YOTE NI KWA MAPENZI YA MUNGU-28

‘Afande, Dalali anadai kuwa hakumbuki kuwa muhasibu aliyekuwepo awali, kipindi marehemu akiwemo ndio huyo huyo aliyekuja kukutana naye…wakati anafuatilia hilo madeni…’nikasema.

‘Ndio sikumbuki…’akasema Dalali kwa sauti ya kunikatisha.

‘Una uhakika bwana Dalali, maana kauli zako nyingi ulizosema zimekuja kuonyesha wewe sio mkweli, na mimi naanza kukutilia mashaka, sasa niambie ukweli je ni kweli hukumbuki hilo…?’ akauliza mpelelezi.

‘Afande, hivi wewe unawakumbuka wahasibu wa benki waliokufanyia kazi ulipoenda benki, ndio unaweza kumkumbuka mmojawapo kama ulifanya naye jambo la kukumbuka au sio, lakini mara nyingi ilivyo,..ukitoka benki umetoka na mambo yako, …naweza labda, nikimuona tena, lakini kwa vile sina kazi naye kwanini nimuweke akilini…unanielewa hapo afande…’akasema Dalali.

‘Umesikia jibu lake mtu wa jamii..’akasema mpelelezi.

‘Dalali,…kinachonisikuma zaidi niendelee kukuhoji wewe ..na kinachonifanya nihisi kuwa kuna jambo limejificha kupitia kwako kwenye hilo deni, ni kauli zako…jinsi unavyoficha mambo, hutaki kusema ukweli, najiuliza ni kwanini..’nikasema

‘Ukweli upi ndugu yangu, wewe umeniuliza swali na mimi nimekujibu kadri ya ninavyofahamu , sasa kama maelezo yangu huyaamini, mimi nifanyaje…’akasema.

‘Awali ulisema wewe huna usuhuba na mtaalamu, ushahidi umetoka kuwa huyo mtaalamu ni rafiki yako wa karibu tu…je huo ndio ufahamu wako, …na kwanini ulituficha hilo…?’ nikauliza.

‘Nilishaelezea sababu zangu, kuwa huyo jamaa ni mganga wa kienyeji, na wengi hawapendi kujionyesha kuwa wapo karibu na watu hao, ni kutokana na udhaifu wetu tu..lakini wao ni wenzetu, wanatusaidia sana, sema kazi zao hazipo rasmi kivile..unaonaeeh..na wengine wanaweza kukuhis vibaya kuwa umekuwa karibu naye ili kazi zako zifanikiwe,..kuondoa hizo hisia ndio maana tunaficha…’akasema na kugeuka kumuangalia mpelelezi.

‘Haya sawa, kwa utetezi wako huo kwa mtaalamu..ila najua ni kwanini ulilificha hilo..sasa nauliza tena kwa huyo muhasibu, je ni kweli ulivyosema kuwa hukumbuki,..na hilo nalo kwanini unalificha…?’ nikamuuliza.

‘Sikuelewi…maana jibu la hilo swali nimeshalitoa…na..sijui wataka nisemeje, labda nikuuliza wewe una ushahidi gani kuwa hayo ninayoyasema sio ya kweli…maana ..eeh, nini ninyeufahamu huo ukweli ndio maana ukaniuliza, au..mimi sijui, wataka mimi nisemeje..’akasema.

‘Kwenye simu yako una namba ya huyo mhasibu,…kweli si kweli..?’ nikamuuliza, kiukweli nilimuuliza tu , na sikuwa na uhakika huo,…nikaona matokea yake, jamaa akashtuka na kuiangalia simu yake…

‘Umeonaje ndani ya simu yangu…?’ akauliza.

‘Nijibu ukweli, …je wewe huna namba yake kwenye simu yako…?’ nikauliza

‘Sina uhakika, nina namba za watu wengi sana, huenda..unajua tena, hata hivyo, kuwa na namba ya mtu sio sababu yak um-eeh, kukumbuka huenda nilichukua tu…’akasema na kusita kidogo.

Mpelelezi sasa akaichukua ile simu ya Dalali, na alipoona imezimwa akamuangalia Dalali, Dalali akaangalia chini.

‘Kwanini umezima hii simu…bwana Dalali?’ akauliza mpelelezi.

‘Niliona inasumbua, maana kila dakika hapa utasikia simu yangu ikiita, na matokeo yake naanza kuadhirika mbele ya shemeji yangu hapa, nyie hilo hamlioni hapa, mimi namuheshimu sana shemeji yangu…’akasema.

‘Usinitumie mimi kwenye mambo yako, wanaume wote ndivyo mlivyo…’akasema mama mjane

Mpelelezi akamtupia jicho mama mjane na mama mjane akaangalia chini, na Dalali akasema;

‘Lakini kaka alikuwa hana tabia kama zangu au sio shemeji…’ akasema Dalali akionyesha utani, mimi nilishajua lengo lake ni kupotezea lengo.

‘Mume wangu sio sawa na wanaume wengine ndio maana mpaka kesho sitakubaliana na hilo deni kuwa ni lake…’akasema mama mjane sasa kwa kujiamini.

‘Shemeji, chunga ulimi wako, hao mizimu….’akata kusema na mpelelezi akamkatisha kwa kusema;

‘Dalali iwashe hiyo simu na unitafutie namba ya huyo muhasibu wa benki…’akasema mpelelezi,na kumfanya Dalali sasa abakie mdomo wazi, …alitulia kidogo baadae akasema;

‘Afande, nina namba za wahasibu wengi wa benki, sasa sijui ni yupi….’akasema

‘Ambaye ulienda kwake kufuatilia hilo deni ,…’akasema mpelelezi.

Dalali, akatulia kwanza kwa muda, halafu akachukua simu yake na kuanza kutafuta namba.., akapata namba, na kusema;

‘Nahisi namba yake ndio hii hapa, unajua nilichukua namba yake maana ingelinisaidia kwenye kufuatilia hilo deni, kama namuhitajia…’akasema huku akisita kumkabidhi mpelelezi.

Mpelelezi akaiangalia ile namba, na kuona jina, mbele ya hilo jina kumeandikwa,mhasibu wa benki, halafu akatikisa kichwa, kitendo kile kilimfanya Dalali awe na mashaka kidogo, akawa kama anataka kuongea jambo, lakini mpelelezi akamuwahi kwa kusema;

‘Mbona ulisema hukumbuki, Dalali, unajua kila hatua unanifanya nianze kukuhis vibaya, watu wetu walishachunguza na kubaini kuwa hilo deni la marehemu,..lipo, na ushahid ulivyo, hilo deni, ni deni la marehemu kweli…, lakini wewe unavyofanya, inanifanya hata mimi niingiwe na mashaka..’akasema mpelelezi.

‘Afande, nimechoka kwakweli…hebu nioneeni huruma na mimi..maswali yamekuwa mengi sana, wakati mwingine najihami tu, kukataa ili isije ikawa ni swali la mtego,..mhh…’akajitetea

‘Kwahiyo hivi sasa umemkumbuka huyo muhasibu uliyeulizwa, kuwa ndio yule yule aliyekuwepo kipindi cha marehemu…?’ akaulizwa.

‘Huyu muhasibu nina namba yake, maana ilibidi nichukue namba yake wakati tunafuatilia uhalali wa hilo deni, sasa hilo la kukumbuka kuwa ni yeye aliyekuwepo kipindi hicho akiwepo marehemu,…mmh, sijui kwakweli,…unajua ningelijua kuwa hilo swali nitaulizwa, ningelimuuliza,..…’akasema.

‘Una uhakika Dalali…?’ akaulizwa

‘Sina uhakika ..siwezi kujibu uwongo..sikumbuki kwakweli…’akasema

Mpelelezi akanigeukia mimi na kusema;

‘Ushahidi wako huo,…niambie sasa…’akasema mpelelezi

‘Naomba uipige hiyo namba…’nikasema na nilivyosema hivyo hata mpelelezi mwenyewe akaniangalia kwa mashaka, na kabla hajasema neno,…Dalali ndiye akadakia na kusema.

‘Kwanini..hiyo ni simu yangu bwana, kama unataka kuongea naye piga kwa simu yako…kwanza unataka kuongea naye kitu gani?’ akauliza akionyesha mashaka, hakujua kuwa kitendo hicho kimemfanya mpelelezi amshuku vibaya, huenda angelinyamaza kimia mpelelezi asingelichukulia jambo hilo ni la muhimu.

‘Ili nithibitishe kauli yangu,…ili nithibitishe ushahidi wangu…’nikasema

Na mpelelezi hakusubiria kibali cha Dalali, akafanya vitu vyake na kuipiga ile namba ikaanza kuita, Dalali akawa anaangalia tendo lile kwa mashaka, na baadae sauti ikasikika ….

‘Uncle…mbona umenipigia tena…’sauti ikasema

Mpelelezi akampa Dalali simu, Dalali kwanza akasita kuipokea , baadae akaipokea huku akiuma uma maneno kama..

‘Ni-ni..ongee naye nini sasa…’akasema na wakati huo simu ilishakuwa mikononii mwake, ndio akasema kwa haraka;

‘Ni-ni-nili-likuwa najaribu namba yako….nilijua labda hafanyi kazi…’akasema Dalali

‘Unajaribu namba yangu!!! Uncle mbona siku zote unanipigia na inafanya kazi, vipi leo ufanya kuijarbu, kwani kuna nini huko uncle…’sauti ikasema.

‘Basi hamna shida…’akasema Dalali, kabla hajakata sauti ikasema;

‘Uncle, …nina hali mbaya sana, huo mnada kweli utakuwepo hapo kesho, unajua ukifanyika kwa haraka ndio unafuu kwetu, umenielewa uncle, fanyeni mambo yenu hili jambo limalizike haraka..’sauti ikasema.

‘Sawa nimekuelewa…’akasema Dalali.

‘Upo wapi…mbona unaongea kwa mashaka, sio kawaida yako..?’ sauti ikauliza

‘Nipo..ofisini…’akadanganya hivyo.

‘Sawa ..usinipigie tena, unasikia,…tuliahidiana hivyo, na iwe hivyo, na ukifanikiwa wewe nipe ishara tu, na hadi hapo…hunijui, hatujuani, au sio, kwaheri…’simu ikakatika.

Ukimia ukatanda,…Dalali kainamisha kichwa, na mpelelezi, akasogea pale alipo Dalali akaichukua ile simu na kuweka mezani,…na mimi nikasema;

‘Nawakilisha ushahidi wangu afande…’nikasema na Dalali kwanza alinywea, lakini baadae akazindukana, na kusema;

‘Ushahid kuhusu nini sasa, unajua mimi nashungulika na watu mbali mbali, sasa usitake maneno ya watu ukayaingiza kwenye shutuma zako..ndio alikuwa mfanyakazi wa benki, na alipotoka benki akaniomba nitamfutie kazi…ndio maana pamoja na yote huyo nina namba yake…nimeshakumbuka hilo.’akasema Dalali

‘Hahaha Dalali, kwanini hutaki kuwa mkweli, huyo mhasibu mnafahamiana naye sana…kipindi marehemu yupo hai, hadi hii leo,…hata kabla ya yote mnafahamiana tu, nitakuja kulithibitisha hilo baadae….na ni kweli wewe ulimsaidia kupata kazi benki, awali …lakini sasa yupo wapi …’niliposema hivyo nikamuona akivuta pumzi ya kuhema.

‘Sawa….sasa, kumsaidia mtu kupata kazi ni moja ya kazi zangu za udalali…kuna ubaya gani hapo, kuwa wapi , yupo, ana shughuli zake, kwani, unataka kusema nini hapo…?’ akauliza

‘Tutakuja kuliona hilo, ila lichukulie kama angalizo, kuwa kuanzia sasa, ujue mambo yako mengi yameshagundulikana, muhimu ni wewe kutoa ushirikiano, vinginevyo,…usije kumlaumu mtu..’nikasema

‘Afande mimi sipendi kauli ya huyu mtu, ina maana keshanishuku tayari, tatizo huyo mtu anaonekana ni mtaalamu wa kutunga hadithi, hapo alipoe, eeh..keshafikiria hadithi yake na kuniweka mimi kama muhusika wake mkuu..’akasema akicheka kwa dharau

‘Sasa nakuambia kitu,.. hapa kwangu unapoteza muda wako bure, mimi sina makosa, mengine ukiona nayafunika ni kwa masilahi ya kazi zangu, najua dunia ilivyo, fitina nyingi, ushindani wa biashara, ndio hivyo…’akasema Dalali.

‘Sawa…ila tunahitajia, kukutana na huyo muhasibu,..tuambie tutampata wapi, isije ikawa kam ya mtaalamu…’nikasema nikimuangalia mpelelezi.

‘Kwa hilo siwezi kukudanganya, mimi sijui…’akasema

‘Dalali, usitupotezee muda, mbona unakuwa na mashaka mashaka, unakosa gani..?’ akauliza mpelelezi.

‘Kwanini unasema hivyo afande, mimi sina mashaka yoyote..ila siwezi kusema huyo mtu yupo wapi, labda. Eeh wazo zuri, mpigieni simu yake mumuulize nyie wenyewe, nitasema labda yupo mahali fulani, kumba hayupo, mtasema mimi ni muongo…’akasema na mpelelezi akachukua simu na kuipiga hiyo namba tena.

‘Namba unayopiga kwasasa haipatikani, jaribu tena baadae…’ikasema hivyo

Mpelelezi, akamuangalia Dalali,…baadae akachukua simu yake akapiga namba…

‘Ni mimi..ndio,…nataka ufanye jambo,….uliniambia kuhusu maswala ya benki, ndio…ulishampata huyo mtu…basi naona kuna umuhimu umtafute, ..ndio ndio…sawa, nitasubiria kutoka kwako…’akakata simu na kugeuka kuniangalia mimi.

‘Naomba niongee na huyu mtu kwanza kuhusu maswala yangu..unaonaje maana muda umekwisha…’akasema mpelelezi.

‘Mhh..nilikuwa sijamalizana naye…’nikasema

‘Najua…lakini kuanzia sasa mazungumzo yote hayatafanyika hapa…ni muhimu na mimi nimuhoji, ila sijamuhohi hapa, nitamuhoji kituoni..’akasema mpelelezi.

‘Afande, samahani lakini mimi nimechoka, na huko kituoni kufanya nini,kwanini tusiyamalizie hapa hapa, kunipeleka kituoni ina maana gani, kuwa nimefanya kosa gani au mnanishuku nini mimi…?..’akasema Dalali kwa kuuliza hivyo.

‘Hujachoka bado..nikuambie kitu, ..nilikuambia tokea awali, ukweli wako ndio utakusaidia,..mimi nilipopata taarifa kuwa ushahidi wa benki unasimamia kwenye hukumu zilizopita kuwa hilo deni ni la marehemu, nilisharizika hivyo, lakini kwa jinsi ulivyoonyesha hapa, hata mimi naanza kushuku kuna jambo…’akasema mpelelezi.

‘Kuna jambo gani…?’ akauliza Dalali kwa kujiamini.

‘Ni kwanini unadanganya…?’ akauliza mpelelezi

‘Nilishaeleza hayo..kutokana na kazi yangu, siwezi kuongea mambo mengine mbele za kila mtu…’akasema

‘Mbele ya watu wako,… unaogopa pia, na mimi ni mtu wa usalama, natakiwa kuufahamu ukweli, huniamini hata mimi..?’ akauliza mpelelezi.

‘Kuna mambo mengine ya kazi zangu, naweza nisikuamini hata wewe…unajua tena hali ilivyo, sio kila kitu kipo sawa sawa, ili tufanikiwe wakati mwingine tuna njia zetu, na nji hizo nyie hamtazipenda, au sio, ni hali hali, hata wewe unafahamu afande…si unataka nikuambie ukweli, ukweli ndio huo…’akasema.

‘Dalali…mimi sijaanza kazi leo,…kuna jambo unatuficha, nilikupatia muda,..umeshindwa kuutumia vyema…sasa inabidi tuongozane mimi na wewe, na..huyu mtu wa jamii hadi kituo cha polisi..’akasema na hapo Dalali jicho likamtoka.

‘Kwanini kituo cha polisi…?, mimi nina makosa gani..?’akauliza sasa akimgeukia shemeji yake, kama vile mama mjane atamsaidia kwa hilo.

‘Natimiza wajibu wangu…’akasema mpelelezi.

‘Kwa kauli hiyo, basi mimi namuhitajia wakili wangu, ngoja niwasiliane na wakili wangu kwanza…’akasema

‘Mimi nakuita kituoni kwa kukuuliza maswali, ..sio kuwa nakushutumu kwa kosa lolote ..unasikia, na mojawapo ya maswali yangu ni kuhusiana na ajali ya kaka yako, iliyosababisha kifo chake…awali sikutaka kuliweka hili wazi kuwa mimi nakuhitajia kituoni, ila nilipofika nakuona kinachoendelea, nikadhamiria na mimi kukuhoji hapa hapa, lakini yaliyokuja kutokea yananifanya na mimi nione umuhimu wa wewe kuhojiwa kituoni..’akasema.

‘Lakini nilishakuambia…’akalalamika

‘Ndio, kwani una wasiwasi gani..?’ akauliza mpelelezi

‘Mi-mi…sina wasiwasi, laini kuitwa kituo cha polisi ina maana gani, kuwa unashuku mimi, kama unanishuku kwa jambo fulani, mimi kama raia mwema nina haki ya kusikia kosa langu au sio hiyo ni hali yangu..?’ akauliza

‘Huna makosa…nakuhitajia huko ili kutimiza wajibu wangu, kuhusiana na ajali ya kaka yako, na sasa pia kuhusiana na hilo deni la benki…’akasema.

Dalali akasogea akitaka kuchukua simu yake

‘Unataka kufanya nini…?’ akuliza mpelelezi

‘Nataka kumpigia simu wakili wangu…hiyo ni haki yangu…’akasema Dalali

Mama mjane, akawa anafuatilia hilo tukio bila kusema neno, baadae akaona asikae kimia, akasema;

‘Kwahiyo, mnataka kusema nini mbona sielewi kinachoendelea..?’ akauliza

‘Dada, ndio kazi imeanza,…usiwe na wasiwasi, …shemeji yako akitoa ushirikiano hili tatizo litakwisha, ila akiendelea kudanganya, …mimi sijui…’nikasema

‘Mimi sijadanganya bwana, nimeshawaambia kwanini vitu vingine nafanya hivyo..ila wewe tokea awali unanitishia sana, nilishakuona, sasa umeshatangaza vita dhidi yangu, tutaona…’akasema.

‘Dalali, dalali…vita ukitangaza na mimi umetangaza vita na familia yako, mimi nayafanya haya kwa ajili ya hii familia, sio zaidi ya hapo..’nikasema

‘Mnafiki wewe,..wewe njaa yako itakuponza, wewe ngoja tu…’akasema

‘Usijali, pindi hivi tutapata chakula au sio, mnada ukipita na mimi siutanikatia kiasi,…usinisahau Dalali, nimeona hata huyo mtu wa benki kasema usimsahaau..unajua ni kwanini…huyo anajua kila kitu au sio….?’ Nikamuuliza.

Dalali hapo akanitolea jicho, utafikiri anataka kunimaliza

‘Utaona…’akasema Dalali

‘Huko kituoni au, unamtegemea Mtaalamu, mtaalamu hayupo nawe sasa, anajipigania nafasi yake, au niaona nini ndugu yangu ..?’ nikauliza.

‘Ninakuambia ukweli…mimi sina kosa, yote niliyoyafanya nimetimiza wajibu wangu tu, na kazi kubwa ilikuwa kuhakikisha kuwa roho ya bro, inakuwa salama, deni ukifariki ni nani atalipa eeh, watakaomsaidia marehemu ni waliopo duniani, mimi nimefanya kosa gani hapo…’akasema akimuangalia shemeji yake.

‘Mimi sijui kitu…ninachotaka ni uhakika wa hilo deni, ila ..kauli yangu hadi kesho, hilo deni sitaweza kuamini kuwa ni la marehemu mume wangu…’akasema mjane.

‘Kwahiyo shemeji umenigeuka au sio…usifikiri kwa kufanya hivyo ukweli utabadilika, na…naenda polisi, je yalitokea yaliyotokea kwa mtoto ni nani atakusaidia…?’ akauliza Dalali.

‘Mungu yupo, atanisaidia…’akasema mama mjane.

‘Ndio hivyo shemeji umeshasahau fadhila…’akalalamika Dalali.

Mpelelezi, sasa akamkabili Dalali..

‘Tusipoteze muda, twende…’mpelelezi akasema na Dalali, akawa hasogei.

‘Mimi siwezi kuondoka hapa mpaka wakili wangu afike..’akasema Dalali sasa akijitutumua.

Mpelelezi, akatikisa kichwa, ..akashika simu yake…akaanza kupiga namba, na Dalali kwa haraka naye akachukua simu yake akawa anapiga namba,..

WAZO LA LEO: Njia ya muongo ni fupi…njia ya dhuluma ina ukomo wake, hata iweje dhuluma kamwe haidumu.

Ni mimi: emu-three