Hii ni blog maalum kwa kumbukumbu za kimaisha (diaries), ikiwemo visa , matukio, mijadala na yale yote unayopenda kuwemo humu. Wewe ukiwa mdau muhimu, unaweza kuchangia na wenzako kwa kutoa hoja (comments). Pia unaweza kutoa maneno ya hekima, utaalamu, au dukuduku lako (kilio chako)kwa jamii ili kuweza kukidhi mahitajio yetu. SOMA , CHANGIA, NA TOA kisa chako, au lolote lenye mafunzo ili tuliweke hewani.

TUPO PAMOJA DAIMA

Tushirikiane ,tupendane, tusaidiane, tutafika tu

Kwa visa motomoto tunapatikana pia kwenye mitandao ya kijamii ya: Facebook, na Twitter, bofya hapa upate visa zaidi;

https://www.facebook.com/emu.three, na kwa ajili ya kuitangaza hii blog, ingia hapa:

https://www.facebook.com/diaryyangu/likes

`u-like' na pia unaweza kutwitter hapa;

https://twitter.com/emuthree



Saturday, March 25, 2017

KITANDA HAKIZAI HARAMU-27



Hebu fikiria, mume ni askari, kaenda kwenye kazi za kivita za kimataifa , huko alikaa miaka mitatu....huko kakutana na majaribu mengi tu, akiwa huko alijua kuwa yeye ana mke nyumbani na anamapenda sana, kwahiyo alijitahidi kulinda miiko ya ndoa yake!

Miaka mitatu ikapita, kwa shida, ...maana vita ni vita, na ukiondoka salama huko unamshukuru mungu, sasa anarudi nyumbani, na anapokelewa na mkewe, mara mkewe anamuonyesha mtoto wa miezi minne, anasema;

'Mume wangu huyu ni mtoto wako...' huamini, huelewi, siku zinakwenda unajaribu kuutafuta ukweli, mke hataki kukuambia yeye anakuambia huyu ni mtoto wako, humuoni mnafanana naye,...unashindwa kuelewa maana mtoto hafanani nawe tu, pia anafanana na ndugu yao dereva, pia anafanana na baba yako...mengi yanapita hapo...mara mtoto ni wa baba yako, mara mtoto ni wa dereva...

Aikili inakuchanganya...huwezi kukosana na baba yako, lakini nahisi kuwa huenda huyo mtoto ni wa dereva, ila huna ushahidi, dereva mwenyewe ni tapeli, ni muongo...lakini una ushahidi gani...imefikia hatua sasa mke anakuambia, niambie ukweli, mtoto ni wa ko au sio wako, na ukitoa jibu mimi nitajua cha kufanya, ila mimi mtoto huyu ni wangu...

Tuendelee na kisa chetu…

                                                             *******************

 ‘Kwanza niwaombe radhi, au niseme msamaha kwa kuwaingilia kwenye mambo yenu ya kifamilia, mungu ni mwema, mwenye rehema,..anaweza kukuongoza kwenda sehemu usiyotegemea, mpaka ukajiuliza huku nafuata nini, lakini kumbe anakuelekeza  kwenye maombi yako…sikujua kama itakuwa hivi kabisa kabisa,…’akaanza kusema huyo mdada.

‘Wengi nilipokuwa napita njiani wamekuwa wakiniangalia mpaka najisikia vibaya, nahisi kama nisingelijifunika hivi, wangeniangalia zaidi na hivyo, na huenda ningelijisikia vibaya zaidi , maana sisi wanadamu, hisi zetu ni karibu sana, na zinaweza kutusukuma na kutenda jambo lisilo la kawaida, wengine wanafikia hadi kujiua,…ni hatari…’akasema

‘Siwezi kuamini kuwa leo nipo hai, lakini mungu ni mwingi wa rehema, na jamani ukiamuka asubuhi na ukaweza kupumua mshukuru sana mungu, wako, mkiwa na amani kwenye nchi yenu, hakuna vita,  mshukuruni sana mungu, japokuwa huenda miyoni, huenda maisha mnapigana vita na ugumu wa maisha, hali ngumu, ambavyo ungeliweza kuviweka wazi ingelikuwa ni vita ya aina nyingine, lakini ogopeni vita hii ya waza….’akatulia

Kabla sijajieleza mimi ni nani, maana katika haya kila ninapopata nafasi nageuka kuwa mtoa ushauri, hotuba, mawaida, mahubiri..si ndio hivyo, nimeona nifanye hivyo maana mimi ni miongoni mwa waathirika wa machafuko ya vita….

Nianze kwa kujibu hisia za mzee wetu hapo , baba yetu , unaumwa na mtu akiumwa kitu kikubwa zaidi ni maombo, kukirimiwa, kuonewa huruma, haya tunayoyafanya hapa basi yaendane na huruma tusije tukavuka mipaka tukamuathiri mgonjwa, tufanye yale yatakayompa faraja, ili aweze kupambana na hayo maradhi…maradhi ni vita, ni mtihani….’akatikisa kichwa

‘Mimi ni nesi, na katika ghasia hizo zinazoendelea huko kwetu, nimepata bahati ya kuwa mmoja wa manesi wanaosadia mejeruhi…ni kazi ya hatari sana, na nimpeponea chupu chupu mara tatu,..na hii ya tatu ndio iliyonifikisha huku, na hiyo ya tatu,..nilijua ni njia ya kwenda ahera…

‘Baba samahani kwa hayo niliyokusababishia mimi, maana nimesikia ukisema umepata mabaya , kutokana na mimi na sasa umeshampata mbaya wako ambaye ndio sababu ya matatizo yako, mimi sijui ni kwanini hayo yaliyotokea yafanye mpaka ufikie hapo kitandani,..kwakweli mimi sijui….labda nitakuja kupata maelezo baadae, ila ninachotaka kuelezea ni jinsi ilivyotokea ikawa hivyo…

Nilifanya hivyo kwa minajili ya kukiokoa hicho kiumbe kisicho na hatia,…kama nilivyosema mimi ni nesi, na moja ya kazi zetu ni kuwahudumia wagonjwa, …na kuangalia mazingira bora ya watu, kutoa nasaha, na matibabu kwa maelekezo ya dakitari…na wateja wetu wakubwa ni  wagonjwa, na mimi licha ya kuwa baadae ilibidi niwahudimie watu wote, lakini mimi hasa hasa nimesomea unesi wa watoto..na huyo mtoto alihitajia mazingira bora, kuliko huko alipokuwepo mwanzoni.

‘Wengi wetu mnasikia mtoto katupwa, mtoto kaokotwa,, wengine hawaamini kama kweli mzazi, mwanamke, anaweza kufanya vitu kama hivyo,…lakini ndivyo ilivyotokea kwa mtoto huyo, je mzee ningelimuacha huyo mtoto huko alipokuwa ukasikia, kadhurika ukakutana na mimi ungelinielwaje, na labda ndio ugundue kuwa ni damu yenu..hebu niambie mzee ungelijisikiaje,..maana utasema kwanini sikufanya nilichokifanya, na ndio maana nimefanya hivyo, au mfano ningeamua kuondoka naye huko kwetu kwenye vurugu, au kambi ya wakimbizi, ukaja kugundua kuwa ni damu yenu, ungalijisikiaje,..jamani msifikiri kambi za wakimbizi kuna raha, hakuna raha huko, huko ni mateso,..ni kifungo cha aina yake…

************

Siku kadhaa nyuma, nilifika eneo nikasikia mtoto analia, na hapo hapo nikakumbuka, moja ya kazi yangu, sikusita… haraka nikamuendea yule mtoto na kumbemba, nilimuonea huruma sana, maana ni mtoto mnzuri mwenye afya, nikajua huyu anastahiki kufika kwa wazazi wake stahiki…, nifanye juu chini afike kwa mzazi wake..na ndivyo nilivyofanya…’akageuka kumuangalia dereva, halafu Soldier. Kama vile anatafuta ni nani baba yake, Soldier alikuwa kamkazia macho tu, Dereva akatabasamu kidogo na kuangalia chini

Wanaume nyie mnajua kutunga mimba tu, mnaona raha, lakini mfahamu wanawake wanapata matatizo makubwa, kubeba mimba, ile adhabu ya miezi tisa, nyie mnaijua nyie…mtasema mnaijua lakini hamuweze kuelezea ile hisia, mateso, anayejua hayo ni mzazi peke yake…

Na bado hujafika kwenye tundu la …kaburi, maana muda wa kujifungua ni kucheza na umauti, wengine wanapitia kipindi kigumu sana, hilo hamlielewi, ndio maana hamtuonei huruma, mimi kama nesi nimeyaona hayo sana, na kama mzazi nimepitia kipindi kigumu, siwezi hata kuelezea

‘Kwahiyo nilipokiona kile kiumbe kinalia,…mlio ule kwa mzazi wa kike anajua mtoto analilia nini, mlio kama ule kwa mzazi unagusa hisia za ndani za machungu ya uzazi, nani kama mama, hebu niambieni,…kwa mzazi hasa ni lazima huruma itakushika hata uwe na roho mbaya gani, sasa ni kwanini inafikia mzazi wa kike anaamua kuwa mnyama, anaamua kumtupa mtoto wake aliyemzaa kwa shida, kutoka mimba hadi uzazi..sababu kubwa ni nyie wanaume..na mzigo huu mtaubeba nyie, ndio maana sikusita kulifanya hilo..kuufikisha huo mzigo kwa walengwa…

‘Baba ni kweli mtoto yule anafanana na wewe, ..na awali nilipomfikisha kwa huyo anaitwa….dereva, nilijua nimefikisha kwa mwenyewe, na sikuwa na shaka hiyo..lakini baadaye akaanza kunipa mipango yake, kuwa..nifanye hivyo nilivyofanya, sikuona ni shida kwangu, nilichotaka hicho kiumbe kifike kwa walengwa..wasiwasi wangu ukawa je ni kweli huyo mtu niliyeambia kweli ni damu ya huyo mtoto..

 Pale hotelini nilisubiria sana, nilikiliwazia hilo…, huku moyoni nateseka, je kama sio yeye, je kama huyo mtu aliyenielekeza nifanye hivyo ana nia mbaya tu, na wakati nilimuona yeye ndiye mtu sahihi, ..yeye ndiye baba wa mtoto, hebu iangalieni sura ya huyo mtoto, na huyo dereva , kiukweli nilipomuona huyo dereva nikajua huyo mtoto ni wa kwake, na ndiye anayestahiki kuubeba huo mzigo..nilitamani hata nimshitakie.

‘Baba nimehangaika sana na huyo mtoto…siku nzima nazunguka huku na kule na kipindi kama hicho na maeneo kama hayo, na hali kama hiyo hakuna aliyejali, …nashangaa hata mtoto alipopatikana ametupwa, wengi walisikitika mara moja, lakini ni nani alihangaika kuona huyo mtoto ataishije, atafikaje kwa wazazi wake, hakuna,maana hao watu wa pale wametoka kwenye shida, wametoka sehemu wanaruka maiti, wanaruka, hata kukanyaga watu walioumia wakiwa wanaomba msaada, wengine wapo mahututi..lakini hakuna cha kujali, kila mtu anakimbiza roho yake…

‘Nikuambie kitu huyu mtoto anafanana na watu ninaowafahamu…’akaniambia huyo dereva alipomuangalia huyo mtoto vizuri.

‘Lakini mbona anafanana na wewe…’nikamwambia

‘Mimi nafanana na hao watu pia, kuna mzee mmoja, …namfahamu tena bahati nzuri yupo hapa,..huyo nina imani kuwa ndiye anajua au anahusika na huyo mtoto..’akasema

‘Ni kweli kuna mdada mmoja..anaishi huko, nimuelezea huyu ….’akasema jamaa mmoja niliyekuja naye hapo.

‘Huyo mdada anaitwaje…?’ akauliza na huyo jamaa akasema alisikia akiitwa kwa jina hilo la shemeji.

‘Unasema anaitwa nani…?’ akauliza mara ya pili.

‘Nikamtajia jina, na kuna watu wengine niliokuja nao, wakathibitisha hilo, ni kweli huyo mdada alikuwepo, akiwa na mtoto maeneo ya uraiani, karibu na kambi, baadaye akaonekana hana mtoto, ….kwahiyo moja kwa moja ikajulikana kuwa mtoto huyo alitupwa na huyo mdada, saa ni nini kifanyike, hilo jukumu niliachiwa mimi niliyemuokota huyo mtoto.

Siku ya kwanza, ya pili ndio nikapata mwanya wa kufika kwenye hicho kituo ch akuwahudumia wakimbizi, sikuweza kufika siku ile ya kwanza maana kulikuwa ghasia watu wanagombea huduma, nk…na hata hapo kituoni hakukuwa na watu , kulikuwa na vikao, na shughuli nyingi tu

 Siku ya pili yake ndio nikafika hapo kituoni...nafungua mlango nakutana na hiyo sura, nilipomuona tu,…sijui, lakini…ilibidi nisimame nimeshikwa na butwaa, nahisi hata yeye mwenyewe alishangaa, kwanza nikaamua kumkagua mtoto tena na tena unajua kufanana,…huyu dereva na huyo mtoto ni kila kitu.

‘Unauua kabla ya siku hiyo, nilikuwa nazunguka na huyo mtoto nikiwauliza watu, ni nani alimuona mdada au m-mama mwenye mimba, aaliyezaa hivi karibuni…niligangaika huku na kule, na ndipo nikakutana na watu wakaniambia kuhusu huyo mdada..

‘Mdada gani…?’ akauliza mama

‘Huyo mdada walisema alifika hapo akiwa na mtoto mchanga, akawa anaishi kwa mama yake, lakini baadae mama yake akaondoka, akabakia yeye na mtoto, na baadae huyo mdada akaonekana akiwa hana mtoto,….’akasema.

‘Sasa huyo mdada yupo wapi..?’ nikawauliza na wao wakanielekeza, nilipofika hapo nikaambiwa huyo mdada alishaondoka hayupo tena eneo hilo, na nikawauliza wenyeji waliokuwepo wapo je huyo mdada kweli alikuwa na mtoto mchanga, wakasema ndio..nikajua ehee, ni kweli..

Basi kesho yake ndio nikafika hapo ofisini, na mara kuangalia bosi wa hapo, ohh…anafanana na mtoto, oooh, nikajua sasa nimeshampata muhusika , huyo ndiye baba wa huyo mtoto hakuna kukataa, nikashukuru mungu, na bila ajizi mimi nikamwambia;

‘Nimekuletea mtoto wako..’nikamwambia, akashikwa na mshtuko, na kuniangalia kwa wasiwasi

‘Mtoto wangu!!!’ akasema kwa mshangao

‘Ndio huyu hapa, huoni mnafanana na yeye…’nikamwambia na yeye akamchunguza huyo mtoto akawa kama anashangaa, uso unaonyesha kabisa kushangaa, halafu akaniangalia na kuniuliza;

‘Huyu mtoto ni wako…?’ akaniuliza na mimi nikamwambia

‘Ndio,… umesahau eeh, najua umesahau, maana unatembea na wanawake wengi, sasa huyu ni mtoto wako nakuachia…’nikamwambia

‘Sikiliza wewe mdada, mimi sina mtoto, na sijawahi kutembea na mwanamke yoyote hapa, mimi ni mgeni, nimefika hapa kituoni sina hata zaidi ya mwezi , je mwezi mmoja ningeliweza kumpa mwanamke uja uzito, na kuzaa….’akasema

‘Usijetete, ina maana mimi hunifahamu..?’ nikamuuliza

‘Kiukweli mimi sikujui, kwani wewe ndiye mama wa huyo mtoto..?’ akaniuliza

‘Huyo mtoto tumemuokota na aliyemtupa hatujamuona, lakini wewe unafanana na huyo mtoto, hebu angalieni jamani…’nikasema nikiwaonyesha watu waliokuwepo hapo, na kila mtu akasema kweli.

‘Sikilizeni niwaulize nyie watu mliwahi kuniona maeneo haya kabla?’ akawauliza na wengi wao wakasema hawajawahi kumuona, na akajitetea sana,..baadae mtu mmoja akamuuliza

‘Kuna mdada mmoja alikuwa anaishi maeneo nje ya kambi alikuja na mtoto sasa hayupo, na niliwahi kusikia wakimtaja kwa jina hilo…’akalitaja hilo jina

‘Wanatokea wapi..?’ akauliza

‘Nilisikia wanatokea nchi ya jirani …’akasema

Basi akasema tusubiri akachukua simu akapiga kwa watu mbali mbali baadae akasema;

‘Nimeshawapata wazazi wa huyo mtoto, na bahati nzuri muhusika mkuu mwenyewew yupo hapa nchini, ni bahati sana, sasa sikiliza, nyie wengine ondokeni, mimi nitabakia na huyo mdada, nitamfahamisha cha kufanya..

‘Kiukweli, mimi huyu mtoto sio wangu, ila kuna watu ambao nafanana nao, nimeambiwa kuwa ndio wenye huyu mtoto, mimi nitasaidia mpaka umfikishe kwa wenyewe..’akasema

Hapo mimi nikashukuru mungu, nilijua ni mbinu za huyu jamaa nia yake ni ili watu wasijue kuwa yeye ndiye aliyembebesha msichana wa watu labda akamtelekeza, hakujua kuwa damu yake itamfuatili hadi hapo. Niliwazia hivyo kuw labda anafanya hivyo kwa vile yeye yupo kwenye sehemu ya kuhudumia watu, na kufanya jambo kama hilo inaweza kumchafulia hadhi yake, kuwa hafai kazi kaam hiyo..

‘Ndio akanielekeza jinsi gani ya kufanya,…na ndivyo nilivyofanya…

Sasa mzee siku ile ulipofika pale nikakuangalia, nikajua kweli huenda anayosema huyo mkaka, ni kweli,..na ni kweli mzee mnafanana sana na huyo mtoto hata uzeeni kwako huwezi kuficha sura yako na huyo mtoto.,…lakini akili yangu haikukubali, nilijua huyo dereva ni mtoto wako na huenda nyote mna mbinu moja, ya kuificha hiyo kashfa,..mimi nikaona nikubaliane na hilo wazo lake.

Kwahiyo kwangu mimi nilijua yeye ndiye baba wa mtoto…mtoto anafanana na yeye mengine hayo anayofanya eti nimpeleke mtoto kule kwenye hoteli kuna jamaa atakuja, basi hapo nimuachie yeye, niliona labda ni mbinu zake tu za kujipatia pesa, au kulinda hadhi yake ya kazi, mimi sikujali,…

Kwangu mimi mpaka hapo nikawa nimepumua, kuwa angalau sasa mtoto kafika kwa baba yake, na mimi nitaweza kuendelea na kazi zangu..sikuwa na kazi lakini nisingeliweza kupata kazi hasa kazi yangu, nikiwa na mtoto au sio, ningemuachia nani na mimi nipo kambini, na kiukweli nilikuwa sina mbele wala nyuma…na kutokana na matatizo niliyokutana nayo sikupenda kujionyesha kwa watu..

Hata hivyo akili yangu haikutulia,…nilitaka kuwa na uhakika kuwa kweli mtoto huyo amefika mahali salama, na ni wapi, hapo akili ikanicheza. Kabla hata sijafika kwenye hiyo hoteli, alipofikia huyo mzee, nikamuelezea huyo dereva kuwa mimi nina ndugu yangu yeye kasomea uyaya, kwahiyo huyo mtoto kama atakuwa kafika kwa wazazi wake, basi huyo mdada anaweza kusaidia, hasa kutoka hapo hotelini hadi huko, na kama wataona hafai yeye atarejea huku.

Kwa haraka huyo dereva akakubali, na hapo nikawa na uhakika kuwa huyo jamaa ndio baba wa mtoto,,,,kwanini akubali harakaharaka hivyo, na cha achabu,akasema anataka atafute na nauli ya huyo yaya, ili isimpe shida huyo muhusika ambaye nitamfikisha huyo mtoto, kwahiyo kwa muda huo akawa anawasiliana na watu anaowafahamu wa huko kituoa cha ndege, na tiketi zikawa hazina shida.

Na mimi kwa haraka nikafika kwa ndugu yangu nikamuelezea kuwa kuna kazi imepatikana kwahiyo ajiandae kwa haraka,.. na yeye bila shida akakubali, maana kuondoka  hapo kambini ni furaha, na anaenda kufanya kazi , na tena anakwenda kufanya kazi nchi yenye amani, nchi ambayo hata yeye alikuwa akitamani kwenda kuishi.

Hayo yakafanyika vizuri tu, na mtoto akafikishwa kwa walengwa, na mimi huko kambini , nikapumua, japokuwa akilini nilikuwa sina amani,……sikuwa na amani kabisa..’akatulia

Hakuna kipindi nilichoteseka kama kipindi hicho, …ilifikia sehemu nachanganyikiwa, kuna muda nasikia mtoto akilia kichwani mwangu, mama, mama..mbona unaniacha…kwakweli nilipata taabu sana, na baadae ndugu yangu ananipigia simu na kuniambia taarifa ya ajabu kabisa,..kwakweli sikuweza kuvumilia, nikaanza kufauta nauli,….kuja huku…

‘ Sasa kwanini usiwe na amani, wakati mtoto keshafikishwa kwa wenyewe…?’ akauliza mama

‘Mama, hivi kweli kuna mzazi anaweza kumuacha mtoto wake kwa watu baki..sawa mtoto kafikiswa kwa watu ambao unajua ni damu yao, lakini je mtoto wa hali hiyo, anaweza kuishi salama mbali na mama yake , na mtoto huyo ni mchanga,..hivi kweli mzazi, mama, anaweze kutuliza akili yake…?’ akauliza

‘Kiukweli hakuna, lakini mbona hatukuelewi….?’akasema mama

‘Mama mimi..nimelifikiria sana hili na nikafikia uamuzi, siwezi tena kuendelea na mpango huo, nimeamua kuifichua siri,…mama mimi ndiye mama halisi wa mtoto huyo….’akasema na kuanza kufungua uso wake na kubakia wazi, na watu wakabakia mdomo wazi.

‘Wewe….’aliyesema hivyo alikuwa dereva

‘Haiwezekani…’akasema Soldier

‘Unafanya nini sasa…’alisema Shemeji akimkodolea macho huyo mdada


‘Dada….mbona unaharibu tena…’akasema Yaya

NB: Oh..., hapa hata mimi nachanganyikiwa ngoja kwanza niishie hapa...

WAZO LA LEO: Mzazi uliyebahatika kuwa na mtoto, ukazaa kwa shida, ukaibeba mimba miezi tisa iweje sasa unakitupa kiumbe cha mwenyezimungu, unakitesa,..unakitelekeza, Ewe mwanaume uliyembebesha mwenzako mimba kwanini sasa unakimbia majuku yako,…Nyote wawili mjue, nyie ni njia tu, mwenyezimungu aliamua kukileta kiumbe chako kupitia kwenu, sasa kwanini mnakana mwenyezimungu, mnakana maagizo ya muumba wako. Kama yamekukuta matatizo, usikate tamaa, mlee huyo mtoto na mola wako atakubariki, atakujalia, na huenda huyo mtoto ikawa ndio sababu ya mafanikio, hapa duniani na kesho Akhera.
Ni mimi: emu-three

Friday, March 24, 2017

KITANDA HAKIZAI HARAMU-26


‘Jamani naona mimi nianze  kuongea…..’aliyesema sasa alikuwa mke wa Soldier. Soldier hakutarajia kuwa mkewe ataanza kuongea, yeye alitaka aupate ukweli kupitia kwa watu wengine…

‘Maana kama nilimuuliza mara kadhaa akanificha, sasa kwanini nisumbuke naye…’akilini alikuwa akiwaza hivyo.

‘Nitaupata huo ukweli hata kama hutaniambia wewe…’aliwahi kumwambia mkewe hivyo, sasa mkewe huyu hapa anataka kuusema ukweli mbele ya watu, je ukweli huo hautamuathiri baba yake,…ngoja ausikie, hapa akajikuta akimkazia macho mkewe, lakini cha ajabu mkewe alikuwa anatizama upande upande kama anamkwepe kumuangalia mumewe usoni.

Tuendelee na kisa chetu…

‘Wazazi wangu, na ndugu na jamaa zangu (hakumtaja mumewe)….naongea hili kutoka undani wa moyo wangu…’akaanza kuongea. Na alipoanza kuongea hivyo, baba mkwe alijishusha kitandani na kujilaza, maana muda wote huo alikuwa amekaa, baada ya kuweza kujiinua kwa miujiza na kitendo kile kiliwafanya waliokuwepo humo ndani kugeuka kumuangalia mzee..kama kazidiwa nini.., na Soldier akamuuliza baba kwa ishara kuwa yupo ok, baba yake akaonyesha dole gumba kuwa yupo ok..

‘Najinyosha kidogo tu…’akasema na huku mkewe akiendelea kuongea;

‘Mimi nilimpenda sana mume wangu, na nilijitahidi sana kuwa mke mwema, na niliahidi nitafanya hivyo kwa kadri mola alivyotujalia uhai wetu, ilimradi tupo kwenye ndoa, na mungu alisaidia kwa imani hiyo, kwani kiukweli nimepitia majaribu mengi …’akatulia.

‘Mume wangu alipoondoka, walinijia watu wengi tu, wakiniambia hili na lile, na wengine wakaja kunisingizia kuwa mume wangu huko alipo ana mke mwingine, hapo nilikuwa sijapata taarifa nyingine iliyonivunja nguvu kabisa, japokuwa nilijitahidi nisiiamini…’akatulia

‘Mimi….?’ Akauliza Soldier akishika kifua, Soldier akatabasamu kwa dharau, na shemeji mtu ndio akacheka kabisa.

‘Lakini mimi sikuwahi kukubaliana na hayo maneno, na hayo maneno yalivuka yakaenda hadi kwenye familia yangu, na familia yangu iliniita na kuniuliza kama nina habari kama hiyo, kiukweli niliwakatalia, lakini bado walinisisitizia kuwa niwe makini, kwani hao wanaoongea hivyo wanatokea nchi ya jirani.

‘Haya yalienda , mpaka ikaja hiyo ya baba, baba mkwe, akawa analewa, nilijua ni sababu labda za ndoa yake, lakini mimi nilijitahidi sana kumuheshimu baba, kama ninavyomuheshimu baba yangu mzazi, hadi pale alipoanza kikiuka mpaka,…alikuwa analewa kupita kiasi mpaka anakuja kutaka kulala chumbani kwangu.

‘Oh…’ulikuwa mguno wa Soldier

‘Mwanzoni nilijua ni pombe tu, lakini ..aah, sikuweza kuvumilia, na siku moja ndio nikasema basi ngoja niondoke tu….alikuja na kuanza kuongea akiwa kalewa, anaongea kuwa amesikia mtoto wake amekufa…sasa kama mtoto amekufa, na mke kamkimbia, kwanini mimi nisiwe mke wake,…’akatulia

‘Sikupenda kuyaongea haya mambo, maana yalikuwa ni maneno ya kilevi, nayaongea kwasababu ya haya yanayojitokeza, na inavyoonekana nisipoongea, naweza kuonekana mimi ni mkorofi,sina adabu…matendo hayo ya kilevi, samahani natumia kauli hiyo baba, yalijirudia tena na tena, mpka kwangu ikawa ni shida,…uvumilivu ukanishinda,  ndio nikaamua kuondoka…’akatulia.

‘Umemaliza…?’ akaulizwa na mama mkwe

‘Kwa upande huo nimemaliza, labda huko nilipoelekea kulitokea nini, maana naona kuna mengi nimehusishwa nayo hata sijui ilikujaje…’akasema

‘Je katika huko kulewa kwa baba mkwe wako, ..je aliwahi kukushurutisha kufanya lolote, na je ilitokea akakushika kwa nguvu na tendo likafanyika..?’ akaulizwa

‘Mama haikuwahi kutokea hivyo maana nilishafahamu kuwa sio akili yake, na nisipokuwa makini yanaweza kutokea mabaya, kwahiyo nilijitahidi kuwa mbali naye kadri ilivyowezekana,  kero zilipozidi,nikaona njia nzuri ni kuondoka, na nahisi kama ningeendelea kubakia humo, huenda ningezidiwa nguvu,,…kuna siku niliamua nimpige hata chupa,…nasema haya kutoka ndani ya moyo wangu,..’akasema

‘Hebu angalieni, unamvumilia mtu kama baba yako na bado anakukera, unafanya yale hata yasiyofa, maana ukilewa unaweza kupitiwa na haja, mimi ilibidi niifanye hiyo kazi,..na bado anakukasirikia, kuwa simjali nk…unajua ilifikia muda ananifokea kama mkewe, ila heshima ya ukwe ikawa haipo…’akasema

‘Nilivumilia nikimuona yeye ni baba yangu , nilivumilia kwasababu ya mama, kwani mama aliniambia anaondoka, lakini nimsaidie mume wake, kwani anajua hayo yanampitia ni shetani tu,,lkn ili mume wake aweze kujitambua ni lazima yeye achukue hatua, mimi..nilitii sana kauli ya mama, zaidi ya kauli hiyo, kuwa huyo ni sawa na baba yangu…maana kama yeye angejitambua kuwa ni baba yangu asingeliweza kufanya hivyo…’akatulia.

‘Sasa ndio napata taarifa kutoka huko, alipokuwa mumewangu,… kwanza nilisikia amekufa, baadae nasikia ana mke mwingine na baadae eti wameshazaa mtoto…, huku baba ndio huyo haeleweki, huku familia yangu inanisakama na ilishafikia sehemu imesema kama sitaki kurudi kwetu, basi litakalonipata ni juu yangu,…kwa hali kama hiyo mlitaka mimi nifanye nini..

‘Ni kweli nafahamu nilivunja miiko ya ndoa, nikaondoka kwetu, sehemu nilipopewa kama kwangu, ..nilikiuka miiko ya ndoa nikakimbia sehemu ya mume wangu, nakiri hilo ni kosa, lakini nililifanya hili kwa makusudi..ili nijiokoe..na sikwenda kwetu, nilikwenda kuishi kwa shangazi yangu.

‘Huko kwa shangazi yangu, binamu yangu alikuwa amejifungua mtoto mchanga, na akawa anasoma,..kwahiyo nikawa mimi ndio mlezi wake,..ndio maana nikawa sipati muda, kulea mtoto sio mchezo, na..sijui labda, hao walioniona na mtoto ndio walichukulia hivyo, labda…mimi sijui..kwani binamu yangu alikuja akachukua mtoto wake wakaenda kuishi Dar na mumewe…’akasema

‘Kumbee….’akasema dereva, na kukawa na ukimia kidogo na aliyeongea sasa alikuwa baba …


‘Pole sana mkwe wangu, nikuombe radhi, nimekosa na sikuwa nimejijua kipindi hicho, nasikitikika sana, kwa hayo niliyokutenda, nataka niitoe hii kauli haraka, maana ya mungu mengi,.. ndio maana hata nilipoumwa, nilitamana nife tu….ila nilipomuona mtu wangu, ambaye ninajua atakuja kuusema ukweli, na kunisafisha,… nilijua hilo litakuja kufanyika, lakini  kwa vipi, niliongea na mke wangu kuwa ili hilo liweze kusubiriwa hadi wakati muafaka mke wangu amshawishi mkwe, ili aubebe mzigo, anyamaze na kutokusema lolote, nashukuru kuwa aliweza kulifanya hilo…’ilikuwa kauili ya baba mkwe pale kitandani.

‘Hebu nyamaza huko, huoni umenitia aibu…’akasema mkewe.

‘Lazima nitubu mke wangu, usione hivyo ukafikiri nilipenda, mke wangu nilikupenda sana, kuondoka kwako ilikuwa kama nimekatwa sehemu ya mwili wangu,..kila nikiwaza najikuta naumia, na nikaona pombe ndio dawa , kumbe ndio najiumiza, nasema hayo kiukweli, mnisamehe sana…samahani kwa kukukatiza ila liweke moyoni kuwa nahitaji msamaha wenu wewe na mke wangu..’akasema akimuangalia mkwewe na mke wake.

‘Baba mimi nilishakusamehe, nilijua sio wewe, ni udhaifu wa kibinadamu na pombe..sipendi kabisa pombe, lakini niliamua kukuvumilia,..na isingelikuwa hivyo, ningelishaondoka..isingelikuwa ni mama, kuonyesha mapenzi yake kwako, kuwa pamoja na hayo alikuwa tayari kukusamehe, ila alitaka ukweli,…alitaka kuhakikisha familia haitaumia baadae, ila ilimuuma sana ulipoamua kutembea na rafiki yake, na nimejua ukweli huo kupitia kwangu…’akatulia.

‘Sikuweza kuja kuusema ukweli mwingine kwa mama, japokuwa aliniomba sana nisema, lakini nilijua nikisema je ikiwa sio kweli…lakini watu walishasema wapo tayari kunipeleka kunihakikishia kuwa mume wangu ana mke mwingine na wameshazaa naye…’akatulia

‘Sikutaka kulisema hilo kwa mama japokuwa mama aliniomba sana,…aliniona nilivyokuwa sina raha, ..lakini nilisubiria wakati muafaka, ili niweze kuupata ukweli, na ushahidi kamili…’akatulia.

‘Na ghafla siku ya siku naletewa mtoto, mtoto anafanana uso kwa uso na mume wangu,kama nilivyoambiwa kuwa mtoto huyo anafanana na mume wangu…hebu niambieni hapo unaweza kusema nini….ni kuwa kumbe kweli mume wangu alikuwa ana mke mwingine…’ akasema akimuangalia mama . Mama mkwe akawa kainama chini tu.

‘Sasa nichotaka ni ukweli kutoka kwa mume wangu,,…autamke ukweli mbele yenu kuwa hayo yanayosemwa ni kweli au si kweli..na huyo mtoto aliyeletwa kwangu ni wake, na kama ni wake, huyo mke wake yupo wapi…na kwanini asiwe wake na ushahidi upo, unajionyesha, huyo mtoto anafanana na nani…’akatulia na kugeuza uso , sasa kumuangalia Soldier.

Soldier alikuwa kanyamaza…yaonekana alikuwa akiwaza….akatikisa kichwa kukataa na akasema;

‘Mimi sielewi kitu….dereva, kama upo nyuma ya haya, utaniona mbaya…..’akasema na dereva akacheka kwa dharau. Na mke wa Soldier akaendelea kuongea;

‘Kinachoniuma zaidi ni kuwa mume wangu aliporudi akaanza kunisakama mimi kuwa sikuwa muaminifu kwake, nimefanya madhambi na mungu kanidhihirisha kwa kupata mtoto, akaniuliza je huyu mtoto ni wanani,..kama kweli ni wa baba yeye ataondoka kabisa kijiji hiki ili aniachie nafasi, kama ni mtoto wa …dereva basi, ajua jinsi gani y akufanya, kwani na yeye ana mke kama mimi..sasa sijui hapo alikuwa na maana gani….’akatulia.

‘Mimi namuuliza sasa huyu mtoto akiwa ni wake,..mimi nifanyeje…asema, kama yeye alishatoa maamuzi kama hayo, na mimi nitoe maamuzi gani ikiw huyu mtoto ni wa kwake….?’

Soldier kwanza alishikwa na kitu kama ganzi, akabakia ameduwaa, akajaribu kufikiria, hayo yametoka wapi…mbona haelewi kitu,…mbona anazushiwa kitu ambacho hakifahamu…. baadaye akasema;

‘Umemaliza mke wangu…?’ akauliza

‘Sijamaliza, nitamaliza pindi ukinijibu swali langu ili niweze kuendelea na kutoa maamuzi yangu...’akasema.

‘Mke wangu, kwanza hebu rejea maswala ya baba, baba ameshutumiwa na mambo mengi tu, na mengi  ya hayo ni uzushi mtupu,…yamedhihirika hapa, na utaona mengi hutungwa na wanadamu na wengi wao ni ndugu wa karibu tu,…ukisema mtoto kufanana na mimi bado kuna dereva anafanana na huyo mtoto mbona yeye humshiki shati…

‘Dereva nilishaongea naye, na nikafuatilia nyendo zake, ..kuna watu walimchunguza kama yeye kama kweli huyo mtoto ni wake, na la kujiuliza ni kwanini amkatae mtoto wake, kama ni wake…kiukweli inaniuma sana, kwani nyie wanaume mpoje, kama umezaa umeshazaa, iliyobaki ni kusema ukweli tu.., jinsi unavyoficha huo ukweli ndio jinsi mnavyotutesa sisi wanawake pindi tukigundua ukweli.

‘Au unaogopa kuhusu huyo mwanamke uliyezaa naye, itakuwaje kama unaliogopa hilo kwanini, ulitembea naye, ulipopanda mbegu ulitegemea nini, na hayo ni maswala ya kukubaliana, maana ni wewe mwanaume ndiye mwenye maamuzi, kidume, au sio…hahaha’ akasema akijilazimsiha kucheka.

‘Kama ni mtoto wako, mtambulishe, mimi sina wasiwasi, hata hivyo nimeshachukua maamuzi yangu,nasubiria nikusikie utakavyojitetea,…nilikupa muda wa kuniambia ukweli, na muda huo umeshapita, na sasa nakupatia muda wa mwisho, ….’akasema akimuangalia Soldier.

Soldier alitikisa kichwa kama kusikitika, akainama kidogo chini, halafu akainua uso na kumkabili mkewe, akasema;

‘Mke wangu sijui nikuambieje, kiukweli mimi sijui hayo yametokea wapi..mimi nilikuwa vitani, nilikuwa maeneo mbali na raia, sasa sijui hilo la mtoto, la mke,limetokea wapi…na sijui kwanini unakuwa kama unamtetea Dereva,..jamani kama mtoto huyu sio wa kwangu, basi ni wa dereva,..’akasema akimgeukia baba yake.

‘Mini sijui kwanini namuhisi vibaya huyu ndugu yangu wa kufikia, yawezekana ni mbinu zake chafu,,,na niwaulize jamani..hivi mnafahamu maana ya vita,..ndio kuna muda mnapata nafasi ya kutoka nje…, inatokea mnaweza mkatembea tembea lakini ni muda mfupi tu, sisi tupo kwenye mikataba ya kimataifa kuna masharti yake…hebu nikuulize hao watu waliokuambia hivyo walisema waliniona wapi…?’ akauliza

‘Hilo kuwa wewe walikuona wapi, kwangu, sizani kama lina mantiki, mimi ninachotaka ni jibu lako la ukweli, Je huyo mtoto ni wako au sio wako, kama si wako sawa, basi huyu mtoto hana baba, ila mimi nitakuwa mama yake, hilo nimeshaamua hivyo, na atakuwa mtoto wangu wa kwanza, nitamlea, na tutaishi naye, nimeshaanza maisha yangu, najua nikiwa naye atanipa faraja, je ni mtoto wako au sio wako…?’ akauliza

‘Mke wangu huyo mtoto sio wa kwangu, unataka nisemeje ….atakuwaje wangu, ningezaaje, na nani…?’ akauliza sasa kwa sauti ya hasira.

‘Kwahiyo unamkana mtoto wako mwenyewe…’akasema mkewe akitabasamu ile ya kusikitika

‘Aaah, sasa hapo sikuelewi, hebu niambie wewe unataka nisemeje, maana huyu mtoto awali alifikiriwa ni mtoto wa baba,…ikaonekana ni uzushi,…. haya akaja kufikiriwa ni wa dereva, na wengi walijua kuwa huenda mumeshirikiana naye, lakini wewe umelikana hilo, haya mimi unataka nikubali tu wakati mtoto sio wangu…’akatulia, halafu akamgeukia dereva

‘Dereva,  hebu ndugu yangu..,sema ukweli tuondokane na shutuma hii tuendelee na mambo mengine, unajua ukitaka nitumie nguvu nitatumia, na ukifika wakati huo, hutaamini kuwa mimi kweli ni ndugi yako…’akasema Soldier akimuangalia Dereva.

‘Hahaha, bro bwana..mimi hapo sina usemi,…hayo ni yako wewe na mkeo, na nikuambie ukweli bro, kama sio baba kama walivyosema watu, basi huyo mtoto ni wa kwako, angalia mnavyofanana na wewe, …’akasema akicheka kama mdhaha, hakuonyesha wasiwasi wowote.

‘Hahaha, lakini pia anafanana na wewe…sasa mumebakia nyie wawili, ni nani mwenye huyu mtoto, mtuambie ukweli…kama baba yenu keshatoka hapo, sasa ni nyie wawili, au labda mna ndugu mwingine anayefanana na nyie, maana bab zenu hawaaminiki…’aliyesema ni mama

‘Mama,..kama angelikuwa huyo ni mtoto wa kwangu, ningemchukua mara moja,  mama, ni mwaka sasa, tunatafuta mtoto mimi na mke wangu..tunataka mtoto hatujampata…unakumbuka mimi nilioa mapema kabla ya bro…lakini sijachelewa, tutampata mtoto muda haujafika tu, sasa kama ingelikuwa ni mimi nimezaa nje, mbona ingekuwa poa tu, maana ningeenda kumringishia mke wangu kuwa mimi nina mtoto, yeye ndiye ana tatizo..lakini …’akatulia

‘Kwahiyo wewe huwezi kuzaa..?’ akauliza na Shemeji, kaka yake mke wa Soldier.

‘Nani kasema siwezi kuzaa wewe, mimi nimepima kila kitu kipo sahihi, ila muda muafaka bado, tutampata mtoto tu mungu akipenda, na…kama huyo angelikuwa ni wa kwangu, ningelishamchukua,..mke wangu anapenda sana watoto…’akasema

‘Wawili chini..bado mmoja…’ akasema baba akiwa kitandani, na wote wakawa wanajiuliza ana maana gani.

‘Hahaha baba kama mtoto, familia hii puuuh,  haya sasa Soldier, ongea, si unataka kutupeleka polisi sisi, unatuona sisi ni wahalifu, je hilo ulilofanya sio uhalifu,..  kumbe wewe ni kiwembe kama baba yako, ..simba mwenda pole, nilijua tu…sasa hilo, …ukicheza tu umempoteza mke,…na uking’ang’ania na dhamira yako, ya kunifikisha polisi, …nitakuumbua ukweli wa kukuumbua…’akasema Shemeji yake.

Soldier akamuangalia shemeji yake huyo, halafu akatabasamu, na kutikisa kichwa kama kusikitika,… akageuka kumuangalia mkewe kwa muda tu, halafu akageuka kumuangalia mama yake, …akatikisa kichwa, hakusema hivyo ila akilini alijikuta akisema, `hata mama… haniamini..’

Akili haikuelewa chochote, ni kwanini wamemshuku yeye, haelewi….na mara kikohozi kidogo kikatoka kwa yule mdada mgeni, kuonyesha kuwa anataka kuongea…

‘Na mimi naweza kuongea kidogo…’akasema huyo mdada, lakini alionekana akisitasita, kama anaogopa. Dereva, akamuangalia kwa mashaka, na aliyeonyesha kushtuka zaidi ni shemeji, alikunja uso akimtizama huyo mdada….

Yule mdada kwanza akamtizana sana dereva, halafu Soldier, kabla hajaanza kuongea…

NB: Mhh, naona imekuwa ndefu sana


WAZO LA LEO: Uongozi ni dhamana, na dhamana hiyo ni deni kubwa, wengi wetu tunapopewa dhamana hiyo tunachofikiria zaidi ni masilahi yetu binafsi kabla ya kulipa gharama ya dhamana hiyo. Uongozi wa kuongoza watu ni dhamana kubwa zaidi, yahitajia hekima, busara, na kujitolea kwingi, na wakati mwingine inahatarisha hata maisha ya mtu. Wenye uelewi mkubwa hawapendi kuibeba dhamana hii, hata kama ina malipo kiasi gani, lakini inabidi, kama mungu kakujalia kipaji hicho na uwezo unao inabidi, basi kama tumeamua hivyo, kuibeba dhamana hiyo, tujitahidi kutimiza masharti na miiko ya uongozi la sivyo, tutakuwa tunajibebea mizigo mizito ya madhambi, na adhabu yake inaweza ikakutesa kuanzia hapa hapa duniani.
Ni mimi: emu-three

Thursday, March 23, 2017

KITANDA HAKIZAI HARAMU-25


 ‘Unajua hii familia naichukia sana, nilimuonya sana dada yangu asiolewe kwenye hii familia, lakini akaleta ubishi,…unaona sasa, wamefikia hatua hiyo, eti….umezaa na nani na huyu tapeli, ….hivi kweli mumekosa la kusema..’ akasema huyo jamaa akimuangalia Soldier.

‘Lakini hakuna aliyesema kuwa dada yako kazaa na dereva,…kama nimesikia sawa..’akasema Yaya.

‘Haya kazaa na nani…?’huyo jamaa akauliza akimgeukia Soldier.

‘Sikiliza shemu, wewe umekurupuka tu, na jaziba zako…, ngoja nikuambie ilivyo, huyu dereva, kwa maelezo yake anasema dada yako kabeba mimba akatupa mtoto…kweli sikweli….?’ akamuuliza dereva.

‘Kweli kutokana na taarifa nilizozipata ..’akasema dereva

‘Kutoka kwa nani..?’ akauliza Soldier

‘Kutoka kwa raia wema ambao walimuokota huyo mtoto, na mmojawapo ni huyo dada hapo mgeni …’akasema dereva, na watu wakageuka kumuangalia huyo mdada aliyejifunika uso.

‘Mlikutana naye wapi, akakuambia hayo…?’ akaulizwa

‘Nikiwa kazini, mimi ni mmoja wa watu wanaoshughulikia, kusaidia wakimbizi, na nilichaguliwa kiongozi wa kundi lililopelekwa huko ncho ya jirani…’akasema

‘Hao raia walithibitishaje kuwa huyo aliyemtupa mtoto ni mke wangu…?’ akauliza Soldier

‘Raia wengi tu, akiwemo kiongozi wa eneo lile,…walisema kuna mdada mmoja alikuja na mtoto, akawa anazunguka zunguka naye, baadae huyo mdada akatoweka…baadae wakapata taarifa kuwa kuna mtoto ameokotwa, akaletwa pale ofisini …’akasema na kabla hajamaliza, Soldier akadakia kwa swali jingine.

‘Ndio ulijiridhishaje kuwa kweli huyo aliyemtupa mtoto ni mke wangu…?’ akaulizwa.

‘Walivyomuelezea sifa zake, mpaka jina,…sura , umbile,…nikasema huyo mtu namfahamu mimi, sikusema pale palekuwa namfahamu nilitafuta njia ya kuhakikisha hiyo damu inarejea kwa wenyewe..na hata hivyo nikiwa pale bado nilikuwa sina mawazo hayo maana majina yanafanana..mpaka nilipofanya uchunguzi ….’akasema.

‘Uchunguzi gani ulifanya..?’ akaulizwa.

‘Nilipotulia, niliamua kupiga simu huku, kwa watu ninao wafahamu, nikawauliza, kuhakikisha jina, kama ni sahihi..ndio nikaambiwa mambo yaliyonihakikishia kuwa ni kweli…’akasema

‘Hapo bado hukutakiwa kuhitimisha kuwa mke wangu ndiye kafanya hivyo, maana hapo kikubwa umefuat ushahidi wa kimaumbile, …hivi wewe ukifanya kosa mimi nitahukumiwa kwa kosa lako, maana sura na maumbile yetu yanafanana…?’ akaulizwa

‘Mimi nilipomuona huyo mtoto anafanana na na mzee, nikawa na uwezo wa kufikiria hivyo, ukiunganisha, hayo niliyoambiwa,..na ni kweli mtoto anafanana na nyie..na kwa vile wamemtaja mke wako kwa jina…, na niliambiwa shemeji hapa alitoroka nyumbani kwake, ..karibu mwaka sasa…nikauliza uliza habari za huku…nikajua ni mke wako…’akasema, halafu akamgeukia kaka yake Soldier.

‘Unabisha kuwa dada yako hukuwahi kufika kwako...akiwa na mtoto mchanga, yule mtoto aliyekuja naye yupo wapi, alikuwa wa nani,...je hukuwa unaishi naye huko…nchi ya jirani..?’ akauliza na jamaa akawa kimia, jamaa alionekana ana hasira zake tayari.

‘Usiniulize maswali ya kijinga mimi,... ndio dada yangu huwa mara kwa mara anakuja kwangu, na kama alikuja na mtoto au yeye mwenyewe haijalishi , yeye ni ndugu yangu, kuna ubaya gani hapo…’akasema kwa hasira

‘Uliwahi kukutana na mke wangu kabla..?’ akaulizwa dereva na Soldier. Soldier, hakutaka kumuuliza swali shemeji yake,  alijua huo sio wakati muafaka.

‘Zamani sana…kabla ya hapo,…’akasema na kabla hajatoa maelezo, akaulizwa swali jingine.

‘Kwahiyo hukuwahi kumuona mke wangu akiwa mja mnzito..?’ akaulizwa

‘Sikuwahi…mimi nina muda mrefu sijaonana na mke wako, huwa nilikuwa nafika huku lakini sikuwahi kukutana naye…kama nilivyosema yote hayo niliyasikia kutoka kwa watu..na nikapiga simu kuulizia watu wahuku, nikaambiwa huyo mdada alitoroka nyumbani kwao, kwa visa vya baba mkwe wake…nanukuu walivyosema…’hapo akatulia.

‘Walikuambia alitoroka akiwa mja mnzito..?’ akaulizwa

‘Hapana,..sikuwahi kuuliza hilo swali, ukweli ni kuwa mke wako aliondoka nyumbani kwao muda…sijui kama alikuwa akirudi rudi au vipi, watu wengi wanahisi alipoondoka alikuwa mja mnzito, …’akasema na mara akaingilia shemeji yake Soldier akicheka;

‘Hahaha, baba mkwe, hahaha, mumesikia jamani, baba mkwe, anafanya uchafu huo, dada kama ni kweli niambie...au kama huyu muhuni anakusingizia niambie...'akasema shemeji. halafu akamgeukia dereva

‘Haya wewe dereva elezea, hivi visa vya baba mkwe, baba yenu vilikuwaje, maana nataka kukusanya data…, ili huyu anayejifanya mtu wa usalama, achukue hatua...'akasema akimgeukia Soldier

‘Ndio maana nimesema sitaki kuliongea hili maana litazidi kumuathiri baba, na naona mnaongezea mambo mengine ya kuharibu ajenda yetu, mimi nakuomba ndugu tuende kwa utaratibu, wewe sijui mna nini na bro, lakini…’akasema dereva na Soldier akaingilia kati kwa kusema.

‘Kwanini limuathiri baba, wakati unafahamu fika kuwa wewe ndiye muhusika mkuu wa haya yote, najua hilo litakuwa wazi, wewe ndiye mchonganishi ….wewe unatumia ujanja ujanja wako kuwarubuni watu, kugonganisha familia…, na sasa umejaribu kukwepesha makosa yako yaende kwa mtu mwingine…’akasema Soldier.

‘Nisikilizeni jamani, kwanza sio kwamba naingilia kauli yako mwanangu maana hayo ni mambo ya usalama, lakini nakuomba mwanangu achana na hisia zako kwa ndugu yako,...mimi ninataka tuyamalize haya matatizo ndani ya familia, nataka ukweli wote leo ubainishwe, tuoambeane msamaha…’akasema baba mtu.

‘Baba usijali,…haya tutayamaliza tu…ila kama kuna wakosaji ni lazima sheria ifuate mkondo wake, hilo siwezi kulipinga baba..lipo juu ya uwezo wangu...’akasema Soldier.

‘Sawa Soldier, nimeshakukabidhi kijiti endelea, na ajenda yetu, mimi nipo sawa, naweza kuhimili lolote lile, kwahiyo, ongeeni tu, ila mimi nitakuwa msikilizaji tu …msiwe na wasiwasi na mimi…mimi nina uhakika mhalifu wa haya yote yupo hapa, nimeshamuona ni nani, sasa kama familia tutajua tutamfanyaje sio lazima sheria za kimahakama..’akasema baba yao..

‘Baba mimi nilisikia tu, usinisakame bure mimi, sikuwa na haja ya kukuharibia hadhi yako , ila niliongea kutokana na watu walivyosema na ni baada ya uchunguzi, na haya mengine ni kwa manufaa ya familia, je mngelikubali damu yenu ipotee, mshukuru mtoto wenu sasa yupo mikononi mwenu…’akasema dereva

‘Dereva, wewe muda wote huo,ulikuwa wapi..?’ akaulizwa

‘Muda upi , kama ni kabla ya kufika huko nchi ya jirani kwenye kambi ya wakimbizi, mimi nilikuwa nasoma, nilikuwa nje ..huko kwa wenzetu, tulikuwa na mafunzo ya jinsi ya kuhudumia wakimbizi..na mambo mengine kama hayo…’akasema.

‘Na mlikuwa mnapata nafasi ya kurudi rudi kutembelea wakimbizi..?’ akaulizwa.

‘Ndio, lakini sikuwahi kupangiwa maeneo ya kanda za huko, mpaka ilipofikia muda huo wa tukio, unielewe hapo… sikuwahi kufika huko kabla’akasema dereva.

‘Una ushahidi na hilo, kuhusu ratiba yako….maana nitaagiza watu wafuatilie,…?’ akasema Soldier.

‘Ndio ninayo,… ratiba zetu hazina usiri, na , …hahaha bro, unafikiri mimi ndiye baba wa huyo mtoto..hapana bro… nisingeliweza kufanya hivyo, napenda sana watoto, kama angelikuwa ni wa kwangu nisingelimkataa….na muulizeni huyo mdada aliyemleta huyo mtoto, kama niliwahi kukutana naye kabla,…’akasema dereva.

‘Kwasababu ni uwongo…wewe umekuwa unafanya kazi za utapeli, kuhadaa watu ili kupata mali, ilimradi tu upate pesa na mali, ndio maana hakuna anayekuamini…’akasema baba yake.

‘Lakini baba ngoja kwanini tunazunguka, wahusika wakuu wa hii ajenda wapo hapa, mimi nahisi tumpatie nafasi huyo mdada mgeni aongee aseme ukweli, pia yupo shemeji hapa aongee kama kweli huyo mtoto sio wa kwake, na kama ni kwake je alizaa na nani…?’’akasema dereva akimuonyeshea mke wa Soldier, na wote wakageuka kumuangalia mke was Soldier.

Soldier akasema, bado hatujafikia huko, sijamalizana na wewe…’akasema Soldier , lakini watu wengi walikuwa wamemgeukia mke wa Soldier.

Mke wa Soldier alikuwa kimia, akiwa kaangalia upande mwingine , baadae alipoona kama vile watu wanamsubiria aongee, akamgeukia mama mkwe wake…alimuangalia mama mkwe wake kwa muda bila kusema neno na mama mkwe akasema;

‘Jamani haya mambo naona yanatakiwa yamalizike, …hatuwezi kuzunguka, na kupotezeana muda, wengi naona mnamnyoshea kidole mkwe wangu, kuwa sijui kazaa,, halafu akatupa mtoto, swali alizaa na nani, wakati mume wake alikuwa hayupo..au sio?’akauliza mama

‘Ndipo hapo tunautafuta huo ukweli…kama alizaa , alizaa na nani, maana ukweli wa kuzaa upo wazi, yeye kama sio kweli aupinge, watu walimuona, sasa ataupingaje, kama anasingizwa basi aseme, …’akasema dereva

‘Dereva wakati nilipokuuliza kuhusu wewe, kuwa watu wanasema kuwa wewe ni mtoto wa mume wangu ulisemaje..?’ mama akamuuliza.

‘Nilikuambia mimi sijui..maana mimi ni mtoto tu na mengine yawezekana ni kusingiziwa tu, ila tuache ukweli utasema wenyewe…, na wakubwa ndio wakuulizwa sio mimi, nilikuambia hivyo au nimekosea…’akasema dereva.

‘Hayo uliyasikia watu wakisema na hukuyachukulia kuwa ni kweli au sio,…Sasa kwa hili, acheni ukweli useme, na waulizeni wakubwa, msimsakame mwanangu, huyu binti hapo alipo amefungwa na masharti, sasa labda nimuulize mume wangu, ..je upo tayari kwa lolote lile…?’ mke akamuuliza mumewe.

‘Nimeshasema, kwani kuna tataizo gani, mimi nipo ok…nafahamu mke wangu mpaka sasa hujaniamini, unahisi labda kweli yanayosemwa na watu yana ukweli…mke wangu ni kweli nilikuwa nalewa, ni kweli nilikuwa napitiliza, naweza kukosea chumba na kwenda kulala kwa eeh, mkwe,..lakini nalala sakafuni, nilizidiwa kipindi kile, lakini nisingeliweza kufanya tendo kama hilo,..nina uhakika na hilo …’akasema.

‘Hahaha mzee umejileta mwenyewe, umesikia mdogo wangu..?’ akasema Shemeji akimuangalia dada yake.

‘Huyo ni baba mkwe wako anakiri mwenyewe kuwa ni mlevi, analewe anapitiliza anakuja chumbani kwako, anakuja kufanya nini, halafu bado unataka ….kung’ang’ania ndoa,..unataka uchangie mume pamoja na baba yake…hahaha, mimi hilo sitalikubali kamwe, kuanzia sasa wewe …’akashindwa kumalizia.

 Mama akawa kamgeukia mumewe, akisubiria kama mume wake ana maelezo ya ziada, na lipoona mume wake yupo kimia akasema…

‘Mume wangu mimi nimekuuliza je upo tayari kuyasiki hayo atakayoyaongea mkwe wako, yaani mke wa mwanetu, maana kuja kwake huku, kwanza ni kukuona , halafu ni kuhitimisha matatizo yake na mumewe..amesema leo anakuja kuusema ukweli wote,…mimi nilimuambia asubirie kwanza maana wewe hujawa sawa…’akatuliza

‘Mimi naona baba hayupo tayari…tunakimbilia mambo ambayo yaweza kumuathiri baba, kwanza niachieni mimi nifanye kazi yangu, mnivumilie tu,… nitawahitaji dereva na shemeji tukitoka hapa tupitie polisi, kuna maongezi na mahojiano,…ni utaratibu tu wa kawaida, na huko najua tunaweza kuupata ukweli wa haya yote bila kumsumbua baba…’akasema Soldier.

‘Kwanini unipeleke polisi, kwa kosa gani, …?’ akauliza shemeji mtu.

‘Nimesema ni maswala ya kawaida, mtahojiwa na mkimaliza mtaruhusiwa, kama hamna makosa mna wasiwasi gani…?’akasema Soldier kama kuwauliza.

‘Huko mimi siendi, …kwanza niambie nina kosa gani , naenda huko kuhojiwa kwa kosa gani, hiyo ni haki yangu kufahamu…kwanza mimi nina aleji na vituo vya polisi, unasikia , na pili wewe wewe kama nani wa kuniamrisha niende kituo cha polisi, wewe ni askari wa vita sio polisi, na kwasababu hiyo mimi siwezi kwenda huko…’akasema

‘Nina RB, ya kufanya hivyo, sio kwamba nakurupuka tu….utaratibu wote umefuatwa, mimi nimechukulia hivi kama ndugu, kuliko waje wawakamate wawatie pingu, nikasema mimi nitawachukueni kistaarabu tu…’akasema akitoa karatasi ya kuonyesha hiyo RBi.

‘Swali bado hajanijibu nimefanya kosa gani…?’ akauliza shemeji mtu.

‘Huna kosa,..unasikia, kosa ni mpaka lithibitishwe na ndicho hicho wanataka kufanya, sio nyie tu kuna wengi wanaitwa kwa kuhojiwa, ni mambo ya kawaida, ya ulinzi na usalama, na sijui kwanini uogope, sijui kwanini ukatae, ukikataa basi nitaiachia sheria ichukue mkondo wake…’akasema Soldier.

‘Jamani hayo ni yenu, hebu kwanza tumalizane na hili…’akasema mama akimuangalia mume wake.

‘Mke wangu hilo nalo ni kubwa, linahusu jamaa zetu, au sio ni muhimu kujua nini kifanyike, hata kama wataenda tuwe tumejipanga kwa lolote lile, ..mimi kama kiongozi wenu sina shaka, najua hayo ni mambo ya usalama tu, sioni kwanini mkatae kwenda huko…na mke wangu unasemaje, ….maana akili ilikuwa imeshutuka, unataka nifanye nini sasa, ok, tumalizane na hili letu au sio..?’ akauliza baba yake Soldier.

‘ Kwa hivi sasa tunahitajia kauli yako, kama kweli utaweza kuhimili hayo yanayotaka kufanyike, je kweli upo sawa kuhimili lolote, maana mkwe wako anaweza kuanza kuongea mambo ambayo yatakugusa, halafu ukadondoka kwe presha…’akasema mkewe.

‘Kitu gani cha kunidondosha mimi kwa presha…, mimi sina wasiwasi mke wangu, kwa vile muhusika wa haya yote yupo hapa, na yupo tayari kutoa ushirikiano,…hana ujanja ni lazima atoe ushirikiano,… mimi ni askari mstaafu, naweza kumuhisi muhalifu kwa kumuangalia tu…’akasema akimuangalia dereva, na dereva akatabasamu, na kusema;

‘Baba…tatizo labda unahisi bado nipo kwenye yale mambo yetu, hapana mzee, kule nimeachana nako kabisa nilikuwa na maana yangu na maana hiyo imeshakamilika, sina shaka tena, na nafahamu bro anataka niende polisi kwasabau gani, na hilo kwangu halina shaka, mimi siogopi kwenda huko, na itakuwa vyema kabisa maana sasa mambo yapo hadharani, na yale yangu na baba, tulishayamaliza, au sio baba,  yale yamepita maana ukweli sasa upo mezani, kwahiyo yanayofaa kuongewa yaongewe tu,…’akasema dereva.

‘Kwahiyo wewe unatuthibitishia kuwa huyo mtoto sio wa kwako…?’ akauliza mzee.

‘Huyo mtoto sio wa kwangu baba, maana sijawahi kutembea au kuja huku na kukutana na ..’akageuka kumuangalia mke wa Soldier,

‘Muulizeni…shemeji aseme ukweli,…na kwanini mzee, tunarudi nyuma, na labda mtasema kuhusu huyo binti mgeni, mimi sijawahi kukutana na huyo binti mkimbizi kabla, sikuwahi kumfahamu kabla kama unafikiri mimi nilikula njama na yeye,..unasikia na kulithibitishia hilo,, mpeni nafasi huyo binti aongee ukweli, aeleze alivyomuokota huyo mtoto, na jingine mnaweza kuwasiliana na uongozi wa huko , alipookotewa huyo mtoto…’akasema.

‘Mhh…hapa naona hatuwezi kufikia muafaka, maana mara mke wa Soldier aongee, sasa mnarudi kwa huyo mgeni, yupi na yupi mnataka awathibitishie lipi…?’ akauliza mama.

‘Soldier…ongoza kikao, mimi nitakuwa msikilizaji…’akasema mzee.

‘Jamani naona nianze  kuongea mimi…..’aliyesema sasa alikuwa mke wa Soldier, na Soldier mwenyewe akamkazia macho, kama kuonyesha mashaka fulani,  lakini mkewe hakutaka waangaliane, maana ukitaka kumuua nyani msiangaliane machoni.

‘Wazazi wangu, na ndugu na jamaa zangu….naongea hili kutoka undani wa moyo wangu…’akaanza kuongea.

NB: Hii sehemu nimejaribu kuweka mambo mengi kwa pamoja, ili tuharakishe kukimaliza hiki kisa, sijui kama nimekosea?


WAZO LA LEO: Mnapotaka kutoa hitimisho la jambo, iwe ni hukumu au uamuzi fulani, ni muhimu kuwe na mizania ya usawa, ya kuwahusisha wale wote wanaokisiwa kuwa watendaji au wakosaji. Tusipendelee kuangalia upande mmoja eti kwa vile ni ndugu, rafiki au chama au imani moja, haki itapatikana pale wewe msemaji au mtoa hukumu, utakapoweza kuwasikiliza wote bila kubagua, na ukaweza kupitia ushahidi, …uchunguzi na tafikiti yakinifu. Tusipende kuhukumu kwa kusikia tu.
Ni mimi: emu-three

Search This Blog

Loading...