YOTE NI KWA MAPENZI YA MUNGU-6

Hali yangu ikawa tete, sijiwezi kabisa siku hiyo nilihis kama nataka kufaa, ….ikabidi niende hospitalini, nikapimwa kila kitu , hakukuonekana tatizo lolote kwenye vipimo, na wakati nataka kuondoka, docta akaniambia;

‘Hiyo hali kwa uzoefu wangu, ni bora ujaribu upande wa pili…’akasema

‘Una maana gani docta…?’ nikauliza

‘Kiuzoefu wangu, matatizo kama hayo hutaweza kupata tiba sahihi hospitalini, kuna njia mbili, nenda kwa watu wa dini upate msaada wao,…imani inasaidia sana,  au nenda kwa waganga wa tiba mbadala, na wao wanasaidia, lakini kwa waganga wanaoaminika, sio wa shiriki…’akasema.

‘Docta…ina maana…’nikataka kuongea.

‘Aaah, usinielewe vibaya, ni ushauri tu, mimi nimekuwa katika hii fani kwa muda mrefu sana, najua ni nini ninachkushauri, lakini ni uamuzii wako,  ..dawa hizi hapa za maumivu, tumia uone kama zitakusaidia, au nikuandikie uende hospitali za juu labda huko watakupatia matibabu zaidi…’akasema na kuniangalia.

‘Ahsante docta nimekuelewa…’nikasema na kuondoka, nikafika nyumbani nikajilaza kwenye sofa, nikawa nahisi njozi si njozi,….nikuwa kama mtu aliyechanganyikiwa, nikaona sasa nitaharibikiwa, kwa haraka nikasimama, nikatoka nje, na kuelekea kwa jamaa yangu ambaye kaiva sana kwenye dini, nikamuelezea, akasema;

‘Hayo yanatokea, .. nitakusaidia,….’ Akasema na kweli alinisaidia, kwani baada ya hapo, nikahisi nipo vizuri, japokuwa bado mwili ulikuwa mdhaifu.

Hiyo ni siku ya pili, kwa makubaliano yangu na yule jamaa , bado siku moja…

Tuendee na kisa chetu

**********

Nilipojiona nipo vizuri, nikakaa kutafakari tatizo la yule mama, na hizo njozi zinazonitokea mara kwa mara,… kwanza nilianza kujiwekea vikwazo mwenyewe, kuwa kwa vile yule mama alishakubaliana mambo yaishe nyumbani, basi, haina haja ya mimi kujisumbua,…lakini, kabla sijamaliza kuwaza zaidi mara simu yangu ikaita, ilikuwa sauti ya mwanamke;

‘Shemeji unaendeleaje…’ilikuwa sauti ya yule mama

‘Sijambo, vipi wewe na watoto..?’ nikauliza

‘Hapa nilipo …natamani hata kuikimbia hii nyumba, matatizo yanazidi kuongezeka, ….yaani usiku sikulala, sasa hivi ndio mtoto kaweza kulala…nimeambiwa tatizo ni mimi sikutaka kutimiza niliyoahidi, Natafuta mbinu nyingine ya kuanzisha matatizo, ….sasa tafadhali, naomba tuyaache kama yalivyo, unasikia shemeji…nashukuru sana kwa kujali, lakin kwa hatua hii, basii tena…’akasema

‘Shemeji nakuja…’nilijikuta nimesema hivyo na kukata simu, …sijui kwanini, hali fulani ikanivuta na haikupita muda, nikawa nimeshafika pale nyumbani kwa yule mama.

Wakati nakaribia kwenye hiyo nyumba nikakutana na mzee mmoja, huyo mzee alikuwa akikagua hiyo nyumba kwa nje, katika kusalimiana, tukajikuta tupo kwenye maongezi, baadae akasema;

‘Hawa akina mama jamani, …hawamuogopi mungu kabisa…’akasema

‘Kwanini unasema hivyo…?’ nikamuuliza

‘Kuna kitu nakujua sana humu, nimekiona kwa macho yangu mimi mwenyewe…kipindi kile nilitaka kumuelezea marehemu lakini roho ikawa inasita, sasa najuta kwanini sikumuambia…’akatulia

‘Kitu gani..?’ nikamuuliza na akageuka kuniangalia, halafu akasema

‘Kwanza…wewe ni nani na huyo mama, mjane…?’ akauliza

‘Mimi natafuta ukweli halisi ya yanayotokea hapa, huyo mama anahitajia msaada wa kijamii kwakweli,…lakini nashindwa kuupata huo ukweli…’nikasema

‘Ukweli..hahaha..kesi  ya nyani unamuuliza ngedere, ..nyie watu jamani, ulizeni majirani…’akasema

‘Kwani kuna nini …majirani wanakijua zaidi ya wenye nyumba…?’ nikamuuliza

‘Unajua mimi nilikuwa karibu sana na hiyo familia,..yule marehemu alikuwa kama kijana wangu, hata wakati ananunua hili eneo mimi nilimsimamia, kwahiyo akaweka kama mzazi wake,…na unajua tena hali zetu wazee, siku  nikikwama, nakutana na marehemu ananisaidia kwakeli mola amsaidia huko alipo kwa wema wake huo.

‘Kwa ule ukaribu wangu, eeh, nakawa nafika sana hapo nyumbani,, wakati mwingine namkuta mwenyewe, wakati mwingine mkewe,….naweza hata nikashinda hapo nikiwasaida kazi ndogo ndogo maana mimi kitaaluma ni fundi,…kwa ajili ya ukaribu huo, nikawa  najua ni nini kinachoendelea, lakini sikuwahi kumuambia marehemu, unajua tena mambo ya familia ya watu, sikutaka sana kuingilia, ila nilipanga nije kukaa na huyo marehemu kama kijana wangu nimnasihi,..hata kama angesema anawaita…hao wanaomzunguka, nilikuwa tayari kuongea mbele yao…’akasema.

‘Ok….unataka kusema nini labda, ..maana nina haraka kidogo…’nikasema

‘Huyu mjane , sijui ni kwa kutokujua, au ni tamaa za wanawake,..’akatulia kidogo..hapo nikahisi kitu kikigonga kichwani, nikasema moyoni, mambo yanaanza kujileta yenyewe.

‘Ehe….kwavipi…?’ nikamuuliza

‘Kulikuwa na hali ya ukaribu kati ya mjane na shemeji mtu, huyo ambaye kakabidhiwa kazi ya kuitunza hiyo familia, na…kinamna fulani, hatuombei mabaya, kuwa labda walipanga njama za kifo cha marehemu hapana, sipo huko…’akatulia

‘Kwani marehemu aliuwawa..?’ nikauliza

‘Alipata ajali…’akasema

‘Ehe…’nikasema

‘Mimi ninachozungumiza hapa ni tamaa ya mali,..kulikuwa na njama za wawili hao, kumzunguka mwenye nyumba,… njama hiyo ilianzia hata kipindi marehemu yupo hai, lakini marehemu hakulifahamu hilo,…’akasema

‘Njama gani labda labda…?’ nikauliza kwa mashaka, nikijua fitina inaanza.

‘Kumfisidi  marehemu,..wanawake wana maana hao, wewe ulishauliza huyo mwanamke ni kabila gani kwanza, kabila hilo lina tamaa sana ya mali…’akasema na mimi kiukweli sikuwa na mawazo hayo ya kikabila kabisa.

‘Mhhh..sijakuelewa…’nikasema

‘Sasa,  sikiliza…lakini sikuwahi kuona dalili ya mapenzi, hilo halipo, huyo mama, hana hiyo tabia mbaya,…mimi naongelea hapa ni, tamaa tu, …shemeji mtu naye ana tabia hiyo, kwahiyo wakakutana watu wawili wenye hulka sawa, …sisemi kabla tu linaweza kuwa na hulaka hiyo, maana shemeji mtu yeye sio kabila hilo…’akatulia

‘Ok, endelea…’akasema

‘Shemeji mtu yeye, naye ..unajua kazi yake tena, ni ya tamaa , tamaa…wewe unawafahamu madalali walivyo,..ghilina nyingi tu, akamuingia huyo mama kwa lugha tamu, na mama bila kujitambua akaingia kwenye kingi…’akageuka nyuma kaam kuogopa kusikiwa.

‘Sasa..mungu hamfichi mnafiki,..huyo mama kasoma kweli,lakini akili ..siwalaumu, sio wote, lakini hawa akina mama, wengine hawaoni mbali,… taama ya kutokuona mbali,akawa amekubaliana na shemeji mtu, mengi yamefanyika humo…utayasikia mwenyewe ukiwa mjanja…na kwa vile sasa hawaelewani kivile kwasababu wamedhulumiana, ni rahisi kugundua zaidi.’akasema

‘Mhh…siwezi kukuamini sana…’nikasema

‘Sio lazima uniamini, ila kwa vile ..nimekuona wewe ni mtu mwema, unataka kuufahamu ukweli kiundani, endelea kuwahoji,…hii nyumba inapigwa mnada,..kisa ni nini, eti ni deni, marehemu alikuwa sio mtu wa kukopa yule..hilo deni limepikwa na wawili hao…chunguza mwenyewe utakuja kufahamu  huo ukweli…’akasema.

‘Una uhakika gani na hayo maneno yako…?’ nikamuuliza.

‘Uhakika…nimekuambia mimi nilikuwa nashindwa hapo, ..wakati mwingine nipo nje, napaka rangi nyumba, jamaa anakuja, wanaongea, msikio hayana pazia,….kiukweli iliniuma, lakini, mungu yupo..sasa tatizo jingine huyo mwanamke hakuwa kamfahamu huyo shemeji kuwa, huyo ndugu ni…hahaha, haaminiki,..mwenzake alimtega, na sasa atakosa yote, dhuluma haina maana kabisa…na ipo siku dhuluma yao itawatokea puani…’akasema

‘Una uhakika na hilo unalolisema, maana nijuavyo mimi, huyu mama anahangaika kutafuta haki za watoto wake, atafanyaje ujinga huo, na kuwaumiza watoto wake mwenyewe, hili haliingii akilini,, na huyo shemeji yake atafanyaje jambo kama hilo kumharibia kaka yake..usije ukawa umesikia tu, au kuhisi tu…’nikasema.

‘Hahaha…wakati wanafanya hayo, mke anawaza kujiwekezea hata likitokea lolote awe na mali yake mwenyewe,…alishaona mume kabobea kwa ndugu zake zaidi, mume hamuweki mbele mke kwenye mali zake, unasikia,mke inamuuma, lakini afanyeje,..'akatulia kidogo

'Sasa ndio sijui ni wazo lake au ni wazo la shemeji yake, wakaja kupiga jambo..hilo jambo siwezi kukuambia…nahisi marehemu alikuja kugundua hizo njama, kuna kipindi wanandoa hao walikuwa katika mgongano, wakayafukia kiaina,, ..sasa chunguza kisa cha mgongano huo,ilikuwa ni nini...'akatulia

'Hicho kisa...huo mgongano, sema, unajua tena kuogopakuingilia mambo ya watu, nilitaka nimtonye marehemu,...ila wewe, ukitaka ukweli anzia hapo, mwenyewe utakuja kuniambia…'akatulia

'Sasa , kama mambo yangeenda vyema, kukawa hakuna kugeukana,...huyo mke angekuwa na mali yake, na shemeji mtu na mali yake, wanamfisidi marehemu…lakini mungu ana yake, kijana wangu katangulia mbele ya haki,...watakula wapi tena.

'Iliyobakia sasa ni kugombea mali...wanandugu wengine waliligundua hilo mapema, walisubiria hiyo nafasi,..., ndio maana wakakimbilia kuchukua mashamba yote, kumkomoa huyo mwanamke, na shemeji mtu si mjanja, akapata chake, mwanamke akakosa kote…sasa kipo wapi, ..haya nyumba nayo, ndio hiyo tena, kuna jambo humo….kuna mambo humo..’akasema akinyoshea kidole nyumba.

‘Ina maana huyo ndugu mtu na ndugu zake sio kitu kimoja,..au..?’ nikauliza

‘Huyo ndugu mtu, ndumila kuwili, mjanja sana, mtoto wa mjini…, anakula huku na kule…achana naye kabisa, nawafahamu wote hao,…hahaha, eti nini…hahaha, tuyaache hayo, kama upo karibu na huyo mama, mbane vizuri, utakuja kuugundua ukweli  wote wewe mwenyewe, ..'akanisogeela karibu, kama ananing'oneza.

''Ukweli ni kwamba mbele ya mali,..eeh, mali ni fitina,...binadamu sio watu wazuri, angalia sana hilo, kama kweli wewe ni mtetezi wa wanyonge, ..eeh, nimesikia hivyo kuwa wewe unafanya hivyo..au sio.'akanikodelea jicho.

'Mhh...'mimi nikaguna tu

'Si ndio hivyo,...sawa, hata hivyo,... hata sijui kwanini nimekuambia hayo, ila moyo wangu utafurahi, kama kuna mtu anataka kuutafuta ukweli, ili haki ije kutendeka kwa ajili ya marehemu, na watoto wake, lakini sio kwa huyo mwanamke au huyo shemeji mtu, watu wabaya sana hao…’huyo akaondoka zake

************

 Mimi nikasogea hadi kwenye hiyo nyumba, nikaingia ndani, hali ilikuwa kama siku ile, watu wanafika, wanakagua nyumba wanaondoka, japokuwa sio kwa wingi ule wa siku ile,…na tangazo bado lilikuwepo.

Nikamkuta huyo mama, yupo anafanya fanya usafi kwa nje…aliponiona akashtuka kidogo, akaacha kile alichokuwa akikifanya na kunikaribisha ndani. Nilimkagua usoni,, sikuona bashasha  za ukarimu, ni kama vile anashindwa kuniambia tu ondoka….na mimi sikujali, nikawaangalia watoto, walikuwa wamekaa chini wanachezea vitu,…na nafsini nikawa kwenye kuomba kinga ya mola wangu na majanga,…na maneno ya yule mzee yakawa yananitawala nafsini mwangu;

Baadae shemeji akaja na kukaa, kunisikiliza….

‘Shemu, kiukweli hali yangu ilikuwa mbaya, nilijiona kabisa naelekea kuzimu, na kwa ushauri wa docta, nikaenda kumuona mtu mmoja wa dini akanisaidia…na baada ya hapo, nilijiwa na wazo kuwa hili jambo kama ulivyotaka basi tuliache tu, kwa masilahi ya afya za watoto…’nikatulia na yeye hakusema neno, akawa kainama chini.

Baadae akainua kichwa,..niliona machozi yakimtoka, sikumuelewa hapo, nikawa nimemuangalia tu, akasema;

‘Sijui…niende wapi,…sijui ni nani anaweza kunisaidia,…sijui kwanini imekuwa hivi…ina maana watachukua haki ya watoto wangu, sasa nitafanya nini tena, lakini mungu yupo, kama ni kwa mapenzi yake iwe hivyo, nitafanya nini, na..pia kama ni kwa mapenzi yake dhuluma hii ikome,nitashukuru pia,…oh, sawa hamna shida…’akasimama ;

‘Shemeji nisikiliza kwanza…’nikasema

‘Hapana wewe unaweza kuondoka tu, sio kwamba nakufukuza, hapana, ila mimi  nina kazi nyingi za kufanya, …kupanga panga vitu , na kuona wapi nikaviweke, kabla ….si ndio hivyo,  kesho hao watu wanakuja kupiga mnada au…?’ akauliza

‘Shemeji, sijamaliza kukueleza nilichotaka kukuambia, hebu nikuulize shemeji yako alishafika mkaongea naye …’nikasema

‘Bado, …hajafika bado….’akasema

‘Sasa ni hivi shemeji, ….nilitaka…’nikasema na yeye akanikatisha kwa kusema;

‘Nimeshakuelewa ….najua, kwa hali uliyokutana nayo, hutaweza kufanya lolote tena, au sio, na kwa vile mimi nilishakubaliana kuwa haya tutayamaliza kinyumbani, na kinyumbani ndio hivyo, shemeji alishanishauri kuwa tuache nyumba ipigwe mnada tu,….hamna shida, unajua shemeji..hata ingelikuwa mimi, nisingeliteseka kwa kitu kisichowezekana au sio…’akasema

‘Sikiliza shemeji …’nikasema

‘Nimekuelewa,……na kutokana na hali za watoto, basi,iliyobakia tunyoshe mikono juu, au sio…’akasema

‘Hapana…baada ya kufikiri sana, kuna hali ilinitokea, nilihisi taswara ya wewe na watoto wote mnalia, ..mnalia nini,…’nikatulia kidogo.

‘Kilio chenu kinaashiria kuwa mimi nimewaacha,.. ni njozi ilinitokea wakati nimelala, hata kabla….ina maana wakati unanipigia simu nilikuwa ndani ya mapambano ya kufikiria, nifanye nini sasa….’nikasema

‘Sawa…nimekuelewa, hamna shida..’akasema

‘Nataka nikuulize maswali, majibu yake yatanisaidia kuamua…’nikasema

‘Maswali gani tena shemeji, unataka kuanza tena …?’ akauliza sasa akinishangaa

‘Hebu  kwanza, nikuulize,  ulipoweza kufika benk uliona jinsi gani huo mkopo ulifanyika, walikuonyesha huo mkataba, na ukasoma maelezo yake, je ndani ya hayo maelezo kulikuwa na nini, je huo mkopo  ulitolewa kwa ajili gani hasa.., kufanyia biashara, kujengea au kufanyia kazi gani, …?’ nikamuuliza, alikaa kimia kwanza bila kunijibu nikajua labda hataki kuongea tena, na ghafla akasema

‘Mhh, huo mkopo …walisema ulichukuliwa kwa mambo mbali mbali, ikiwemo biashara,…hiyo biashara ni kwa ajili ya marejesho,…na haukuweka vikwazo kuwa uwe kwa ajili ya biashara tu, kwa vile mkopaji ana dhamana thabiti, basi, ….banki wao walikubaliana awe anachukua hadi kiwngo fulani,..baadae kikawa kinaongezeka…sikuendelea kusoma zaidi kwakweli…’akasema

 ‘Kwahiyo unasema kuwa mkopo haukuwa na kiwango….pesa inachukuliwa na kuna marejesho pia, au sio…na marekesho yake ni kutokana na biashara aliyokuwa akifanya mume wako, ya halali, au sio…,  na dhamana ya mkopo huo,  ikawa ni nyumba, au sio..hayo yote uliyaona au sio?’ nikauliza

‘Ndio…..’akasema

‘Sasa kama sikosei, kuna sehemu awali ulisema mkopo huo uliendelea hata baada ya mume wako kufariki, au..?’ nikauliza

‘Ndio..lakini…’akataka kutoa maelezo.

‘Ina maana shemeji yako aliendelea kuchukua pesa benki,…, kwa ajili ya matibabu yako..?’ nikauliza

‘Ndio, yeye aliniambia hivyo, ….’akasema

‘Shemeji…. ukiwa na maana huyu aliyechaguliwa kuwa msimamizi wenu…?’ nikamuuliza kuwa na uhakika zaidi

‘Ndio, yeye ndiye angeliweza kufanya hilo…., huyo  aliyechaguliwa kama msimamizi wa mali ya marehemu mume wangu…’akasema kabla hajatulia  nikauliza swali la haraka haraka

‘Ulisema yeye  alichaguliwa kuwa msimamizi wa mali ya marehemu mume wako wakati wewe hujitambui au sio na baadaye ulipoanza kujitambua mkawa mnashirikiana naye au sio?’ nikamuuliza

‘Ndio kama nilivyosema awali, kipindi hicho, nilikuwa sijiwezi,  sikuwa na utambuzi mnzuri, nilikuwa kama maiti tu,….wanasema nilikuwa kama nimechanganyikiwa siongei, nipo nipo tu, na nikiongea naongea mambo ambayo hayaeleweki…ni baada ya kuondokana na ile hali ya `kuparalaize,’ na akili kunirejea tena,….kwa shida shida, maana yameshakufika utafanyaje…..nilianza kupambana na hali yangu…’akasema

‘Kwahiyo hukuwa unaweza hata kuandika au sio………?’ nikauliza

‘Ndio…kwa kipindi kile…sikuweza hata kuinua mkono,….ulikuwa mwil kama sio wangu….’akasema

‘Sasa kuhusu huo mkopo, ujuavyo wewe, kama ulivyoona, au kama ulivyoanza kufuatilia, ni lini aulianza rasmi, …?’ nikauliza

‘Mhh…hilo sikuweza kuliona, maana walinipatia statement ya karibuni, ila kunaonyesha kuwa kuna deni lilitoa kabla ya hapo,…’akasema

‘Na kwa maelezo yao, pesa ilikuwa inachukuliwaje, kwa  kila mwezi, au mara kwa mara na kwa kiwangoo gani, ni kiwango kile kile au kuna utofauti wa kiwango…  maana nauona utakuwa ni mkubwa sana …’nikasema.

‘Hilo ndilo lilinifanya ning’ake, kwanini wamemsinginizia mume wangu kuwa yeye ndiye aliyeanzisha hilo deni, na …nakuanza kukopa, huko benki hata kabla hajafariki, …kwa shida gani tulikuwa nayo, na kwanini hakuaniambi, hapo ndio sijakubaliana nao…na deni lenyewe ni kubwa, sio deni dogo, kipindi chote tupo na mume wangu hali ilikuwa nzuri tu, maisha mazuri, kwanini aende kukopa….’akasema.

‘Hayo uliyajulia huko benk, wao ndio walikuambia,, yaani wao ndio walikupatia maelezo zaidi au ni kwa kusoma ule mkataba….?’ nikamuuliza

‘Siku nilipoamua kufuatilia, niliambiwa deni hilo ni la siku nyingi, limeanzia kipindi mume wangu akiwa hai, na kumbukumbu zinaonyesha hivyo, alikuwa anachukua anarejesha, ni statement ya benk inaonyesha hivyo, na anachukua kiasi kikubwa, au kidogo,…na akirejesha, hakamilishi, inabakia salio…salio likawa linakua…’akasema

‘Nauliza hivyo, aliyetoa hiyo kauli kuwa mume wako ndiye alianza kukopa, ni nani..?’ nikamuuliza

‘Ni watu wa benk….’akasema

‘Hapo sasa tunakwenda sawa, watu wa benki ndio waliokuambia hivyo au sio….’nikasema

‘Ndio hivyo….’akasema kama vile anajua nimemalizana naye, nikamuuliza

‘Nirudi nyuma kidogo, …ulifanya yote hayo , kufuatilia, ni baada ya kwenda mahakamani kufuatilia ili kuweka pingamizi  si ndio hivyo…au ulikwenda kuangalia hilo deni, hata kabla hamjakwenda mahakamani…?’ nikauliza

‘Ndio hivyo …..nilipopokea hiyo barua ya kuwa nyumba itapigwa mnada deni lisipolipwa, …nilichanganyikiwa kabisa, sikujua ni deni gani, na kipindi hicho shemeji alikuwa hayupo kasafiri sehemu ya mbali na hatarajii kurudi karibuni, nikaonana na mtu ninayemfahamu, yeye ndio akanisaidia, tukafungua pingamizi,…na ndio nikaamua kwenda benki kabla ya kwenda mahakamani…’akatulia.

‘Ok, ikawaje…?’ nikauliza

‘ Basi nilipofika ndio nikaonyeshwa na kupewa maelezo kidogo, awali walisema nije kwanza na muhusika, aliyekebidhiwa, lakini baada ya kujielezea kuwa mimi ni mke wa marehemu, wakathibistiha hilo, basi ndio, nikapewa maelezo …’akasema

‘Ikawaje..?’ nikamuuliza

‘Nilishindwa nifanyaje,..nikaona nimsubiria shemeji aje kwanza,..katika kuhangaika nikakutana na rafiki yangu mmoja akaniambia, ni muhimu twende mahakani iwekwe pingamizi…alipofika shemeji nikamwambia hilo. Yeye akasema sawa….’akatulia

‘Ndio hivyo tukafika mahakamani kabla ya kesi, kuna kusikilizwa kwanza,  nikaambiwa nipeleke vielelezo vya kusaidia hilo….nikauliza vielelezo gani…?,  wakaniambia vya kuthibitisha madai yangu…sasa hapo…uone, mimi ningevipata wapi hivyo vielelezo…’akatulia

‘Ndio nikarudi kwa huyo rafiki yangu akanishauri niende benki, na ndio nikakutana na hiyo kauli, kuwa hilo ni deni ni la siku nyingi….halikuwahi kulipwa kutokana na makubaliano,…kuna mkataba wa mkopaji na benki  ulitaka deni hilo lilipwe kwa kiasii fulani kila baada ya muda fulani, lakini haikuwahi kulipwa….,

‘Nikaomba tu nipewe hiyo statement,ili niweze kuipeleka  mahakamani …ndio wakanipatia kwa haraka nikarudi kule mahakamani,  nikaambiwa hiyo haitoshi, natakiwa nakala ya mkataba, hati za malipo na vitu kama vitatu hivi,……ilikuwa kazi kuvipata kwa watu benki, maana ilibidi nirudi tena mahakamani wanipe barua, ndio nikarudi tena benk wakanipatia…..’akasema

‘Na muda wote huo mnaongozana na shemeji yako…?’ nikauliza

‘Ndio…’akasema

‘Kwahiyo ndio ukagundua kuwa deni  hilo ni la siku nyingi au sio, kama ni la siku nyingi ni kwa muda gani, ni kipindi gani,…ina maana ni kipindi mumeo yupo,…na kwahiyo haina shaka, ni kweli mume wako analifahamu hilo deni..’nikasema na kabla sijaendelea akanikatisha kwa kusema;

‘Mume wangu hajachukua mkopo…nimeshakuambia unielewe, mume wangu hakuwahi kuchukua mkopo, huo ni uwongo….’akasema kwa hasira,

‘Lakini huwezi jua, yawezekana mume wako alichukua mkopo huo kwasababu ya kupanua biashara, hakutaka kukuambia hilo, sizani kama benki wanaweza kutoa kitu cha uwongo…, hebu nikuulize wewe una uhakika gani kuwa mume wako hakuwahi kuchukua huo mkopo,…. ?’ nikamuuliza

‘Nina uhakika, kwa hilo na kamwe sitokubaliana nalo kabisa, ….hebu jiulize yeye kila siku alikuwa akinikanya nisije nikachukua mkopo wenye riba…na huo mkopo wa benk unaonyesha riba,…na wanasema kila mara wanatoa statement ya kuonyesha hilo deni, mimi sijawahi kuiona hiyo humu ndani, ina maana alikuwa akiweka wapi….’akasema

‘Ina maana wewe kila kitu cha mume wako, mambo ya biashara , na mambo mengine yote ulikuwa unayafahamu…?’ nikauliza

‘Kwa kiasi kikuba ndio, hakupenda kunificha jambo, biashara zake zinakwendaje, hasara na faida, alikuwa ananishirikisha,na kwa vile na mimi nafahamu mambo ya ofisini, huwa tunakaa pamoja kupanga matumizi,…na wapi pa kupatia pesa za hayo matumizi, hajawahi kusema nimekwama hapa, ngoja nikakope,..hajawahi hata kuniomba na mimi nichangia matumizi ya nyumbani,…’akasema

‘Hebu nikuulize , huko benki walipokupatia hizo hati, hivyo vielelezo, si vyote vinaonyesha  sehemu mume wako alipoweka sahihi yake…hata kwenye mikataba ya deni hilo,kuna sahihi yake au sio,  je  nyaraka zote hizo uliwahi kuziangalia kwa makini, hukuona sahihi ya mume wako,…?’ nikamuuliza

‘Ndio….walinionyesha vyoye hivyo,….’akasema

‘Na sahihi ya mume wako unaitambua vyema,….?’ Nikamuuliza

‘Ndio …naitambua vyema…’akasema

‘Na kwenye mikataba hiyo, uliona sahihi kuwa ni yake au sio….?’ Nikauliza

‘Ndio ni sahihi yake…ndio hapo nikachanganyikiwa, lakini haiwezekani, sio yeye, siamini kabisa….na kingine kwenye hilo deni jipya eti na mimi nilihusika nikaweka sahihi yangu…sikumbuki kufanya hivyo, ila….’akasita kidogo

‘Deni jipya, kwahiyo kuna madeni mawili, au zaidi ya hilo….?’nikamuuliza

‘Ni hivi deni hilo, sio la siku moja, linakua kila pesa inapochukuliwa,…sasa deni hilo likaja kuongezeka hata mume wangu alipofariki,…lakini baada ya kufariki, ilibidi kuwa na watu wapya wa kuendelea kuchukua pesa, na utaratibu mpya, …shemeji akawekwa, na mimi, lakini mimi nilikuwa naumwa, yeye kwa kibali cha benk akaendelea kuchukua pesa.

‘Ehee….hapo sasa….’nikasema

‘Hapo sasa ...una maana gani...?' akauliza

'Hapo ndio nataka kuelewa zaidi...'nikasema

‘Unajua labda hatuelewani…hiyo ni akaunti ya benki ya mume wangu, kwenye hiyo akaunti, ndani yake kuna pesa zilichukuliwa kama deni,  na sio mara moja,….pamoja na hayo, pia ni akaunti yake ya pesa za biashara, kwahiyo kuna kuchukua na kurejesha,,…’akasema

‘Lakini sehemu hiyo ya mkopo, yaani pesa za mkopo si kuna stakabadhi zake, …kuashiria kweli mkopo ulichukuliwa, ukaingizwa kwenye hiyo akaunti, pesa ikawa inatumika, au sio…?’ akaulizwa

‘Ndio zipo….na pia, yeye eti kutokana na shughuli zake pia aliomba awe anachukua zaidi ya salio lake, na kutokana na hiyo mikopo, ikawa sasa inaonyesha, yeye anachukuza zaidi ya kuweka, deni linakua kila siku,….kifupi hiyo ni akaunti yake  endelevu, anachukua, anaweka, anachukua pesa, anarejesha, cha ajabu , deni lilikuwa linaongezeka tu, kuliko marejesho…’akasema

‘Kwa kipindi cha nyuma yeye alikuwa anaweka sahihi yake  peke yake katika kuchukua pesa au sio, wewe ulikuwa huhusiki, au sio…?’ nikamuuliza

‘Ndio…’akasema

‘Wewe ukaja kuongezwa na shemeji yako, na hyo ni kutokana na mujibu wa mirathi au sio kuwa wewe na shemeji mtu muwe wasimamizi wa mali ya marhemu, na wewe uliwekwa hasa hasa kwa ajili ya kusimamia, upande wa watoto..au sio?’ nikauliza

‘Ndio…’akasema

‘Lakini kwa vile ulikuwa unaumwa, wewe hukuwahi kuhusika, tokea awali au sio..?’ nikauliza

‘Kuna sehemu wanadai na nilihusika,…baada ya kupata nafuu, lakini mimi sikumbuki…kufanya hivyo,…’akasema

‘Una maana gani..?’ nikauliza.

‘Wanasema kwenye muendelezo wa hilo deni,  sehemu za mwisho mwisho mimi nilihusika, …’akasema.

‘Kwa vipi…?’ nikauliza.

 ‘Wamenionyesha sahihi yangu, kuwa niliweka sahihi, ya kuchukua pesa..na kweli sahihi yangu hiyo ipo..’akasema

‘Una uhakika ni sahihi yako…..?’ nikamuuliza

‘Ndio…’akasema.

‘Na je kwa kumbukumbu zako, shemeji yako akitaka kufanya jambo wakati umeshaanza kujielewa, alikuwa akikushirikisha..?’ nikauliza

‘Mara nyingi,  shemeji alikuwa akija kwangu japokuwa sijiwezi kujiinua, baada ya kuanza kujitambua na ananiambia anataka kufanya hili na lile, mimi naitikia tu kwa kichwa…maana japokuwa nilikuwa sijiwezi kihivyo, kichwa kilikuwa kinaweza kutikisika, kuona, kusikia…..’akatulia kidogo

‘Na kwa vile nilimuamini, na yeye ndiye aliyechaguliwa  kuwa msimamizi wa kila kitu sikuwa na shaka naye, na nilikuja kujua hiloo kuwa yeye ndiye msimamizi nilipojitambua, walifika shemeji na baadhi ya ndugu zangu wakaniambia , kinachoendelea, nikiwa kitandani, nikawaitikia tu kwa kichwa.

‘Na ndio nakumbuka pia, kuna kipindi alikuwa akija huku analalamika kuwa hali ngumu, lakini akasema nisiwe na wasiwasi atajitahidi kuweka mambo sawa….ni hivyo ninavyokumbuka mimi….’akatulia

‘Lakini hakuwahi kukuambia anataka kuchukua pesa benk ….?’ Nikamuuliza

‘Kwa hilo, hakuwahi,... sikumbuki kitu kama hicho, sizani, labda kama aliniambia kipindi sijitambui…yawezekana, aliniambia kipindi hicho, na huenda  nikaitikia, lakini kusema kweli, sikumbuki, na kwa vile alishapewa hayo mamlaka ya kufanya aonavyo ni sahihi, labda alioona kuchukua pesa kama mkopo ni sahihi…’akasema

‘Kwa vile hukumbuki, yawezekana pia alikuambia uweke sahihi ya mkopo, ukaweka, na umesahau kuwa ulifanya hivyo  au sio?’ nikamuuliza

‘Hapana, hilo haliwezekani kabisa….nimejaribu kukumbuka, ..haijatokea, …wasinifanye mimi mjinga, na kwanini kama ni hivyo, anifanye niweke sahihi kitu kama hicho, wakati anajua sijitambui…hebu kumbuka kipindi hicho mimi ni mtu wa kulala….alinifanyaje mpaka nikaweka sahihi….mhhh, mimi kwakweli hapo sikumbuki….sijui kwakweli..’akasema

‘Je unahisi shemeji yako anaweza kufanya hivyo, yaani kufanya ujanja ujanja kwa nia mbaya ya kufisidi mali za ndugu yake , kwa masilahi yake…kwa hisia zako tu,..?’ nikamuuliza, nahapo akabaki kimia kidogo, na kwa muda huo mtoto wake yule mkubwa kidogo alikuwepo, akasema;

‘Mama muambie tu, baba huyu atatusaidia,…’akasema na mama yake akamuangalia kwa sura ya kumuonya

‘Ukweli gani mtoto anataka uniambie,...shemeji ili niweze kulifanikisha hili naomba usinifiche kitu, mimi nipo hapa kwa nia njema kabisa, kwa hiyo usiogope, ..hayo ya vitisho hayatatokea tena…’nikasema

'Sikufichi kitu....'akasema

'Na..kuna mzee mmoja jirani yenu, nimekutana naye hapo nje, mnafahamiana naye kivipi...?' nikauliza akawa kama kashtuka kidogo, halafu akauliza

'Mzee Mtupe au...?' akuliza

'Sikumuuliza jina lake....'nikasema

'Huyo mzee..kwani kakuambia nini...?'akasema na kuniuliza hivyo akionyesha uso wa mashaka;

NB: Hiki kisa kilikuwa hivyo, mwendo wa maswali na majibu, ni kisa cha aina yake na ukweli ukaja kupatikana hivyo hivyo,msichoke…

WAZO LA LEO: Fitina ni mbaya sana, usijaribu kurubuniwa, ili ujenge fitina , kwasababu ya masilahi kidogo tu ya kukidhi haja ya tumbo lako, hujui hiyo fitina itakuwa na madhara gani kwa jamii…neno dogo tu, au udanganyifu mdogo tu, unaweza ukafikia hadi kuua, je huoni kuwa wewe ndiye utakayekuwa umeua….

Ni mimi: emu-three