana kwasababu ya huyo Maua wako, umeamua kuzima hata simu…ngoja atanitambua, sizani kaka wiki itakwisha, akiwa na wewe, ….’ Na kabla hajamaliza kusema simu yake ikaita, akasikiliza kwa makini na baadaye akasema.

‘Basi nimekuelewa,…..nitakwenda leo leo hadi huko kijijini na kumtafuta huyo Maua ndio nani….’ Akaongea huku akitembea kuelekea kituo cha mabasi…

*********

‘Hapa ndio Arusha, na nimewatafutia chumba cha namna hii, ili muwe karibu, ni chumba kimija lakini kina vyumba viwili….maana nataka pia nikifika hapa niwe karibu na wewe…mrembo wangu..’akasema huku akimwangalia Maua

‘Nani mrembo wako, usifikiri, nimekubali kuwa mkeo…mimi ninachohitajia ni malezi ya mtoto wangu,…..’akasema Maua.

‘Usijali, haya tutayaweka sawa,….mimi ni Tajiri bwana,pesa inaongea, mwenyewe utanyweza na kukubali kuwa na mimi ..maishani….mimi usnione hivi, najua kupenda, na ninayempenda anakuwa kama mbwa kwa chatu….hahaha’akasema huku akimwangalia mama mdogo.

‘Kweli Tajiri..maana huishi kubadili wanawake,..lakini ni kwa vile una pesa, unafikiri wanakupenda wka vile …wewe ni mpendevu’akasema mama mdogo.

‘Wewe hujui undani wa maisha yangu…..’akasema huku akiangalai simu yake, ambayo aliondoa sauti, na akaona ujumbe ukiingia, akausoma na haraka akainuka.

‘Sasa tutaonana baadaye, maana naona mzee ananihitaji haraka..’akasema.

‘Mzee gani.?’ Akaulizwa

‘Aaah, ni huyu Mjomba wangu….’akachukua mkoba wake na kuanza kuondoka.

‘Mjomba wake…huyo ndiye wa kuonana naye, ili tuhakikishe kuwa anatekeelza yote yanaoyostahili….’akasema mama mdogo.

‘Sasa utamjuaje, na kumpataje?’ akauliza Maua.

‘Wewe subiri, sisi ni watoto wa mjini, kuna ndugu yangu mmoja anaishi hapa, ……Arusha nitawasiliana naye, atanmfuatilia, na tutamjua ni nani…..’akasema huku akipiga namba ya simu.

‘Kuna tajiri mmoja……aaah, hapana, sio mzee sana….ana mjomba wake….nahisi ndio huyo….anasafiri –safiri sana kwenda Dar, ndio huyo…..nataka kumjua ni nani na wapi nitaweza kumpata’akasema.
Akakata simu na kwenda kukaa karibu na Maua, na kipindi hicho Maua alikuwa kasimama akiangalia nje, kwani kulikuwa na gari limesimama,….kwa nje,…

‘Kuna msichana mrembo, yupo nje, na ana walinzi, utafikiria huyo Tajiri wako, anavyonata, ajabu….kapanga rangi kwenye macho, na kila anavyofanya utafikiri wale warembo wa maonyesho, na waandishi wanampiga picha….’akawa anaongea na mama yake, na mama yake mdogo akasogea pale dirishani kumwangalia huyo mrembo ni nani..na kabla hawajatulia simu ya mezani ikaita.

‘Hapa ni mapokezi, kuna mgeni wenu, anataka kuonana na nyie…’

‘Sisi hatuna wageni…..’akasema mama mdogo kwa mkato, na kabla hajaiondoa ile simu masikioni huyo mtu wa mapokezi akasema;

‘Tunajua hilo, lakini huyo ..ni mtu wa karibu wa Tajiri,…hana matatizo, ….’

‘Anaitwa nani?’ akauliza mama mdogo huku akiwa na wasiwasi.

‘Anaitwa Malikia wa Mererani….’
 

 NB: Wakati ukuta, ....wikiendi ilikuwaje? JE TUMALIZE?

WAZO LA LEO: Usikubali kuingia kwenye mahusiano, bila kujua huyo unayetaka `kuhusiana' yupoje na ni nani, kwani athari zake huja baada ya matendo, ....jichunge na utahamini mwili wako, kwani mwili wako una thamani kubwa sana.....

Ni mimi: emu-three

Thursday, February 7, 2013

Uchungu wa mwana Aujuaye ni Mzazi-57




  Hali yangu ilikuwa yenye utata, maana ilifikia hatua naweza kufika sehemu na kujisikia vibaya, na hapo hapo nikapandisha, na kuwa mtu tofauti kabisa, na kitakachotokea hapo siwezi kukijua, nakuja kuhadithiwa baadaye, kuwa nimefanya maajabu,…sikumbuki, na hata sielewi jinsi nilivyoweza kufanya hayo ninayokuja kuhaditihiwa baadaye kuwa eti ni mimi nimeyafanya’ 

Akaendelea kuhadithia kisa hiki, msimuliaji wetu mkuu, Maua binti Maua.

**********

‘Haya uliyo nayo ni mashetani, inabidi tukahangaike, …na nashukuru sana pamoja na hayo uliyomtendea yule tajiri, bado amekubali kukusaidia, hali yake kwa sasa inaendelea vyema,…’akasema mama mdogo.

‘Lakini yote haya namtupia lawama yeye, huenda yasingelitokea kama isingelikuwa ni yeye,…..mbona mwanzoni nilikuwa sina matatizo kama haya’akasema Maua.

‘Huenda ulikuwa nayo, ila yalikuwa hayajachokozwa…au ndio umekumbana nayo, au kuna mtu kakutupia, ….binadamu hawana wema, kijicho na husuda kwa binadamu ni kawaida..., ‘akasema mama mdogo.

‘Wanionee kijicho kwanini, kwani mimi nina nini cha kuonewa kijicho, wanataka umasikini wangu, au wanataka nini…mimi siamini hayo, nahisi yote yamesababishwa na huyo Tajiri wenu..’akalalamika Maua.

‘Tatizo lako huangalii mbele, unachoangalia na nyuma, hayo aliyokutendea yamepita, ….na alifanya hivyo kwasababu,…’akatulia

‘Kwasababu gani?’ akauliza Maua.

‘Hayo ni siri kubwa, sisitahili kuyasema, ila yanafungamana na utajiri wake’akasema mama mdogo huku akiangalia huku na kule , kama kuogopa,watu wasije wakamsikia.

‘Huoni, ina maana utajiri wake, ni wa kishirikiana, na kwahiyo hatasita kunifanyia lolote baya, ilimradi afanikiwe zaidi’akasema Maua.

‘Afanye nini baya…kama ni yeye, basi usingelimdhuru yeye…’akasema mama mdogo huku akikimbuka kashkashi la siku ile………….

******

 Mama mdogo, wakati anamsubiri Maua ,akijua Maua yupo ndani na bosi, na huenda mambo yakawa mazuri, siku hiyo wanaweza kuondoka na mshiko wa nguvu, akaona walinzi wa Tajiri, wakikimbilia ndani, na yeye kwa umbea akajitosa, …

‘Na wewe unataka kwenda wapi?’ akauliza na mmoja wa walinzi

‘Mwanangu yupo huko ndani, lazima nijue kuna nini kimetokea….’akasema huku akisukumana na yule mlinzi.

‘Mwacheni aingie, huenda akatusaidia, maana sisi huku ndani tumechemsha, …na bosi kasema tusimua’akasema mmoja wa walinzi.

Mama mdogo aliposikia hivyo, `tusimuue…, ‘akahisi kuna tatizo kubwa limetokea, akaruhusiwa na kuingia ndani, na pembeni akaona Tajiri akiwa kalala kwenye sofa, na kitambaa kikiwa kimelowana damu, alikuwa akilalamika maumivu..

‘Docta keshafika…’akasikia mmoja akisema.

‘Kwanini tusimkimbize hospitali..’mwingine akasema

‘Bosi kasema hataki kupelekwa hospitalini, anahitaji kutibiwa hapohapo….’akasema huyo mlinzi.
Mama mdogo, akageuka huku na kule akimtafuta mwanae, na pembeni kabisa, akamuona Maua kalala chini, na alionekana kabisa hana fahamu….akamsogelea, na mmoja wa walinzi, akasema;

‘We mama we unataka kufa, wenzako wote waliomsogelea sasa hivi ni majeruhi, mwanao kageuka kuwa simba, ananguruma kama simba….’akasema mmoja wa hawo walinzi. Na mama mdogo aliposikia hivyo,akasimama na akakumbuka kile kichupa, ambacho, walishapewa na mmoja wa mtaalmu ambaye siku moja walikwenda kwake kupata tiba.

Akatoa kile kichupa, na kumsogelea Maua, akachukua kisogo na kuyatupia mwilini kwa Maua. Na mara Maua akainuka, kama anataka kusimama, halafu akarudi chini na kulala, akatulia kimiya….

‘Kumbe unayo dawa…’akasema mmoja wa walinzi.

‘Sikujua kuwa kumetokea matatizo, ningelijua ningelimuwahi’akasema mama mdogo.

‘Kwani binti yako ana matatizo gani?’ akauliza mmoja wa watu wa karibu wa huyo mlinzi.

‘Sijui, tunahisi kakumbwa na mashetani’akasema mama mdogo.

‘Basi muhangaikieni…..hali aliyo nayo sio ya kuicha hivyo….hilo ni tatizo kubwa, na nawashauri ili atibiwe vyema, rudini huko alipotokea, kijijini kwenu, ….mara nyingi mambo hayo chimbuko lake ni huko kijijini, na mara chache inakuwa ni kukubwa na hayo mashetani ….lakini ukichunguza sana chanzo chake ni huko alipotokea….kama mna imani kweli, nendeni kwenye dini zenu akaombewe,…..’akasema huyo mtu wa karibu wa Tajiri.

‘Tumeshaanza matibabu, …’akasema huku akitulia pale alipomuona Maua akiinuka na kukaa vyema, na alionekana kama kushangaa, akawa anaangalia mikono yake, ikiwa na damu.

‘Kwani kumetokea nini?’ akauliza

‘Ulitaka kumuua bosi wetu…’akasema mmoja wa walinzi.

‘Kwanini nimuue bosi wenu,….?’ Akauliza Maua huku akimwangalia yule tajiri kwa wasiwasi, na kujaribu kukumbuka ni nini kilitokea, lakini akili ilikuwa haikumbuki…ilikuwa kama mtu aliyekuwa kwenye usingizi mnzito…hata akili zilipotulia alichokumbuka ni ila hali ya kujisikia vibaya, na kichwa kuuma, na kusikia sauti zikimuamrisha kufanya jambo, na baada ya hapo hakukumbuka jingine…..

‘Mimi sikumbuki kitu…’akasema Maua huku akishjika kichwa, na kushangaa jinsi nywele zake zilivyovurugika, tofauti na zilivyokuwa mwanzoni.

‘Huyo binti keshazindukana, ….hakikisheni kuwa yupo sawa, ….?’ Akauliza mmoja wa walinzi

‘Ndio keshainuka, naona yupo shwari kwa sasa….’akasema mlinzi mwingine

‘Basi bosi anahitaji aletwe mbele yake…’akasema yule mlinzi wa mwanzoni

Walinzi kama kawaida yao ni kutii amri, na kwa haraka wakamsogelea Maua, japo kwa tahadhari, wakikumbuka kile kilichotokea kwa wenzao, wakamshika Maua mikono huku na huku, wakimuongoza kwenda kwa tajiri yao.

‘Msinishike hivyo, kwani mimi siwezi kutembea mwenyewe..’akalalamika Maua pale alipoona wanakuwa kama wanambeba kama anavyobebwa mgonjwa, na walipoona Maua akilalamika, wakamuachia, atembee mwenyewe hadi pale alipolala Tajiri yao,.

Tajiri, aliinua kichwa, na kumwangalia Maua kwa muda, halafu akajiinua na kukaa vyema, akakohoa, na kusema;

‘Natumai sasa nafsi yako imesharizika,….lengo lako lilikuwa ni kuniua au sio ndio maana ukabeba kisu…’akageuza kichwa kumwangalia mama mdogo, wakati huo mama mdogo alikuwa mbali , hakuweza kusikia vyema wanachoongea, ila alionekena kushika mdomo, kuonyesha kushangaa jambo, huenda wale walinzi walikuwa wakimsimulia yaliyotokea.

‘Maua,….kubeba kwako kisu inaonyesha ulidhamiria,….aaaah, lakini tutaona,…, bahati nzuri, hukuweza kutimiza lengo lako,…sijafa, sasa una nafasi ya kufanya hivyo tena, lakini safari hii sitaweza kukupa muda huo,…..itakuwa zamu yako…huwezi kunitoa damu yangu hivi hivi nikuachie…’ akasema kwa ukali.

‘Mimi sielewei unaasema nini…kwani ni mimi nimekufanya hivyo?’ akauliza Maua huku akionyesha mshangao.

Tajiri akamwangalia Maua kwa muda, halafu akageuka kuangalia kule alipo mama yake mdogo, akaonyesha ishara huyo mama aletwe mbele yake, na yule mama alipofika hapo mbele yake akaulizwa;

‘Binti yako ana matatizo gani?’ akauliza kwa sauti ya ukali

‘Nahisi kakumbwa na mashetani’akasema huyo mama

‘Kwanini hujamshughulikia, huoni kuwa hii ni hatari, angeliweza kunitoa roho, …sikuamini binti mrembo kama huyu anaweza kugeuka kuwa simba, na kunishinda mimi…mimi mwenyewe nina yangu yana nguvu, lakini ya huyu binti yalizidi….ilikuwa ni balaa…ananguruma kama simba….anakuwa kama jamaa mmoja, sijui ni wapi,….nilihadithiwa kuwa ana tabia kama hiyo’akasema huku akitabasamu.

‘Bosi na wewe una mashetani?’ akaulia mmoja wa watu wake.

‘Ya kwangu sio mashetani bwana, huwezi kuyaita hivyo,…ni mambo ya kimila….hata hivyo, mimi siwezi kudhibitiwa, kama wanavyodhibitiwa watu wa mashetani, mimi nayadhabiti ya kwangu, ….nayapa amri,…na napata kile ninachokitaka, sio kama haya, …..’akatulia na kumwangalia huyo binti.

‘Mimi sina mashetani….siamini mambo hayo…’akasema Maua, na Tajiri akamwangalia kwa muda, halafu akageuka kumwangalia mama mdogo

‘Sasa kama anahitaji msaada wangu ninaweza kumsaidia, nina mtu mmoja ninayemfahamu, anaweza kuyaondoa hayo madude, kabisa…..’akageuza kichwa na kumwangalia huyo binti.


‘Mimi sihitaji msaada wako, ninachohitaji ni kuilea hii mimba’akasema Maua.

‘Hilo tumeshamaliza binti,…’akamwangalia yule binti na huku akiwa kama anataka kuinuka, akaendeela kuongea kwa kusema;

‘Mbona nilishakuandikia ushahidi, unataka nini tena….au unataka hayo aliyoagiza huyo shetani wako, maana kaamrisha kuwa twende huko kijijini kwa mama yako,…huko nitapata maagizo mengine, eti kuondoa ….sijui alitumia neno gani, hata sikumbuki vyema,…eti….nisipofanya hivyo, akinijia tena, atahakikisha kuwa anaichukua roho yangu…hahaha…mimi sio mtu wa kutishika, kirahisi, lakini….’akasita pale alipomuona Maua kama anatetemeka.

‘Aaah, mwangalieni, aisije akapandisha tena….’akasema huyo Tajiri.

‘Atapandisha tena, kama usipotii hayo maagizo yake’akasema mama mdogo huku akitoa kile kichupa na kumnynyuzia huyo binti mafuta.

‘Huwezi kunilazimisha kwa njia hiyo, ila mimi sina shida, tutapanga hayo, ….na nilikuwa na mazungumzo nyeti na nyie wawili,….’akatulia na kuwaangalia wale akina mama wawili kwa zamu, na baadaye akawageukiwa walinzi wake na kusema ‘Naomba mniache na hawa watu wawili, msiwe na shaka hawezi kupandisha tena…’aaksema Tajiri.

Baada ya wao kubakia wawili, akainuka na kukaa vyema, aliangalia sehemu ile aliyoumizwa, akawa anapitisha kidole juu kuiweka vyema ile bandeji, na baadaye akamwangalia Maua, na mama yake mdogo, akasema;

‘Nimejifunza jambo moja…..pamoja na mambo mengine yote, mimi nimetokea kumpenda binti yako,…’ akainuka na kusimama.

‘Vinginevyo, asingelitoka hapa hai,….ningeliweza kufanya lolote, na bila kufanywa lolote, ….mtu kaja kwangu na kisu….ushahidi ungelionekena…..na wewe huenda unajua, atachukuaje kisu aweke kwenye mkoba wake wewe usijue?’ akamuuliza mama mdogo, ambaye alibakiwa kushangaa, alikuwa hajui kabisa kuwa binti yake alikuja hapo na kisu.

‘Nasema kwa moyo wangu wote,…kuwa pamoja na haya, mimi nimemsamehe, sina kinyongo na yeye, ….lakini kama anataka haya yaishe kwa usalama, atahitajika na yeye kutimiza wajibu wake....hata hivyo siwezi kumlazimisha, ila kiukweli, moyo wangu utauma sana, kama atachukuliwa na mtu mwingine…’akatulia na kumwangalia huyo binti.

‘Kwahiyo unataka kumuoa?’ akauliza mama mdogo.

‘Huko unakwenda mbali saana…umekimbilia hatua ya juu, hayo yatakuja baadaye, kama mambo yatakwenda vyema, tutafanya hivyo…ni kweli nahitaji mke, kwani maisha haya ya kuishi leo huyu, kesho huyu nimechoka nayo,….sasa nahitaji kutulia na mke mmoja ninayempenda, ….na nakiri huyu binti ananifaa’akatulia kidogo.

Yule mama akatabasamu huku akimwangalia binti yake, akamshika begani, na kusema kwa sauti ya kunong’ona..’Unaona, bahati hiyo….’

‘Hayo hayana haraka, cha muhimu…na kwanini unataka mambo hayo kwa haraka…?’ Yule Tajiri akamgeukia mama mdogo safari hii akionyesha uso wa tabasamu.

‘Sasa mara nimekwenda kwa haraka,..wakati wewe mwenyewe  umeshazimia kwa binti yangu, na kwa ujumla unahitaji mke, ungenipenda mimi, mzee mwenzako….’akasema kwa utani, na yule Tajiri akaceka hadi jino la mwisho.

‘Mimi sioni kama kuna kizuizi, maana umeshampa uja uzito, haina haja ya kuruka huku na kule, wewe toa mahari….ndoa haina umuhimu sana maana umeshaifunga kwa nguvu’akasema mama mdogo.

‘Tatizo lako wewe mama una tamaa, tamaa ya pesa, pesa ni ibilisi mkubwa, ….’akatoa pesa mfukoni na kuzishika hewani, na wakati huo yule mama akawa anaziangalia kwa hamasa, na yule tajiri alivyoona jinsi yule mama anavyoziangalia zile pesa kwa tamaa akamtupia usoni.

Yule mama bila aibu akaziokota na kuzifutika kifuani,…..Maua akamwangalia mama yake kwa uso wa hasira, alitamani kumwambia azirudishe kwa mwenyewe lakini akaona ajinyamazie, tu, na wakati huo huo yule jamaa alikuwa akiongea utafikiri hilo tendo alilofanya halikuwa na maana kwake, akaendelea kusema;

‘Wewe mama kwa tamaa yako ya pesa …..utafika kubaya,….na nahisi kabisa kuwa wewe, ndiye umemchuuza huyu binti wa watu, sikupenda kabisa haya yamtokee huyu binti, wakati mwingine najuta sana,…..huyu sio mtu wa kutendewa hivi, huyu binti sio watu wa aina yako,….lakini imeshatokea hakuna jinsi, na mimi naahidi kuwa nitamsaidia kwa nguvu zangu zote, lakini kama yupo tayari kwa 
hilo….’akasemaTajiri huku akimwangalia huyo binti.

‘Mimi kama ulivyosema, ….kuwa umeambiwa twende huko kijijini, kwa mama yangu, hilo wazo naliunga mkono,…twende huko huko kwa mama ili akuone wewe ….uliyeniharibia usichana wangu, ….’akawa anatoa machozi.

‘Unalia nini sasa….’mama yake akasema kwa ukali huku akimminya begani, na akawa kama anamnong’oneza….`sasa usiniangushe hapa ndipo pa kucheza karata vyema…’.

‘Naona tumemalizana, nyie kajiandaeni, nikiwa tayari, nitawaambia, safari ni lini, …na mumesema kwenu ni wapi vile?’ akauliza.

‘Singida,..mpakani….’akasema mama Mdogo.

‘Aaah,, basi haina shida, maana huko ndiko njia yangu nikiwa na mambo yangu,….hata hivyo nilikuwa na safari ya huko, ….ni siku nyingi sijafika, …’akawa katulia akiwaza jambo,….akamwangalia Maua, kwa makini, baadaye akajikuta akiuliza;

‘Kwani wewe mama yako huko kijijini anaitwa nani?’ akauliza

‘Maua….’akasema Maua.

‘Kwani huko Singida unakujua?’akauliza mama mdogo, na yule Tajiri hakujibu kitu, alikuwa anamwangalia Maua, pale alipoulizwa jina la mama yake, akataja `Maua’, alihisi kuwa huenda huyo binti akili yake haijakaa sawa.

‘Wewe binti nakuuliza swali la msingi, huwezi ukaitwa Maua na mama yako akaitwa Maua..’akasema yule Tajiri na Maua akabakia kimiya huku akiangalia chini.

‘Haina shida…’akasema huyo Tajiri….huku akiwa kama anawaza jambo, akamgeukia mama mdogo na kusema;

‘Kwani kiutaratibu, huko kwenu inatakiwaje, kwanza natakiwa kwenda mwenyewe kujitambulisha au natuma mtu, maana mimi nataka nianze kufuatilia taratibu zote, sitaki utani, nataka kuyabadili maisha yangu…’na kabla hajamaliza simu yake ikaita. Akaipokea bila kuangalia nani aliyempigia.

‘Oh, ….nisamehe…mpenzi….’akasema pale aliposikia huyo anayepiga simu ni nani, akageuka kumwangalia Maua, na baadaye akainuka na kuelekea chumbani kwake,..
Binti akawa anaangalia kule alipoelekea huyo Tajiri na huku akisema;

‘Unaona…..nilikuambia huyu mtu ana mke wake, na mimi anataka kunifanya mke wa pili…’akalalamika Maua.

‘Hana mke huyu….’akasema jamaa ya huyo Tajiri

‘Sasa huyu anayeongea naye ni nani?’ akauliza.

‘Ni dada mmoja mtata,,,,,malikia wa Mererani….sijui mtaivana kama akisikia wewe unatakiwa uolewe na huyu bosi, maana, mwanamke huyo ana wivu, lakini hataki kuolewa,…..’akakatisha pale Tajiri aliporudi.

‘Natumai tumemalizana,…Maua upo tayari kuolewa na mimi?’ akauliza

‘Kama utamuacha huyo hawara wako,….’akasema Maua.

‘Hawara gani?’ akauliza Tajiri akishangaa.

‘Huyo anayeitwa Malikia wa Mererani’akasema na yule tajiri, akabakia akishangaa, akawageukia watu wake akiwa kakunja uso,…..akasema kwa hasira;

‘Ni nani katoa siri zangu za ndani….’akatoa sauti ya hasira, na yule eliyeoongea akapiga magoti akiomba msamaha,….

‘Mkuu, sikuwa na nia mbaya ….niliongea hivyo ili kuongeza wivu, ….wivu unasaidia kwenye mapenzi…..’akasema .

‘Toha humu ndani haraka,…na hutakuwa kwenye kikosi changu tena, na adhabu nyingine zitafuata baadaye, ….sitaki msaliti kwenye kundi langu…’alaipomaliza kuongea tu, wale walinzi wakambeba yule jamaa juujuu, huku yule jamaa akilia na kuoba msamaha…

‘Kama maisha yenyewe ndio haya,….mimi siolewi na wewe’akasema Maua na kutoka nje…

NB: JE tumalize ….?

WAZO LA LEO: Ni kweli tunahitaji pesa kwa ajili ya maisha yetu, lakini kupenda pesa huko kusivuke mipaka, na kujikuta tunasahau ubinadamu, pesa ni mtaji, lakini pia pesa ni kishawishi kibaya, zinaweza kutupeleka kubaya..Tuwe makini na hilo.

Ni mimi: emu-three

Tuesday, February 5, 2013

Uchungu wa mwana Aujueye ni Mzazi-56




‘Unasema ana uja uzito, sasa kama ana ujauzito mimi ndio dakitari, ….’akasema huyo Tajiri, huku akikunja uso, na lile tabasamu alilokuwa nalo usoni likawa limeyeyuka na uso ukabadilika na kujenga makunyazi, akageuka kuwaangalia mabaunsa wake, akitaka kuwaambia jambo, lakini akaghairi.

Mama mdogo, na Maua walikuwa wametulia wakimwangalia huyu jamaa, na waliona huenda muda wowote wakafukuzwa, na Mama mdogo, alijua kama asipofanya jitihada, anaweza asipate kile alichokitaka, akataka kufunua mdomo kuongea, lakini kabla hajasema kitu yule jamaa akasema;

‘Kwahiyo mnataka kusema nini?’ Yule jamaa akauliza na kumwangalia mama mdogo, wakati huo alikuwa akikwepa kabisa kumwagalia Maua, tofauti na alivyokuwa akifanya mwanzoni, ambapo kila mara akiwa anaongea, jicho lake lilikuwa halibanduki kumwangalia Maua huku uso ukimeta meta na tabasamu kilikuwa halibanduki mdomoni.

‘Sisi….tumekuja kukufahamisha, …..utasamehe kama lugha yetu imekukwaza. Sisi, yaani mwanangu hapa, ana uja uzito, na tuna imani kabisa ujauzito huo aliupata siku ile…..’akatulia mama mdogo, pale alipoona huyo jamaa akamwangalia kwa macho ya kutisha.

‘Siku ile ipi…….?’ Akasema Tajiri, akiangalia saa yake.

‘Siku ile ya lile zoezi..’mama mdogo akakatisha pale alipogeuka na kumuona Maua akimwangalia kwa mshangao. Kwani Maua aliposikia hivyo, mama yake akisema siku ile ya `zoezi’ akili yake ilimtuma kuwa, mama yake mdogo alikuwa akijua kila kitu kilichotendeka hapo, na ilikuwa imepengwa

‘Ina maana hilo lilikuwa zoezi na mama yake alikuwa akijua….’akawa akiongea akilini

‘Haiwezakani, na ni nani atawaamini maneno yenu…mnaweza mkafanya njama, kwa vile mnaona labda..’akatulia kidogo, na baadaye akaendelea kuongea,

‘Na…..na hili wengi wanakosea, mimi sio tajiri kiasi hicho, wapo matajiri bwana, mimi ninajihidi kadri ya uwezo wangu,na kidogo ninachopata ninajitahidi kushirikiana na wenzangu, lakini wale wenye akili dhaifu wanaona mimi ni tajiri, na kuniona eti ninagawa pesa….sio hivyo,….na wengi wanachukuliwa mwanya huo kunibambikia mambo kama haya….’akatulia na akapitisha macho kidogo kumtizama Maua.

‘Una maana gani kusema hivyo?’ Maua akauliza kwa sauti ya haraak haraka, ilikuwa suti ya mkwaruzo kama vile anaumwa kikohozi…au koo limekauka.

‘Sijaongea na wewe binti, …tukiongea watu wakubwa inabidi utulie kwanza, huo ni utomvu wa adabu…binti mdogo kama wewe unakosa heshima’akasema huku akimwangalia Maua kwa jicho kali.

‘Sasa hivi unaniona mimi ni mtoto…..eti binti mdogo, na kwa vile mimi ni mtoto na umeona hivyo, basi sheria itachukua mkondo wake, kwasababu ulinibaka, na sasa nina ujauzito wako…’akasema Maua.

‘Hahahaha…..umesahaueeh, unakumbuka ule mkanda, …ulijileta mwenyewe, ukawa unajilazimisha mwenyewe kwangu…..lakini hilo sio hoja sana, kama mnataka kwenda mahakamani njia ipo wazi, ..lini mnataka kupeleka hiyo kesi yenu, ….?’ Akauliza kwa dharau.

‘Sio hivyo, mzee…’akasema mama mdogo, na akasahau kuwa huyo jamaa huwa hataki kuitwa mzee, akasahihisha na kuita na kusema ; `sio hivyo Tajiri….’akaweka mikono kifuani kama mtu anayeomba jambo kwa unyenyekevu.

‘Ndio hivyo….’ Akasema kwa hamaki, na huku kamkazia mama mdogo macho, hadi mama mdogo akawa anaonyesha kuogopa, na kuwa kama anajikunyata.

‘Na mimi namuunga mkono kabisa huyu binti, kwani ni vyema haki ikafutwa, ..na sheria ikachukua mkondo wake, …nendeni mahakamani, na mimi nitawasaidia kumlipia wakili,….ili huyo mwenye hiyo mimba awajibike, au sio?’ akawa kama anauliza.

‘Mimba hii ni ya kwako, usijidangaye kukwepa, …na kama ukiikataa…..mimi nitaitoa,…’akasema Maua.

‘Safi sana…kumbe una akili….mimi sijali lolote utakaloamua, …’akasema huku akitoa tabasamu la uwongo, na dharau.

‘Nikuambie ukweli, ……wengi wameshawahi kuja kwangu kwa wazo kama hilo, nahisi wengine walifanya hivyo, na hata wengine hawakutaka hata kuniuliza,….wamefanya hivyo..sasa na wewe uamuzi ni wa kwako…nasikitika kwa hilo…natumai tumelewana, kama unahitaji gharama yoyote kwa hilo au lile la kwanza sema,…..’akatoa pesa mfukoni na kuziweka mbele ya meza, pale alipokaa Maua.

‘Mimi sijaja hapa kwa ajili ya pesa zako, ……wewe ulituma ujumbe kuwa unanihitaji nije tuonane, na ndio hivi nimekuja…’akasema Maua bila kujali, bila kumjali mama yake mdogo aliyekuwa akimfinya, ili asiongee hivyo.

‘Na, pili na hili la huu uja uzito, kwa vile umeniharibia maisha yangu, ….wewe unahitajika kuwajibika , uhakikishe unailea hii mimba hadi hapo nitakapojifungua,…na nikishajifungua, tutakwenda kupima,kama hii sio mimba yako, nitakulipa gharama zako zote, na kama ni ya kwako,….’akatulia kidogo.

‘Nitakulipa mara mbili….’akamalizia huyo tajiri, na kwa haraka, kama vile alikuwa kajiandaa kwa hilo, akatoa karatasi kwenye mkoba wake, na kalamu, na kuandika maelezo haya;

‘Mimi Tajiri….nimekubali kwa hiyari yangu, kuitunza mimba ya binti, ….Maua, hadi hapo atakapijifungua, na akijifungua, ili kuondoa utata, vipimo vya kutambua uhalali wa huyo mtoto vitafanyika, kama kweli huyo mtoto ni damu yangu, nitamlea, nitamhudumia kama mwanangu, na kulipa faini yoyote, lakini kama sio damu yangu, gharama zote nilizotumia atazirudisha……….’ Akaweka saini yake

‘Huu hapa ushahidi , ili kukuonyesha kuwa mimi sio mtu mbaya,….nimefanya hivyo kwa wengine, kwanini nikufanyie wewe ubaya…hata hivyo, mmmh, bado nitakuhitaji, …’akatabasamu,

‘Utanihitaji kwa lipi?’ akauliza Maua huku akiwa kakunja uso, na huku mkono mmoja akiwa kashikilia ile karatasi.

‘Bado wewe ni mfanyakazi wangu, umesahahu mkataba wa ajira,…leo hii nitahitaji kuitumia ile ofisi, na wewe unatakiwa uwepo kwa ajili ya huduma mbali mbali….’akamgeukia mama mdogo.

‘Naomba umuelekeze mwanao, ….kama mnataka mambo yaende kisheria basin a nyie timizeni wajibu wenu, la sivyo, naweza kubadilika….nitaitumia sheria hiyo hiyo, mkaenda kuozea gerezani, …na ngoja kwanza,….’akafungua mkoba wake na kutoa kanda za video mbili.

‘Maua nakuhitaji faragha, maana haya ni maswala ya mimi na wewe, ili kukuonyesha kuwa nakujali, na najali ubinadamu wako…’akasema huku akiingia chumbani kwake, na Maua akabakia ameduwa, na akili yake akakumbuka jambo, akautizama mkoba wake, na kukumbuka kitu, bila kumwangalia mama yake akamfuata huyo Tajiri wake na kuuchukua ule mkoba wake.

Alipofika ndani akamkuta yule Tajiri akiwa kakaa huku kashikilia zile kanda za video , akiwa anazichezea chezea mkononi, akageuka kumuangaliana Maua.

‘Mimi sipendi ugomvi, wala uhasama na watu, hasa warembo kama wewe…sioni haja ya wewe kubeba kisu,..kisu cha nini, unataka uniue, kwa kosa gani nililokufanyia, hayatoa hicho kisu, njoo nichome nacho…’akasema na kumuacha Maua akiwa kaduwaa, hakujua ni kwa vipi huyo mtu kagundua kuwa aliweka kisu kwenye mkoba wake.

‘Nilisahau nikaja nacho…’akasema Maua akionyesha uso wa kushangaa.

‘Haina shida mrembo…mimi sina ubaya na wewe, na nasikitika sana kwa hayo yaliyotokea, …huenda ndivyo, ..lakini wakati mwingine nafsi inajuta, ….nakumbuka siku ile sote tulikuwa tumelewa, lakini mimi nalewa mara nyingi, sihamaniki,…sipotezi ufahamu na kufanya yasiyotakikana, ….hata hivyo pombe  ni pombe, pombe haina rafiki…’akawa bado kashikilia zile kanda za video.

‘Nilipoangalia tena hizi kanda za video, kuna kitu kimekuwa kikinisuta, na kujiuliza yote haya ni ya nini,…ni kwa ajili ya kupata utajiri, mbona utajiri ninao, …nataka nini tena,….hapana nikaoana kuwa haya yanatosha, kama ni utajiri wa zaidi, hautanisaidia kitu….’akawa macho yake yameangalia kwenye mkoba wa Maua.

‘Mimi sioni haja ya kukuumiza zaidi, naomba utoe hicho kisu chako, unichome hapa,..’akaonyesha kidole chake kwenye moyo wake, na huku akimsogelea Maua.

‘Ili moyo wako utulie..au sio…hata mimii nimechoka, nimechoka kutenda makosa, madhambi, dhuluma,..na wengine wananiita eti mbakaji,…..sikumbuki kubaka, kwasababu nina ushahidi, kwa hatua, kwa kila jambo langu, nakuwa na kumbukumbu….huenda hata hili litakalofanyika hapa, litakuwa na kumbukumbu yake….’akaangalia juu.

Maua naye akaangalia juu, akaona kitu kama kinamulika, kipo kama tochi, hakuelewa kina maana gani, lakini akili yake ikamkumbusha picha za video alizowahi kuona kuwa kwenye chumba kunaweza kuwekwa kitu kinachonasa matukio, na ukifanya jambo unaonekana, akashituka..

‘Kwahiyo ina maana umefanya hivyo, ili kujihami,….?’ Akauliza Maua.

‘Sio kujihami, hiyo ni kawaida yangu…popote ninapokwenda ninakuwa na wataalamu wangu wa kuweka kumbukumb u zangu, sina shida, siogopi, kwanini nifiche, …’akasema.

‘Sasa kwanini safari zako za kuja huku ni za kificho, …na hukai hoteli moja kwa muda mrefu,…?’ akauliza Maua.

‘Hayo ni mambo ya kawaida, pamoja na hayo, bado nina maadui…hawo maadui hawajali sheria…hao ndio nawakwepa, lakini sikwepi sheria…ndio maana naweka ushahidi….’akazingalai zile kanda.

‘Siku ile niliuaharibu ule mkanda ulionionyesha, hiyo mingine imetoka wapi?’ akauliza Maua huku kashikilia mikono mbele bila kuogopa.

‘Mikanda kama ile inawezekana kitengenezwa mingi….lakini nimena kwako wewe haina haja, nitaharibu kumbukumbu zako, na hizi ni mikanda nilizokuwa nimerokodi, na..kama tutakubaliana nitakukabidhi, uziharibu mwenyewe, na ungelikuwa mtaalamu wa mitandao, ningekuonyesha wapi kulipokuwa na hizo kumbukumbu ukaizifuta zote….’akasogelea komputa yake.

Mkono wa Maua ukawa unatikisika kwa hasira, kuna kiu kilikuwa kikimuhimiza afanye lile alilokuwa kakusudia na hakikujali kuwa kuna kumbukumbu, …hakikujali kuwa kufanya hivyo, kutamletea matatizo, 

‘Unaogopa nini, maisha yako yameshaharibiwa, na aliyeharibu ni huyo hapo, tumia nafasi hiyo, ukimaliza, vunja kila kitu…’sauti ikamwambia.

‘Sogea hapa kwenye hii komputa uone wapi ninapohifadhi kumbukumbu zangu,…..unaona hata haya yanoyotea hapa, yanahifadhiwa humu, unaona…..’akawa anaonyesha. Na Maua macho yake, yakawa yanaangalia yale matukio ya liyotokea siku ile…

Akaanza kutetemeka, ….akahisi mwili ukibadilika, akajaribu kufunua mkoba wake, ili aichukue ile dawa, lakini hakuiona, akaanza kubadilika,…..sauti isiyo yake ikatokea.

‘Sasa nimekuaj mwenyewe, nimekuja kulipiza kisasi….kwa mtendo uliyomfanyia kiti wangu…’sauti nene ya kiume ikaongea. Tajiri, akageuka huku na kule kutafuta wapi sauti inapotokea, hakuona mtu mwingine zaidi ya Maua.

Alishangaa, alipomtizama Maua, sio yule Maua aliyemjua, sura ya mvuto, na macho ya malegavu kama alivyopenda kuyaita, na kuyaona, hayakuwepo tena…..kilichoonekana ni macho meupe, macho yaliyojaa hasira na uchu wa kuua, meno yalikuwa yametokeza nje, na hata mate kumtoka mdomoni, ….

‘Kumbe wewe ni shetani…..’aaksema huyo Tajiri

‘Hahaha….wewe hujioni, wewe nishetani zaidi ya ibilisi, mangapi mbaya uliyowahi kufanya ,ambayo hata sisi mashetani hatukuwahi kuyafanya…umesahau, ..umefanya mabaya mangapi, umeua watu wangapi, umebaka watu wangapi..ili tu uweze kupaat utajiri….eti ili upate utajiri mpaka upate vigoli, upate mwili wa binadamu,…huo ni ushetani, huo ni zaidi ya ushetani….’sauti ile ikasema.

Tajiri, akahisi hatari, akawa anasogea nyuma, na Maua akawa anamsogelea, …hadi wakafika mwisho, nyuma ni ukuta, na meza, …..Maua kwa haraka akatoa kile kisu kwenye mkoba wake….

‘Sasa leo ndio mwisho wa yote hayo, unahitajika uje huku kuzimu, tukawe pamoja….’ile sauti ikasema …

‘Hapana…nisameheni, sitarudia tena, nitahakikisha namuoa na kumtunza huyu ….wewe. huyo binti…’akawa anasema huku akili yake ikikumbuka ahdithi za mashetani, kuwa mtu anaweza akatwekwa an mashetani, akaabdilika na kuwa kama hivyo, na kwahiyo huenda Maua ana hayo mashetani, na asipoyabembeleza anaweza kuuwawa…

‘Semeni mnataka nini……?’ akauliza akili ilipokumbuka mambo hayo ya mashetani.

‘Tunataka roho yako…..’Maua akainua kile kisu juu

**********

NB: N I kazi sana kuandika sehemu kama hii asubuhi asubuhi, kwani ina mambo mengi, lakini sehemu hiyo inatosha kwa leo

WAZO LA LEO: Uzuri wa sura, katu hautadumu , lakini uzuri wa tabia, matendo mema, hudumu milele. Tujitahidi kuwa wema wa tabia, na kutenda matendo mema.

Ni mimi: emu-three