Hii ni blog maalum kwa kumbukumbu za kimaisha, matukio yenye mafunzo ndani yake, ndio maana nikaiita 'diary', na kwa kuifanya iweze kuvutia zaidi tunaandika matukio hayo kwa mfumo wa visa, hadithi au tamithilya..pia tunakaribisha mijadala na yale yote unayopenda yawemo humu. Wewe ukiwa mdau muhimu, unaweza kuchangia na wenzako kwa kutoa hoja (comments). Pia unaweza kutoa maneno ya hekima, utaalamu, au dukuduku lako (kilio chako)kwa jamii ili kuweza kukidhi mahitajio yetu. SOMA , CHANGIA, NA TOA kisa chako, au lolote lenye mafunzo ili tuliweke hewani.

TUPO PAMOJA DAIMA


Tushirikiane, Tusaidiane, Tupendane, Tuvumiliane, Tusaidiane, Tusameheane.

Kwa visa motomoto tunapatikana pia kwenye mitandao ya kijamii ya: Facebook, na Twitter, bofya hapa upate visa zaidi;

https://www.facebook.com/emu.three, na kwa ajili ya kuitangaza hii blog, ingia hapa:

https://www.facebook.com/diaryyangu/

`u-like' na pia unaweza kutwitter hapa;

https://twitter.com/emuthree



Wednesday, September 19, 2018

YOTE NI KWA MAPENZI YA MUNGU-50



Askari, wakawa wanafuatilia, kuzima hizo fujo, na kuwatoa watu nje..walitaka pia kuona kuna tatizo gani.

Na baadae huyo mtu aliyekuwa akiendeshwa kwenye kigari cha wagonjwa, akawa keshafikishwa mbele akiwa ndani ya kigari hicho..., nyuma yake yupo docta, anakisukuma hicho kigari, na muda huo hakimu alikuwa kasimama, akitaka kuondoka,…

'Kuna vurugu gani, kesi ijayo, sitaki kuona hili likitokea, kama watu hawana busara, wasifike hapa mahakamani..'akasema hakimu kwa hasira.

Akamuona huyo mtu, akisogezwa mbele, hakutaka hata kufahamu huyo mtu kaletwa wa nini, ...kwa haraka akaanza kutembea kuondoka, huku akisema;


‘Hatuwezi kufanya lolote kwa muda huu, lolote ulilo nalo wewe kwa sasa, itabidi lisubirie muda mwingine, …’alisema hakimu huku anatembea kuelekea mlango wake wa kutokea,

.
Huyo mtu aliyekaa kwenye hicho kigari, akasema kwa sauti kubwa;


‘Samahani muheshimiwa hakimu, lakini hili haliwezi kusubiria kesho,…ilimradi kauli imeshatoka, ya kunishutumu mimi, na hatujui kesho itakuwaje, ninaogopa isije kutokea kama ilivyowahi kutokea huko nyuma, watu wameondoka na kuacha maswali nyuma,…naomba tafadhali, unisikilize japo kidogo tu…’huyo mtu kwenye kigari akasema

Hakimu akawa anatembea kuondoka, na huyo jamaa akazidi kusema kwa sauti kubwa

‘Mimi ndiye....alimaarufu,.. Dalali…’Aliposema hivyo, hakimu akasimama, na kwa haraka akageuka kumuangalia huyo mtu, alitulia kidogo akimuangalia ...


‘Dalali…ndio wewe ndiye uliye- ….’akasema hakimu na huyo jamaa hakusubiria hakimu amalizie, akasema;


‘Ndiye mimi muheshimiwa hakimu, ndiye mimi niliyeshutumiwa na mengi, kutoka kwenye kinywa cha kijana anayedai kuwa yeye ni mtoto wangu…’akasema huyo mtu, na hakimu akawa sasa kasimama.


‘Mimi imenibidi nijitokeze tu, ili haki iweze kutendeka, siwezi kuvumilia tena, nahisi kuna njama za kuupotosha ukweli, na tukiendelea kunyamaza, mabaya yanaweza kutokea, nahisi wakati sasa umefika kuusema ukweli wote,...kwahiyo muheshimiwa hakimu tafadhali, nipe angalau muda kidogo,...naogopa kwa hali ilivyo, kesho inaweza isinikute nikiwa hai…’akasema huyo jamaa.


‘Kwanini unasema hivyo, kuna nini kimetokea na kwanini upo katika hiyo hali,,…?’ akauliza hakimu, sasa akiangalia saa yake.


‘Nimetishiwa uhai muheshimiwa hakimu, yanayotokea kwangu, ni majinamizi tu, nafanya bila kujijua nafanya nini...'akasema

Hakimu sasa akageuka kumuangalia huyo mtu

'Na cha muhimu ni iliyotolewa na huyo kijana, sasa kwa vile una haraka, mimi nasema hivi, sio kweli kuwa mimi nimechukua hilo deni, sio kweli kuwa mimi ndiye nilikopa hizo pesa, sio kweli kuwa mimi nilijua kilichokuwa kinaendelea kwenye hilo deni, nayatamka haya yasikike,…ili hata wakinua leo, kauli yangu iwe ndio hiyo…’akasema huyo jamaa.

Hakimu akaangalia saa, na kuanza kuondoka, huku akisema;


‘Sawa kauli yako imenakiliwa, kesi itaendelea kesho, au siku itakayopangwa kwa leo hatuwezi kufanya lolote..unasikia, sheria za mahakama zinafuatwa, kesi hii imesitishwa kwa leo…’akasema hakimu , akaanza kuondoka, lakini ghafla akasimama , na kwa sauti kubwa akasema;


‘Ila wewe itabidi uwe mikononi mwa watu usalama, watu wa usalama, hakikisheni huyo mtu analindwa kwa nguvu zote, hadi kesi itakapoendelea tena…’akasema huyo hakimu, na huyo akafunguliwa mlango, na kutoka eneo hilo la mahakama.


Watu wa usalama kwa haraka wakamfuata huyo mtu aliyeingia ambaye lijitambulisha kuwa yeye ni …alimaarufu, Dalali na kuondoka naye.


Kisa kinaendelea..


*********

Kesi hiyo ilibidii ipangiwe siku iliyofuata,hiyo ni kutokana na kilio cha watu wengi ambao walianza kulalamika kuwa kesi hiyo inachukua muda, huku wao wakidhulumiwa haki zao, wana mashaka na haki zao, kwani wamepewa madeni yasiyo halali yao…


Na wakati huo huo,  waendesha mnada walikuwa wakilalamika,kuwa na wao wanazuiliwa kutekeleza majukumu yao, wakati wana kibali rasmi, cha kuendesha minada hiyo kwa niaba ya benki..


Na watu wa haki za binadamu, wanajamii,…haki za akina mama na watoto na wao walishaanza kupaza sauti, kuwa matajiri, wanatumia mapesa yao, kuhakikisha, haki za wanyonge hazipatikani…


Jambo hili likaingia kwenye siasa, …wanasiasa nao, wakaona hiyo ndio sehemu ya kujijengea majina, wakaanza kupaza sauti, kwa wananchi…


‘Haki..haki..haki…haitendeki ipasavyo….’


Kwa mashinikizo hayo, yakaifanya idara ya mahakama kuingilia kati, na kesi hiyo ikapewa kipaumbeme… hakimu akaona kesi hiyo iendee siku iliyofuatia.


‘Kutokana na ratiba zetu, siku ya kesho haina kesi nyingi, kwahiyo kesi hiyo itaendelea, na natumai , siku hiyo ndio itakuwa siku ya mwisho ya kusikiliza ushahidi wenu, na muhakikishe kila kitu kinakuwa tayari,…ili tuone kama tunaweza kuihitimisha hiyo kesi, au la, hatutaki idara hii kuingiliwa na watu wengine…’akasema msemaji wa hakimu akiongea na mawakili wa pande zote mbili.


Na wakati hayo yakiendelea, Majaliwa alikuwa bado kapoteza fahamu, na alikuwa chumba cha wagonjwa mahututi, ….na ndiye alionekana kuwa shahidi muhimu wa kuhitimisha hiyo kesi, watu wengi walikuwa wakimzungumzia yeye, na wengi walitaka wawepo kwenye hiyo kesi.


‘Kama shahidi huyo muhimu anaumwa hajitambui, tutaendeleaje na hii kesi hapo kesho, tunaona tusubiria labda..?’ akauliza wakili wa benki.


‘Tutaendelea na mashahidi wengine, kuna huyo mmoja aliyejitokeza,…hatuwezi kumpuuza, na ikizingatiwa kuwa yeye katajwa kama ndiye muhusika wa hilo deni la mama mjane…’akasema, msemaji wa hakimu.

‘Sio kweli…’akataka kusema wakili wa benki lakini akanyamazishwa,


‘Hayo tutayasikia huko mahakamani, lengo la kikao hiki ni kuwaarifu tu, kuwa kesho muwe mumejiandaa, hatutaki kupoteza muda kwa kesi moja tu…’akasema huyo msemaji .


**           


Basi kesi ikaendelea siku iliyofuatia,…na siku hiyo watu walijaa..isivyotegemewa, na ikaonekana mahakama haiwezi kukusanya watu wengi kiasi hicho,…, ikabidi kikosi cha kuzuia fujo kifike kuwatawanya hao watu waliojazana na wengi bado walikuwa wakiendelea kufika.


‘Kama hamtaki kutulia, inabidi muondoke eneo hili…’wakaambiwa watu, na wachache wakatawanyika, wengine wakatafuta sehemu pembeni ya mahakama wakakaa, wakisubiria ni nini kitatokea.


Sauti mahakamani ikasikika, …


‘Dalali…unakumbuka uliwahi kuambiwa ueleze ukweli wa deni ambalo benk wanadai kuwa ni deni la marehemu, aliyekuwa mume wa mama mjane ambaye ni mmmoja wa watu wanaodai kuwa deni hilo sio la kweli…’akaulizwa.


‘Ndio nakumbuka sana muheshimiwa …’akasema


‘Lakini kwa mara zote ulizofika mahakamani, au kuhojiwa na polisi wewe…, hukutaka kusema ukweli,…’akaambiwa.


‘Mimi nilisema yale yaliyostahiki kusemwa kwa wakati huo…’akasema Dalali.


‘Sasa kwa vile ukweli umeshajulikana, kuwa wewe ndiye uliyefanikisha deni hilo,sasa swali je hiyo sahihi ya kaka yako ilitoka wapi, kama ni wewe uliyefanikisha deni hilo…?’ akaulizwa…?’ akaulizwa Dalali.


‘Kabla sijajibu hilo swali, nataka tuwe wakweli , je hilo linawezekana  kweli..tuweni wakweli tu…, kwa taratibu za benki, zilivyo kwa mtu kama mimi, au kwa mtu yoyote kuweza kuchukua deni, achilia mbali, kwa niaba….lakini hapa kuna swala la sahihi ya mtu, kuna  dole gumba, la muhusika, je mimi nilikubaliwaje kuchukua , au kuweka sahihi kwa niaba..je ni kweli sahihi hiyo ni yangu, kwa niaba ya kaka yangu, ambaye ni marehemu…?’ akauliza.


‘Utuambie wewe sasa, maana sisi hatukuwepo, na wewe umetajwa kuwa ndio wewe ulifika kuchukua hilo deni, ukaleta kumbukumbu zinazohitajika, na wewe ulifanikisha hilo…’akaambiwa.


‘Jibu ni kuwa haiwezekani,…si ndio hivyo,..huo ndio ukweli, haiwezekani, na kama alivyosema, msemaji mmoja, maswala la mikopo yaliwekewa kitengo maalumu na waliohusika walifika kwenye kitengo hicho maalumu, sasa mimi sikumbuki…kwakweli, naomba nifahamishwe vyema, ilikuwaje….?’ Akauliza.


‘Sisi tutakufahamisha nini, …wewe kwa vile umetajwa kuwa ndiwe uliyehusika kwa hilo, tunataka utuambie wewe ulifanyaje, au ilikuwaje..’akaambiwa.



‘Kabisa… kabisa mnakubaliana na kauli hiyo,..ya maneno tu,  kuwa mimi ndiye nilihusika na hilo, kwanini mumuamini kiasi hicho,..!  Jamani, fanyeni kazi yenu vyema, mimi sielewi hapo….’akasema na kukaa kimia.


‘Tunakusikiliza wewe, hatuna muda wa kupoteza leo….leo, hatuwezi kuchukua siku nzima kwa hii kesi moja tu…’akasema hakimu.


‘Ina maana kuna mbinu zilitumika, muheshimiwa hakimu, sio bure tu, ..na hizo mbinu haziwezi kufanywa na mtu nje ya benki,…kwani benki wana taratibu zao, na mtu wan je huwezi kuzivunja, au sio, sasa iweje mimi mtu wa nje nishutumiwe kwa kauli ya mtu mmoja tu…’akasema, na hakuna aliyemjibu.


‘Ni sawa,…mimi nakiri kuwa kweli nilikuwa natumika kwa niaba ya bro ambaye ni marehemu, nilikuwa nachukua pesa kwa niaba yake…lakini nasema kwa kuapa, sikuwahi kujaza au kupeleka fomu ya kuomba mkopo kwake, akajaza akaweka sahihi, nikarejesha benki,…hilo halipo jamani…’akasema



‘Kwahiyo…unataka kusema nini…ni nini kilichokuleta hapa?’ akaulizwa

‘Kwahiyo, mimi nasema hivi, kama hilo deni lilitolewa,… mimi sijui lilitolewa vipi, na ndio maana nikawa nimesimamia kwenye ushahidi wa benki nikiamini huenda ni kweli hilo deni lilitolewa kwa bro, labda bro alichukua na hakutaka mimi au mkewe alijua hilo…’akasema


‘Usitake kutuchanganya hapa…’akasema wakili wa kutetea madeni.


‘Sio kuwa nawachanganya, huo ndio ukweli jamani,…hapa ni mahakamani, mimi naongea kama Dalali, najua dhima ya hili kama nitadanganya, mimi sijui lolote zaidi ya nakala za benki kuwa deni hilo lilichukuliwa na marehemu, sasa kama kulikuwa na mbinu nyingine kiukweli mimi sijui…’akasema Dalali.


‘Kwahiyo huyo shahidi aliyepita, alidanganya , kwa kusema wewe ndiye unahusika na hilo deni…?’ akaulizwa


‘Alisema hivyo kuwa mimi ndio muhusika wa hilo deni…?’ akauliza


‘Unauliza kama hujui, kwanini sasa umefika hapa kuikana hiyo kauli, …huyo shahid alisema wewe ndiye uliweka sahihi, ya hilo deni kwa niaba ya kaka yako, na wewe ndiye ulifanya utaratibu wa kupata dole gumba..’akaambiwa.


‘Mimi ndiye niliweka sahihi, hapo kwenye hiyo stakabadhi ya benki, kuna onekana sahihi yangu, kuwa nimechukua kwa niaba…sio kweli…huyo shahidi aje ayaseme hayo maneno mbele yangu, anithibitishie kwa ushahid kuwa mimi ndiye nilifanya hivyo…mimi sikubaliani na shutuma hizo…’akasema Dalali.


‘Unasema hivyo kwa vile wewe unajua kuwa msemaji hyupo hapa, hajiwezi,…si unajua huyo shahid ni  mahututi, hataweza kuja kupingana na wewe hapa, na wewe unachukua nfasi hiyo kupoteza muda hapa…’akaambiwa.


‘Lakini hii ni mahakama, kauli yangu inukuliwe,..kuwa mimi sijui lolote kuhusu hilo deni zaidi ya ushahid wa benki kuwa deni hilo ni la marehemu kaka yangu, sasa kama kuna vinginevyo, kuwa kuna njama zilifanyika, mimi nanawa mikono, sizijui kabisa…’akasema.


 Dalali akaigiza kama ananawa mikono…alipomaliza kufanya hivyo akaendelea kuongea;


‘Na kusema ukweli mbele yenu , mimi sikuwa na ufahamu wowote wa hilo deni, wakati kaka yupo hai…hilo deni nimelisikia siku walipoleta benki barua ya kujulisha kuwa kaka yangu anadaiwa…’akasema


‘Kaka yako hakuwahi kukuambia benki kuna deni, …awali hakuwahi kukuambia kuwa benki pesa yake inachukuliwa bila ya yeye kufahamu…?’ akaulizwa


‘Ni kweli ipo siku, kaka aliliongelea hilo, kuwa anashangaa kuna pesa imetolewa bila ya ridhaa yake, akaandika barua, na benki wakasema watafuatilia…na…siku moja wakati…ni.ni siku ile ilipotokea ajali,..hapana siku kabla, ..ooh, sijui kichwa changu kipoje…’akawa anajikuna kuna kichwa.


‘Ilikuwaje siku hiyo…?’ akaulizwa.


‘Ndio alinipigia simu akilalamika…kuwa kuna tatizo benki, nirudi haraka na gari,..kwa muda huo nilikuwa nalichunguza gari,…na kiukweli, sikuweza kupata muda wa kulichunguza, ila nilihisi gari lina matatizo…’akasema.


‘Je hayo matatizo ndio yalisababisha gari, kupata ajali…?’ akaulizwa.


‘Kiukweli…labda nijilaumu mimi…wakati najaribu hilo gari, nilihisi kuna tatizo..nikaona nilipeleke gari gereji…sasa wakati nimelifungua, ndio nikasikia simu..ya bro..kuwa nirejee nyumbani haraka, kuna tatizo benki…’akasema.


‘Ni nani alikupigia simu…?’ akaulizwa.


‘Unajua hilo nimeliwaza sana, nimejaribu kufanya uchunguzi wangu binafsi...tatizo,kiukweli kwa siku ile,…sikuwa makini kukagua ile namba, niliyopigiwa simu, ..na sikumbuki ilikuwa namba gani, ila …nilijua ni bro…’akasema.


‘Ina maana namba ya kaka yako haipo kwenye simu yako, hukuangalia kuwa ni namba ya kaka yako au la..?’ akaulizwa.


‘Namba hiyo ninayo kwenye simu yangu, ila mimi .nasema hivi, siku ile nilipokea bila kutizama mpigaji, na nikasikiliza, na mimi nikajua ni kaka…kwa haraka , nikijua labda kuna tatizo kubwa, ikabidi nifunge gari, na kuendesha gari kurudi nyumbani, muito wa kaka ulionyesha kuwa kuna tatizo kubwa sana…’akasema.


‘Wakati unaendesha gari kurudi nyumbani ilikuwaje…?’ akaulizwa.


‘Kuna hali,…nilihisi sio ya kawaida,…lakini akili yangu ilikuwa mbali, kuwazia, hicho alichoniitia kaka yangu…na nikafika nyumbani, kaka akiwa kakasirika kweli, na muda huo ameshajiandaa kuondoka…’akasema.


‘Hukumuambia kuhusu tatizo hilo la gari…?’ akaulizwa.


‘Hakutaka hata kuongea na mimi…kwa haraka akasema nimpe ufunguo, akaweka mizigo yake kwenye gari..na kuanza kuondoka….’akasema.


‘Hukumzuia kuondoka na gari hilo, ukiwa  unafahamu kuwa gari hilo lina matatizo…?’ akaulizwa.


‘Sikuweza,..kaka akikasirika huwezi kuongea neno mbele yake, usubirie mpaka atulie,..sikuweza kabisa na ilipotokea ajali, nilijilaumu sana, kuwa mimi nimehusika, kwanini sikuweza kufanya hivyo, kumzuia…’akasema


‘Kiukweli,... kaka alipoondoka, nilimuuliza shemeji kuna tatizo gani, shemeji akasema hata yeye haelewei kitu..basi mimi nikaomba mungu tu..kaka aweze kuende salama na aweze kurudi salama…lakini siku hiyo haikupita ndio tukapokea taarifa ya hiyo ajali…kwakweli kwa hilo hadi leo mimi najilaumu sana..., ni mimi nimesababisha kifo cha kaka…’akasema sasa akijizuia kulia

‘Kusababisha kwa vipi sasa…?’ akaulizwa


‘Nilishindwa kumzuia, nilijua gari hilo lina matatizo, lakini yeye hakutaka kunisikiliza ningelifanya nini sasa…’akasema


‘Wanasema wewe ndiye ulikuwa wa kwanza kufika kwenye hilo gari,...baada y aajali kutokea, kweli si kweli…?’ akaulizwa.


‘Kwa vipi…!?' akauliza kwa kushangaa. Halafu akaendelea kuongea...


'Unajua...mimi nilifika kwa haraka baada ya kupokea taarifa, ...nilifika na kukuta  gari linawaka moto mkali sana…na niliuliza kaka yangu yupo wapi, je kaweza kutoka kwenye hilo  gari, watu wakasema hawajaona mtu akitoka,..'akatulia kidogo.

'Mimi nikawa sasa nataka kwenda kwenye hilo, gari, moto ni mkali kweli..  watu wakanishikilia,…kwa watu walioweza kuiona hiyo ajali, watakuwa ni mashahidi wangu, waulizeni watu waliokuwepo siku hiyo, mimi ninashangaa kusikia eti …nilikuwa wa kwanza kufika kwenye hilo gari, ku-ku, kiukweli inaniuma sana…’akasema.


‘Baada ya hapo ilikuwaje…baada ya moto kuzimwa, ..wewe ulifika kwenye gari…?’ akaulizwa.


‘Ndio, lakini kwa kuitikia wito wa askari,…..ili niweze kuutambua mwili wa kaka,..maana ...walisema, aligonga nguzo, akapoteza fahamu, na huo moto unawaka, hakuwa na fahamu, na ilitokea kwa kasi sana, walivyosema watu..mimi nuilifika kwenye hilo gari kwa muito wa askari, kuhakikisha kuwa mwili huo ni wa kaka yangu, nitakuwaje wa kwanza kufika hapo…’akasema.


‘Mbona unarudia uwongo ule ule..’akaambiwa


‘Sio uwongo jamani…mimi sasa hivi nasema ukweli ulivyo, nifiche ili iweje,…na huyo anayejiita ni mtoto wangu, aje hapa athibitishe hilo...'akasema


'Athibitishe nini sasa, kwani alikuwepo kwenye hiyo ajali..?' akaulizwa

'Athibitishe kuhusu hilo deni, maana …mimi sijui lolote kuhusu hilo deni…’akasema hivyo na watu wakaishia kuguna, na ...mara watu wakawa wanaongea kila mtu na lake mpaka hakimu akaingilia kati.


‘Kwahiyo unataka kusema huyo kijana wako anadanganya, na kwanini unasema ‘huyo anayejiita, mtoto wako..’,?' akaulizwa


'Ndio anayejiita,...nina sababu zangu kusema hivyo....'akasema hivyo.

'Ni kweli kuwa hata yeye hata yeye kasema hujawahi kumkubali kuwa yeye ni mtoto wako, ni kwanini wewe, unamkana kuwa huyu sio  mtoto wako, wakati mama yake kaandika hivyo, kuwa wewe ndiye chanzo cha huyo mtoto…?’ akaulizwa.


‘Sijasema nimemkana…na ndio ni eeh, eeh,…kwa kauli ya marehemu nikiwa na maana, mama wa huyo kijana,..'akasita watu wakiguna.


'Nimesema hivi , mimi sikatai, spingi kauli ya huyo mama, …ni kweli, eeh...aliwahi kuniambia ana mimba yangu…lakini hatukuwahi kulithibitisha hilo, na …kutokana na mageuzi, kuwa mimi nimeoa,…nina familia yangu, siwezi kukubaliana na hilo, ..kwani kukubali hilo ni kuleta uhasama ndani ya ndoa yangu…’akasema.


‘Lakini hayo yalitendeka kabla hujaoa, si ndio hivyo, kuwa wewe uliwahi kumbaka huyo mdada, na mbele ya mahakama ulikana hilo, alipokushitakia, kwenye kesi, aliyokushitakia wewe…’akaambiwa


‘Mbele ya mahakama iliamuliwa tukalimalize hilo nyumbani, maana kulikuwa bado na utata mwingi, na sikuweza kukubali au kukataa…’akasema hivyo,


‘Ni ikawaje…?’ akaulizwa


‘Alipoitwa kwenye kikao cha kifamilia hakuwahi kufika, alikuwa anaumwa,…’akasema

‘Sasa kwanini mke wako aje kukwazika na jambo kama hilo, hukuwahi kumwambia uliyowahi kuyafanya ujanani mwako, sizani kama hayo ya ujanani, yatamfanya mke wako akwazike,…na kuleta uhasama kwenye ndoa yenu…’akaambiwa.


‘Ni kweli…lakini…mnielewe hapo, mimi sikuwahi kukaa na kukubaliana na huyo marehemu kuwa huyo mtoto ni wa kwangu, kutokana na historia ilivyokuwa, na niliongea hayo hata mbele ya mahakamani,..na angelifika siku hiyo ya kikao cha kifamilia pale nyumbani sizani kama ingelileta shida,…kama ni mtoto wangu, ningekubali tu…’akasema.


‘Je hukuwahi kumfanyia hayo aliyosema yeye kuwa wewe ulimfanyia…?’ akaulizwa.


‘Ujana una mambo mengi…..na na…kwa vile kijana mwenyewe hajataka kulikubali hilo, kwanini mimi ning’ang’anie…'akawa anaongea tofauti na swali lenyewe, 

'Yeye, kama anaona kweli mimi ni baba yake alitakiwa tukae meza moja tulijadili hilo, yeye kama alivyokuwa mama yake ni kiburi tu…sasa mimi nifanye nini…’akasema.


‘Kwahiyo wewe na yeye bado mna uhasama…?’ akaulizwa.


‘Yeye ndio ana uhasama na mimi, mimi sina uhasama na yeye…na visa vyote hivyo anavyovi-fanya vya kunitia mimi matatani, kunitega,kwa mambo mbali mbali ili mimi nionekane muhalifu,…havitasaidia kitu , maana kama ni kosa lilishafanyika, na hayo yalikuwa mimi na huyo mama yake, na niliwahi kumuomba msamaha, …’akasema.


‘Kwa kusema hivyo, unamaanisha, huyu kijana ndiye kakutega na hilo deni, kuwa wewe uliweza kulipokea hilo deni kwa niaba ya kaka yako..wakati kaka yako hana ufahamu na hilo…si ndio hivyo?’ akaulizwa.


‘Narudia tena, tafadhali mnielewe…mimi sijui lolote kuhusu hilo deni, zaidi ya ushahid wa benki, kama yeye kanitega kwa hilo deni, mimi sijui..sina ushahidi wa hilo, na nisiwezi kumsemea hivyo,....ila kumbekeni maswali yangu ya awali,...'akasema


'Maswali gani...?' akaulizwa

'Inawezekanaje deni hilo lifanyike hivyo,..kwa mujibu wa sheria za benki, na lipite hivyo kirahisi,..yawezekanaje kwa mtu wa nje kama mimi, nije kuyafanya hayo,...hebu jkaribuni kulifikiria hilo, ..ni hekima ndogo tu,..kiukweli mimi sina ushahidi wa kumnyoshea mtu kidole,..ila jiulizeni hilo...’akasema.


‘Kwanini sasa akutaje wewe kuwa ndiye uliyeweka sahihi kwa niaba ya kaka yako, ?’ akaulizwa na kabla swali halijamalizika, yeye akasema;

‘Mimi  hapo kwakweli sijui…kwanini anisingizie mimi hivyo..., ndio maana nilitaka niliongee hili mbele yake, anielezee ilikuwaje,...lakini kwa bahati mbaya nilipofika tu yeye, sijui kwa kuniogopa akapoteza fahamu..’akasema.


‘Kwanini akuogope?’ akaulizwa.


‘Labda ni kutokana na..mimi sijui, kwanini ilitokea hivyo, labda alimuona mama yake, au mzimu wa mama yake..ukamuonya kuwa anachokifanya sio sahihi,…nimesikia akisema kuwa mama yake alimkanya kuwa asije kunilipizia kisasi mimi..kwa haraka hapo utafikiria nini,..wanawake wa siri kubwa mioyoni mwao..’akasema.

'Una maana gani kusema hivyo...?' akaulizwa

'Nawaza tu..kutokana na historia ya huyo mama, ilivyokuwa...mengi yalisemwa juu yake, na ..sio kuwa yote yalikuwa ni kweli..lakini kuna ambayo mimi nayafahamu, ..siwezi kuyasema hapa...'akasema


‘Je ni kweli kuwa wewe uliwahi kumfanyia mama yake huo ubaya, na unyama wa kumkata ulimi, kwa kifaa chenye kutu..?’ akaulizwa.


‘Hayo, mengine kiukweli mimi siyajui, na…na kiukweli, …jamani siku ile ilikuwa na mikanganyko mingi, nililewa…sikujua nilitendalo…sasa mimi siwezi kukubaliana na hilo moja kwa moja,....ni kweli kuwa niligombana naye, na siku ile, alitamka maneno ya kunikera, yaliyonifanya nikasirike sana…'akasema


'Je ni kweli uliwatuma watu wafanye hivyo...?' akauliza

'Lakini mimi sikuwaambia wamkate ulimi...sikuwaambia wa..wa...muue, hapana hayo sijui yalitoka wapi,,,niliwaambia wamfundishe adabu tu ..’akasema.


‘Ina maana hayo aliyoyaandika huyo mama kuwa wewe ndiye ulimfanyia hivyo, na wakati yanafanyika hivyo wewe ulikuwepo, kaandika uwongo,..je ni kweli kuwa wakati kitendo hicho kinafanyika wewe ulikuwepo maana yeye aliandika hivyo…?’ akaulizwa.


‘Nasema hivi mimi…siwezi kuyakataa hayo madai,,… kipindi kile , ujana, ulevi, na…na kuogopa, ilibidi nifanye mambo ambayo sikutaka yafanyike, ..lakini sikumbuki kitendo hicho cha kumkata ulimi, mbona ni unyama mkubwa sana huo,…aah, hapana, labda wale wahuni tu, sio mimi…’akasema.


‘Kwa kauli yako hiyo , kwa hivi sasa inatufanya tukutilie mashaka, kuwa wewe sio mkweli…hayo maneno aliyaandika marehemu, ..na inavyoonyesha kwenye maandishi yake yeye alikuwa akikupenda sana,..sasa kwanini akusingizie kitu kama hicho…?’ akaulizwa.


‘Jamani, hayo ya mimi na yeye, ningeliomba tuyaache,..kiukweli mimi nakiri kumkosea, lakini aliyoyafanya, yeye ndiyo yalinitia hasira…hamjui alinifanyia nini, na sio vizuri mimikumuongelea vibaya marehemu, wakati hayupo hapa duniani,..…mengine kayaficha hakuyaandika,…nahisi kwa kwa masilahi ya mtoto wake, je nyie mnataka yasemwe, sio vizuri jamani…’akasema.


‘Ni hasira gani za kufikia kumfanyia binadamu unyama huo wote, hapo ndio sisi hatukuelewi, hasira zilitokana na nini…?’ akaulizwa.


‘Jamani, sijui nisemeje…labda mnataka nionekane kuwa mimi ni mnyama, au sio ili nifungwe, ninyongwe..si ndio hivyo, sawa..., kama hilo litasaidia eeh, ili nisamehewe dhambi zangu, sawa...mimi nipo tayari…nifungeni tu, au ninyongeni tu…lakini siwezi kuyaongea hayo mengine sio vizuri…’akasema.

Alikaa kimia baadae akaongeza haya maneno….


‘Na…mengine niliyafanya,..naweza kusema ni akili za ujana ..na kutokujitambua, na, na..nilifanya vile…ili kujiokoa kwenye mikono ya kaka yangu, …’akasema.


‘Kwa vipi…ujiokoe kwenye mikono ya kaka yako…?’ akaulizwa.


‘Kiukweli kama kaka yangu angeliligundua hilo..misaada yote kwa ajili yangu, maana mimi nilikuwa nasaidiwa na yeye, ...na..nilikuwa na ujana mwingi,..ila nijua kuigiza, ili kaka anione ni mwema sana,..kiukweli kaka aliniamini sana,...sasa ninani angelikubali hiyo misaada isitishwe, na nina imani, ..angehakikisha kuwa mimi nilifanya hivyo kwa huyo binti....ningelifikishwa…kwahiyo kwa akili za kitoto, niliona bora,..huyo mwanamke atokomee, asioekane hapo karibu...’akasema.


‘Kwahiyo kumbe kweli ulidhamiria kumuua, au huko kumtokomeza kulikuwa na maana gani..?’ akaulizwa

‘Mnataka mimi nisemeje sasa…ule ulikuwa ni ujana. Jamani, nimeshawaambia hilo, hasira zilinizidi kupita kiasi...kiukweli nyie hamjui tu, mtu nilimuamini, nikajitolea…nikamuhifadhi sehemu, kwa gharama zangu, tena za kudanganya hapa na pale,halafu, hapana  …inaniuma sana,…’akatulia


‘Unajua sisi bado hatujakuelewa, yeye kakiri kuwa yeye alikupenda sana,ndio maana hakutaka kabisa uje kufanyiwa lolote baya, lakini wewe unavyoongea ni kama haupo hivyo, ni kwanini…?’ akaulizwa.


‘Hivi mumesikia, ni kwanini nilitamfutia sehemu...tatizo ni kuwa yeye alikuwa mfanyakazi wa ndani...sasa, mnajua wenyewe nina maana gani,...na...unajua mengine sikutaka kuyasema...'akatulia, halafu akaendelea kusema;

'Ni kweli nimeyasikia hayo, kuwa kweli alinipenda hivyo, ..na hata akawa radhi kesi yetu imalizikie nyumbani, akanisamehe,  na mimi kuonekana sina hatia, maana kama kweli angeliamua, ningefia jela,…najua kiukweli mimi nina hatia, na nipo tayari …kuwajibika kwa hilo…lakini..’akasema na kutulia.


‘Hilo umelikubali, ..kuwa kweli ulimfanyia huyo mama unyama huo aliandika,  sasa huoni madhara yake yamekimbilia kwa mtoto kalifahamu hilo, ..unafikiri kama ungelikuwa wewe mama yako kafanyiwa hivyo, ungelikaa kimia..?’ akaulizwa na hapo akabakia kimia.

Muulizaji akaendelea...

‘Kijana wako kwa kauli yake alisema hivi…’Aliyechukua huo mkopo, aliyeweka sahihi, si mwingine,… bali ni Dalali, baba aliyemuangamiza mama yangu…’..na kweli wewe umekiri kuwa wewe ulimfanyia mama yake hayo mabaya,.. sasa tunajiuliza wewe uliwekaje sahihi, na sahihi inayoonekana ni ya kaka yako..

Pili,.dole gumba liliwekwaje...maana dole gumba ni la kaka yako...na wewe ndiye inasadikiwa, kwa kauli ya kijana wako, ndio wewe ulifanikisha hilo kwa vipi, tuambie, ili tujue kuwa wewe ni mkweli na unataka kesi hii iishe...'akaambiwa

Na tatu, nilini haya yalifanyika ni baada ya kaka yako kufariki, au yalifanyika kipindi bado yupo hai, ..sasa kwa mara ya mwisho, sisi tunataka kauli yako, ili tusije kulaumiana tena kwa hilo, je yeye, kijana wako kadanganya, kwa hiyo kauli, sio kweli kuwa wewe unahusika na hilo deni, au wewe ndiye unadanganya, sisi tuna ushahidi wote hapa, …?’ akaulizwa hilo swali.

Dalali, akabakia kimia...kama anawaza jambo...halafu akainua kichwa na kumuangalia hakimu...ndio akaanza kuongea...


NB: Nimeshindwa kumalizia

WAZO LA LEO: Ndani ya hasira yupo ibilisi.. hasira mara nyingi humvuta mtu akafanya yale anayoweza kuja kuyajutia baadae, wengine wanasema wakiwa na hasira ni bora waseme sana, au wafanya jambo, hata la kuumiza,…wengine hufikia kulia tu... Je baada ya matendo hayo, unakuwa umefaidika na nini hasa..hujaumiza watu wengine huenda walikuwa hawana hata kosa…tujue fika,..hasira ni hasara,


Ni nini iliyobora ukifikwa na mtihani huo, kwanza,…tulia, fikria kwa makini, huku ukimuomba msaada mola wako, ili akupe utatuzi wenye busara, kumbuka jambo moja, kila jambo lina sababu yake, je hilo jambo lililokufanya ufikwe na hasira ulishalifahamu ni kwanini lilitokea, je ni kwa dhamira mbaya ya mtendaji au ni bahati mbaya….


Ni mimi: emu-three

Monday, September 17, 2018

YOTE NI KWA MAPENZI YA MUNGU-49




‘ Wewe mtu wa jamii, siku zote umekuwa mjanja,lakini kwa hili…hujashinda…na kwa hili unaweza ukabeba lawama,…., wewe unafikiri kwa ujanja wako wa maswali eeh, unitega, eeh…umeugundua ukweli ulivyo…, hahaha…hujaugundua ukweli wote ndugu yangu, ukweli wote naufahamu mimi….hahahaha….’akacheka sana halafu akatulia.


‘Tuambie sasa ili tumalize hili tatizo, tuache kushindana, kwa masilahi ya wenye haki, haki ya mama mjane na mayatima, si unalifahamuhilo, hao watu wanahitajia haki yao, je tukiwadhulumu tutapata nini, eeh, hebu niambie…’nikasema nikimuangalia machoni.

‘Lakini ile sio haki yao….hivi hamuniamini, lile eneo sio haki yao, ni eneo liliporwa, kama ndio unalizungumzia hilo…’akasema

‘Tunazungumzia deni, je hilo deni la benki ni haki yao, je wao wanastahiki kulilipa…?’ akaulizwa

‘Kama wao ndio warithi, wana haki ya kulilipa, maana wanabeba dhamana ya marehemu…’akasema

‘Je ni kweli kuwa merehemu ndiye alichukua pesa hiyo benki , kwa kuomba deni, kihalali,..kuacha hayo maelezo yako, je ni kweli marehemu ndiye alifika na kuweka sahihi kuwa anataka kukopa…tuambie ukweli wako na mwenyezimungu anakusukia,..na mama yako huko alipo anasikia…?’ nikamuuliza


‘Mhhh.. sio kwamba nayafanya haya kwa kukushandana na wewe, hapana ni kwa vile wewe unalazimisha ukweli, kwa jinsi unavyoutaka wewe, …’akasema


‘Tuambie sasa ukweli uliojificha, ukweli hukusu hilo deni, …’nikasema

‘Ukweli …mnaotaka nyie …ndio huo nilioongea mimi,..huo  ndio ukweli wenyewe, kilichobakia labda, ni  kuse-ma, ni nani eeh, mnataka mtu afungwe, mnataka mtu aonekane ana kosa, lakini kosa halikunzia hapo kwenye deni,..hilo la benki hamnielewi…’akasema na kugeuka huku na kule, halafu akainamisha kichwa chini.

‘Majaliwa…..’nikaaita hivyo


‘Niambie, …jamani nimeshawaambia ukweli wote, na vizuri wewe mwenyewe umeuleta huo ushahidi…kila kitu hapo kipo wazi, ni nani alichukua pesa, ..eeh, sahihi ip,o jina lipo, na dole gumba lipo, mnataka nini sasa, eeh…?’ akauliza


‘Ukweli,….ndio ushahidi huo unaonyesha hivyo, lakini je mbona kuna hitalifay nyingi kama nilivyokubaisnishia, inaonyesha kabisa, kuwa malipo hayo, hayakutekelezwa kihalali,…nyaraka zimejionyesha, ..hata polisi wakifuatilia wataligundua hilo, sasa sisi  tunausubiria ukweli kutoka kwako ili tuokoe muda, ili, hukumu iende kihalali, huenda sio wewe, ila wewe uliidhinisha tu, huenda kuna watu walifanikisha hilo kwa kupitia wewe…’nikasema.


‘Hakuna alifanikisha hilo kwa kupitia mimi,…ukweli nilioelezea ndio ukweli unaobainisha hilo, hayo yalitendekea kihalali,…’akasema hivyo halafu akakaa kimia, niligeuka kumuangalia hakimu, nikamuona anaangalia saa.


‘Majaliwa muda umekwisha, unajua ukitoka hapa unapelekewa jela,…’nikasema


‘Hahaha, hivi unafikiri mimi naogopa kwenda Jela, labda huko ndio nitaweza kutekeleza adhima yangu, ili..…hahaha, mimi nimekuwa jela, tokea siku niliposoma ile zawadi kutoka kwa mama….mimi sina tofauti na mfungwa, japokuwa mimi ni tajiri..lakini eeh, utajiri huo una maana gani kwangu eeh,…eeh, hauna maana kabisa kwangu nimekuwa nikiishi kama  masikini, nateseka moyoni, mwilini, akili haipo kabisa hapa duniani…sasa kilichobakia, labda, useme, nimfuate mama yangu, na nawaahidi siku nikikanyaga jela, mtakuja kutoa maiti yangu …’akasema na hakimu akamuangalia kwa uso wa mashaka.


‘Sikiliza ndugu Majaliwa,…kila jambo lina mwisho wake, ..na vyovyote iwavyo, usiku au mchana hauwezi ukaendelea kuwa hivyo, kutakucha na kutakuchwa, ndivyo maisha yalivyo,, yaliyofanyika yamefanyika, na yanamwisho wake…sasa tuone jinsi gani tutayamaliza haya kwa salama na amani…haki iweze kutendeka,…’nikasema


‘Kwahiyo unataka mimi nifanye nini , nikiuke haki, ili haki mnayotaka nyie itendeke, kwani mimi …si nimeshawaambia kila kitu au….?’ Akauliza


‘Hapana…ukweli bado haujakamilika…ushahidi wa kuwa wewe ndiye uliyehusika na hayo madeni tunao ndio huo hapa, je ukifungwa haki itakuwa imetendeka…?’ akauliza


‘Labda kama hakimi hajui kazi yake vyema…au nimekosea muheshimiwa hakimu…’akasema akimuangalia hakimu, hakimu akawa kimia, na jamaa akaendeela kusema.


‘Sikiliza wewe una akili sana au sio, ..mbona kwa hili hutaki kutumia akili yako vyema…’nikasema


‘Naitumia vyema, sema wewe hujui…ungelijua ukweli ulivyo usingelisema hivyo, akili yangu inaona mbali zaidi ya unavyofikiria wewe…’akasema


‘Kwa hilo..sizani kama wewe unaona mbali..maana wewe unataka kuficha makosa, au wewe tuambie..sisi ambao hatuoni mbali, je kwanini ulifanya hivyo, na ulifanya vipi, na…nimekuuliza swali, ni nani aliyekuja kuweka sahihi , kwenye kukamilisha hilo deni liwe deni, …kiukweli sio marehemu, sasa ni nani…?’ nikamuuliza.


‘Wewe ulikuwepo siku ile, unaposema kiukweli sio marehemu…?’ akauliza


‘Ndio maana nakuuliza wewe uliyekuwepo, uliyesimamia hilo,…utuambie,..ukumbuke ukweli wote ndio utamweka mama yako mahali pema peponi, na ukweli wako, ndio ..utasafisha, nafsi yako, ili upone kabisa, na ugonjwa huo ulio nao, niamini hivyo, baada ya ukweli hutateseka tena…na wanaohusika wawajibike,…’nikasema.


‘Ndio maana nilifanya haya ili haki itendeke,…lakini ninavyoona mimi, eeh… haki inaweza isitendeke…’akasema


‘Kwanini…?’ nikauliza


‘Kwasababu nyie mnachoangalia ni deni la pesa, hamtaki kuangalia deni la uhalisia, deni la madhara, madhara aliyopata mama yangu, madhara, ya dhuluma,…je hayo mtayafidia kwa shilingi ngapi…eeh, je hilo sio deni…?’ akauliza.


‘Hayo hakimu atayaangalia,..lakini kwanza tuambie ukweli…ni nani aliyefika hapo benki, na kuweka sahihi, …ili deni litambulikane, ni nani aliyeweka dole gumba, unasema ni marehemu, mbona sio kweli,…’nikasema


‘Unasema sio kweli, dole gumba ni la nani…?’ akauliza


‘Ndio hapo tunataka kufahamu, kama sio marehemu aliyefika kuchukua huo mkopo, kuweka sahihi yake, je dole gumba la …marehemu lilipatikanaje,…na kiukweli merehemu hakuwa na tabia ya kukopa, hilo hamkuliangalia wakati mnatengeneza hilo deni, je marehemu aliwahi kukoa kabla ya hapo…?’ nikamuuliza


‘Mimi sijui…’akasema.


‘Kiukweli hakuwa na tabia hiyo ya kukopa, ..na hilo unalitambua wewe vyema,..ndio maana ukabuni mkakati huo, ambao uliutambua kama mkakati-moto…ukishirikiana na …’kabla sijamaliza akasema;


‘Kwahiyo …ooh…umelifahamu hilo eeh…mkakati moto, ulikuwa ukichoma dhuluma,..matendo ya watu wabaya, ambayo, …wadhamini wa haki hawakutaka wadhulumaji hao wawajibishwe, je ingefanyika nini…ndio nikabuni mkakat huo mkakati moto nashukuru umeligundua hilo…lakini sio moto wa kuangamiza, bali ulikuwa maoto wa kuugunzua dhuluma..’akasema an kutulia.

‘Sasa tuambie…kama ulikuwa mkakati wa kuangamiza dhuluma kwanini ukawa unaunguza ushahidi…ushahidi ambao ungetumika kuipata haki, ushidi ulioficha ukweli kuhusu hayo madeni…?’ akaulizwa


‘Hayo mimi sijui…hayo unayoyasema, ni hadithi zako…moto kwangu ulikuwa kuunguza dhuluma, na deni lilipwe…kama kupitia mahakama lilishinikana, kama kupitia kwa watendaji,…ilishindikana, haya moto utashindwa…’akawa kama anauliza.


‘Bado hujausema ukweli ndugu majaliwa…mimi najaribu kukubembeleza kwa vile ninafahamu kuwa wewe huna hatia, ila umajitumbukiza kwenye hatia kwasababu fulani,…sasa tuambie tujue…’nikasema


‘Hahaha…mtoto wa majalalani…unatakiwa useme ukweli, ambao hata wewe huufahamu, ukweli gani unahitajika zaidi ya huo niliokwisha kuulizea,… hahahaha, naona sasa wakati umefika, labda, nishushe akili zangu ziendane na nyie, labda mtanielewa, …’akainua uso, na kumuangalia hakim.


‘Muheshimwa hakimu, mimi naona tuyamalize haya mambo, na mengine yote nitayaacha mikononi mwako…ukitaka nifungwe sawa,..ukitaka niu-awe sawa, …mama yangu kafa, nani alijali, haki yake ipo wapi, au mnafikiri hayo niliyoelezea, ambayo aliyaandika yeye, ni ya uwongo…eeh, nani anabisha hapa…’akasema akigeuka huku ana kule..


‘Haya mama mlezi kafa na sababu kubwa ni kuteseka kutokana na ndugu zake, mangi aliyoyapitia sikuweza kuyahadithia haya…hicho ni kisa cha mama mgumba,…nani alimjali, kwa vile hakuwa na ndugu wa kumtetea,..eeh,…haya tumuache huyo,….msamaria mwema kafa, yeye alifahamu mengi, lakini kwanini aliondoka bila kuusema ukweli..je.., mimi nina thamani gani zaidi ya hao watu …’akatulia


‘Sasa , nyie mnataka nisema hata yale nisiyotakiwa kuyasema, ili iweje,..ili nije kubeba lawama nyingine,…niliyosema yalikuwa yanatosha, kutenda haki, na mengine tumuachie mungu mwenyewe,….maana huo ndio ukweli wenyewe..…mengine ni kutafutana lawama tu ndugu zanguni…’akatulia


‘Mama aliteseka jamani hivi nyie hamtaki kuliona hilo,…au kwa vile sio mama yenu…inaniuma sana kuwa hata kulipiza kisasi sitakiw kufanya, …angalau haki basi,…najua huko alipo anayasikia haya, au nadanganya,aau mtu akifa basi haki yake haipo ndio maana watu wa haki za binadamu hawataki mtu akiua yeye asiuwawe, ina maana marehemu yeye hana haki, si ndio hivyo...?’ akaniuliza mimi.


‘Ni kweli, …mama yako huko alipo anakusikia…ndio maana unapata taabu hizi unazozipata, ..ungejtubu makosa yako,  kwa kusema ukweli leo hii ingekuwa ni jambo jingine kabisa…’nikasema

‘Nitubu makosa yangu, umeshaona kuwa mimi nina makosa,..haya haki hiyo nitaitegemea kweli….haya ndio nikikuambia huo ukweli unaoutaka wewe unafikiri itakuwaje, je ukweli huo utafanya haki itendeke, siamini hilo..niambie wewe kama hivi sasa umeshasema nitubu makosa yangu, makosa gani hayo eeh, je haturuhusiwi kulipiza,..kama kweli ulitendwa, ndio kusamahe kupo, sawa, …lakini …hebu niambie mimi nina makosa gani…? ‘ akaniuliza.


‘Bila shaka, hapa ni mahakamani, ukisema yote, mahakama itakuhukumu kwa haki…’nikasema.


‘Nihakikishieni kwa hilo, nikuulize swali je  mama hakudhulumiwa, hakuteswa, na ikawa sababu ya kifo chake,…,’akasema akiniuliza


‘Kwa maelezo yako alidhulumiwa…’nikasema


‘Kwa maelezo yangu eeh…!!  Ina maana hata hayo maelezo yangu huyaamini, unaona ilivyo, mimi nimeshawagundua mlivyo, ndio maana siwezi kuwaamini tena, je umeamini kutokana na maelezo yangu au kutokana na ukweli wenyewe…?’ akauliza


‘Nimeyaamini, kutokana na maelezo yako, kutokana na jinsi ulivyosoma mama alivyoandika, …ndio maana bado nahitajia maelezo zaidi, najua yapo mengi hujataka kuyasema ambayo yalitendeka, baadae sisi kwa hayo ya mama yako tumeshayaweka kwenye kumbukumbu, sasa sisi tunataka yale yaliyotokea baadae, na kuleta deni…’nikasema.


‘Sasa kama mama alidhulumiwa kwa hayo maelezo, haki yake ipo wapi, je alitendewa haki…?’ akauliza sasa akigeuka kumuangalia hakimu, hakimu, alikuwa akimuangalia tu


‘Unaona…’akasema hivyo tu,


‘Ina maana huamini kuwa haki itatendeka..?’ nikamuuliza


‘Haki ya mama..ilitendeka…?’ akauliza


‘Hatujui kwanini haikutendeka, lakini kwa sasa itatendeka, muamini hakimu wako, yeye yupo kwa ajili ya kutenda haki , kwa mujibu wa sheria,….na ndio maana mpaka sasa kakuvumilia, japokuwa muda umekwisha, wewe hujaliona hilo…’nikasema.


‘Tunakuhakikishia haki itatendeka, wewe timiza wajibu wako, ….’aliyesema hilo ni hakimu.


 ‘Lakini kwanini mimi ndiye nisumbuke kwa hilo, hiyo ni kazi ya polisi jamani,  au sio, mimi sijafanya kosa , mimi nilitimiza wajibu wangu wakati nipo kazini,nikiwa nafanya kazi benki niliwajibika ipasavyo,…, na kila kitu kipo wazi, nyaraka si hizo hapo, kaleta huyu mtu, sijui zili..sina uhakika kwakweli kama zilipatikanaje, lakini niamini hivyo, kuwa ndio zenyewe…’akatulia


‘Ndio zenyewe …hazina shaka, nimethibitisha hilo huko benki, na waliokuwa nawe wamethibitisha hilo,…na wewe si umeona sahihi yako, au…?’ nikamuuliza


‘Wewe mtu wa jamii wewe…nilijua tu, mwisho wa yote, tutakutana hapa, unakumbuka nilikuambia nini siku ile tulipokutana hospitalini…?’ akaniuliza


‘Uliniambia na kuniahidi pale uliponiacha hospitalini, kuwa wewe unakuja mahakamani kuusema ukweli, na mimi nikakuamini hivyo, nilijua kweli utakuja kuyakiri yote hayo, uliyowahi kuyafanya,…nilijua kweli wewe ulichanganyikiwa kwasababu ya hayo ambayo sisi tulikuwa hatuyajui…’nikasema


‘Ndio…’akasema hivyo na kutulia


‘Sasa…, .kwa ajili ya dhuluma alizofanyiwa mama yako,..nilijua kwa hilo, utakuja kukiri  na kuelezea kila kitu, …na kesi hii ingelikwisha mapema tu, sasa..ni kwanini ulikuja kubadili nia yako…?’ nikamuuliza


‘Sikubadili nia yangu,…ila nataka nikuulize swali moja, je kauli ya marehemu inapingwa, unaweza ukafanya kinyume na matakwa ya kauli ya marehemu…?’ akaniuliza


‘Yategemea, wakati mwingine marehemu anaweza kuongea kwa vile…kapata taabu, akaongea yasiyostahiki, na ambayo huenda hayatamsaidia, lakini sisi tuliobakia tunaweza kuyapima hayo, aliyoyaagiza,..tukisimamie kwenye haki na ukweli… na kama yanafaa, basi tutayafanya , lakini tukiona hayafai, kwa masilahi yake huko alipo na masilahi ya hawa waliopo hai, tunaweza tusiyafanye, sasa ni yepi hayo ili tuweze kuyapima…’kabla sijamaliza akasema.


‘Marehemu…mdaiwa, ..mimi nitamuta hivyo hata kama nyie hamtaki, yeye alisema kuwa au yeye hana  tabia ya madeni, …si ndio hivyo,.?’ Akaniuliza


‘Ndio hivyo, hata wewe walifahamu hilo…’nikasema


‘Lakini je ni kweli…japokuwa yeye alikuwa akiwashauri watu wasipokope,..je yeye hakuwa na deni..maelezo yangu yote nilielezea madeni ambayo kayabeba yeye, kutokana na dhuluma, na alifahamu kuwa kweli kanunua eneo la dhuluma, na alimtetea, mtu aliyemdhulumu mama yangu kwa pesa zake yeye mwenyewe, …je hilo halijaendana na kinyume na kauli yake…?’ akauliza


‘Wewe umesema hivyo…kuwa anadaiwa kwa vile alitumia pesa zake kuwasaidia wakosaji, lakini je una uhakika kuwa kweli alikuwa akifahamu ukweli kuwa hao wakosaji wapo hivyo,…walidhulumu, walimtesa mama yako, je wewe una uhakika na hilo, kuwa kweli alikuwa akifahamu na akafanya makusudi kwa kutumia pesa yake…?’ nikamuuliza.


‘Niliongea naye nikamuelezea kila kitu, lakini yeye hakutaka kunisikiliza, hakuniamini…akaishia kunikebehi, kwa vile mimi …au mama, ..si chochote kwake…yeye si ana pesa bwana, eti twende mahakamani, kwa vipi tena, waakti mahakama ilishahukumu…jamani, hivi, …hamlioni hilo kama ni dhuluma, mama hana mbele wala nyuma, huyu mwenye pesa, anatumia pesa zake kumdhulumu….haki ipo wapi hapo…’akasema na akawa kama anataka kulia.


Hapo nikasema;


‘Kiukweli hakuwa ana ufahamu huo,..marehemu angelijua hilo, asingelifanya hivyo kwa jinsi alivyokuwa akijulikana, ni kweli..yeye aliwaamini sana ndugu zake, yeye alifanya mambo kutokana na ushahidi ulioletwa mbele yake,…’nikasema.


‘Marehemu yeye aliamini mahakama imetenda haki, na mahakama ilihukumu kutokana na ushahidi,  sasa mimi nakuuliza swali,…je una uhakika kuwa kweli marehemu aliufahamu ukweli wa dhuluma za ndugu yake na bado akatumia pesa zake kumtetea,… nijibu kutoka moyoni mwako…?’ nikamuuliza

 Hapo akakaa kimia, halafu akainua uso, na kusema;


‘Mahakama ilitenda haki, kwa mama, lakini mahakama haijatenda haki kwenye hilo deni, mahakama si ilihukumu kuwa deni hilo ni halali, au….angalieni haya mambo kwa usawa…’akasema


‘Ndio maana baada ya uchunguzi hayo yote yanatakiwa kupitiwa upya, huwa inatokea, najua baada ya haya, kila kitu sasa kikiwa wazi, haki itatendeka…’nikasema


‘Kwahiyo nyie mnataka nifanye nini sasa…?’ akauliza


‘Tueleze ukweli ambao bado wewe hujatuelezea,….’nikasema


‘Ukweli uliobakia,…hauna maana, …’akasema


‘Kwetu una maana sana, maana ndio msingi wa hii kesi…’nikasema


‘Kwahiyo nyie mnataka nimuhini mama yangu, niende kinyume na …mama yangu, hapana,…ndio inaniuma sana, kwanini mama afanyiwe hivyo,…inaniuma sana,.. kwa vile mama alimpenda sana mwanaume aliyemtesa…mama, alinipenda sana mimi…mama, hakutaka nije nipate taabu au yoyote yule kutokana na hayo mateso aliyoyapata yeye, …lakini mimi nifanye nini sasa jamani…’sasa akawa analia.


Ikapita muda, maana jamaa alikuwa analia kweli.


‘Majaliwa, nahisi sasa utajisikia vyema, umelia, na umeondoa hisia moyoni mwako kuwa kweli unampenda mama yako, na umediriki kukifanya hicho mama yako alichotaka ukifanye, lakini je, kitamsaidia mama yako huko alipo, je kwa kuuficha ukweli huo, utatenda haki…?’ nikamuuliza


‘Mimi sijui…’akasema


‘Tutakusaidia kwa hilo…mama yako huko alipo yupo mbele ya haki, ambapo, haki haifichwi,…ukweli na matendo mema au mabaya hayafichwi huko, yupo hakimu anayejua kila tendo,..hebu tuambie ni kwanini hutaki kuusema ukweli uliobakia, ili haki itendeke hapa duniani na kesho ahera iwe ni sababu ya mama yako kusterehe…’nikasema


‘Mama yangu hana dhambi, na aliwapenda wote hata wale waliomtendea mabaya, kuna hao  waliomkata mama ulimi wake, na …bati lenye kutu, likampa tetenasi, ikaja kuwa kansa, akafa kwa mateso, aliwapenda wote, hao na hakutaka walippizwe kwanini…mimi hapo ndio….sijui kama ‘hapa akatulia , nahisi kuna kitu alitaka kukisema lakini akakitanisha.


Hakimu akawa anataka kuongea jambo…mimi nikaonyesha ishara ya kuomba muda zaidi.


‘Nia yangu ilikuwa kufanikisha kile nilichokipanga, ili huo ukweli nilioulezea uje kufahamika hapa mahakamani…na ili ikiwezekana haki ije kutendeke, na kama haki haitatendeka hapa, sijui itakuwaje, sasa kama mnataka nikaidi kauli ya marehemu, mimi sijui..unajua jamani mimi sikuwahi kumtambua mama yangu, mama alifariki nikiwa sijamjua vyema,..sasa mimi nampenda sana mama yangu, sitaki niende kinyume na yeye…’akasema.



‘Ina maana wewe hutaki roho ya mama yako itulie vyema huko alipo,…?’ nikauliza


‘Kwanini roho yake isitulie…?’ akauliza


‘Unakumbuka,…, mama yako hakukuagiza ulipize kisasi, mama yako hakutaka uje kudhulumu mtu, au watu wengine kwa madeni, je hilo hakuandika mama yako kwenye shajara yake..je hujayafanya hayo, je kwa kufanya hayo, unatarajia nini, mama yako atakuwa anaumia,, sasa sisi tunakushauri ndugu yetu kwa masilahi ya mama yako, sema huo ukweli ili haya mambo yaishe …’nikasema


‘Roho ya mama yangu ipo peponi, haya yanayotokea sasa, si yake, na wala mimi sijafanya kosa kwa hilo, ila najaribu kuitafuta haki ya mama, pia, najaribu kurejesha haki  zangu, haki alizoniachia mama mlezi…’akasema


‘Ni kweli, kwa mateso  aliyoyapitia mama yako…, haina shaka, yupo peponi,  lakini hakupenda ufanye uliyoyafanya, hebu kumbuka, ulisema nini awali…, kwenye hilo dafutari la mama yako, mama yako alikupa tahadhari, ipi… usije kufanya kufuru…usije kufanya mabaya, ni kweli si kweli…?’ nikamuuliza

‘Ni kweli…’akasema

‘Je umemtii mama yako…?’ nikamuuliza


Jamaa akanywea,…akawa kainamisha kichwa chini, baadae akainua kichwa , sasa akiwa kama anahema kwa nguvu, na kusema kwa sauti nzito..;


‘Nawauliza tena, je tunaruhusiwa kukaidi kauli ya marehemu…nakuuliza na wewe muheshimiwa hakimu, nataka hili liwe mikonono mwako wewe unayetimiza haki kwa uadilufu…?’ akauliza

Hakimu akawa kimia, baadae hakimu akasema;


‘Ukweli hauweze kufichwa, na ukweli ndio utamsaidia marehemu, kama marehemu alisema neno..kwa nia ya kuficha ubaya, …ubaya huo utamuandama huko alipo, lakini kama kauli yake ni njema..basi haina shaka, hatakuwa na lawama, na sisi wajibu wetu ni kuhukumu kwa haki,....sasa je hayo unayoogopa kuyasema yatamsaidia mama yako huko alipo…?’ akaulizwa

*********


‘Sikilizeni sasa niwaambiae   mama alimpenda sana baba, hata baada ya yote hayo, aliyotendewa, kwenye hiyo zawadi, yeye aliandika,…. na hilo nilikuja kulisoma siku ile nilipotoka kule hospitalini, nilipoahidi kuja kuyasema yote haya…jiulize ni kwanini nikaja kuisoma hiyo sehemu…’akasema


‘Yaani ilikuwa ni bahati, tu ….nikapitia sehemu hiyo…’akatulia


‘Mama yako aliandika nini…?’ nikamuuliza


‘Mama aliandika maneno mazito sana…yamenipa shida sana…yeye alindika hivi, sio kwa kunukuu, ila naelezea kwa uelewa wangu, … kuwa kwa vyovyote iwavyo, nisije kumdhuru huyo mwanaume aliyemtenda..,


‘Ukiwa na maana baba yako au sio…?’ nikauliza


‘Kwa vile yeye alimpenda sana, na akaigiza kuwa nikijaliwa nije  kumsaidia, kwa kadri nitakavyoweza, na vyovyote iwavyo, nisije kulipiza kisasi dhidi yake.., sasa nyie mnataka nifanye nini…’akasema kwa sauti ya ukali hapo, bila kujibu swali langu.


Mahakama ikawa kimia…


‘Unajua hayo yataendelea hivyo hivyo, na hatutaweza kufika mwisho, ..ni sawa mama yako aliandika hivyo, lakini kuna haki hapa inatakiwa kutendwa, na…licha ya kuwa tuna ushahidi hapa,..na ushahidi huo kwa hivi sasa unaonyesha kuwa wewe uliwajibika kutengeneza hilo deni, sijui unanielewa hapo…’nikasema.


‘Mimi sijatengeneza deni, kwa ushahidi huo,… utatengenezaje deni wakati wewe unadai pesa nyingi zaidi ya hilo deni, na je kipi kinakosekana kwenye ukamlifu wa hilo deni…’akasema.


‘Hayo yatakuja kufahamika..lakini sisi tunataka utuelezee ukweli ulivyo kuwa kwenye kutokea hilo deni, maana wewe ulihusika huwezi kulikwepa hilo…wewe unalijua hilo deni, chanzo chake na nani walihusika, kama sio wewe …tuambie tumalize hii,kesi, isiahirishwe kabla hujalifichua hilo…’nikasema


Jamaa akageuka kumuangalia hakimu, kwa taratibu akasema;



‘Haya, muheshimiwa hakimu…nitasema …ni hivi, aliyeweka sahihi  kwa mkono wake kuthibitisha hilo deni,  na aliyefanikisha kupatikana kwa dole gumba la marehemu,ni…ni…..DA-LALI…..’akasema


‘Dalali…baba yako…?’ nikauliza


‘Ndi-ndi-o….’jamaa akasema sasa kwa kigugumizi,…


‘Kwa vipi sasa tuelezee…’nikasema


‘Si-ooh, …’ na kabla hajamaliza kule mlangoni kukatokea vurugu, akageuka kuuangalia kule mlangoni, sijui alimuona nani,…maana pale tuliona hali ikimbadilika, jamaa huyu hakuweza kusimama tena, alikuwa kama kaona kitu cha kumtisha hivi..hata nilipogeuka kuangalia kule sikuona mtu, zaidi ya watu wakisukumana kama ilivyokuwa wakati naingia mimi,…na nilishtuka hakimu akisema

‘Vipi imekuwaje…?’ akauliza hakimu, na kwa vile nilikuwa nimeangalia kule mbele, sikuweza kuona kilichotokea kwa jamaa yetu, huku, nilisikia ..puuuh…

Jamaa kadondoka,…


‘Ni..nini…’nikasema na sauti ya hakimu ikawa imezidia sauti yangu,…


‘Askari kuna nini huko, ..na muangalieni huyo…muiteni dakitari na huyu ni nani tane…’


Ilikuwa ni, kigari cha kukukota cha kubeba mgonjwa kilikuwa kinaingia na jamaa mmoja kakaa kwenye hicho kigari,


Muda wa mahakama ulishaisha……



NB: Kwa hapa ndio kisa kiliishia, lakini kuna hitimisho, je ilitokeaje,..je kweli Dalali alifanya hivyo, tuwe pamoja kwenye hitimisho.


WAZO LA LEO: Ukweli unatesa, ukweli wenye kuficha dhuluma ni donda linatekenya, mtu kuuficha ni shida,…itafika sehemu kama jipu, litapasuka tu.

Ni mimi: emu-three