WEMA HAUOZI-58

Baada ya maelezo hayo mtaalamu akatulia akisubiria maswali kutoka kwa mwanadada, na mwanadada naye akawa katulia akisubiria kibali kutoka kwa hakimu. Hakimu alikuwa akiandika jambo, na alipomaliza akamwangalia wakili mtetezi, kama ana jambo lolote, lakini wakili upande wa utetezi, alikuwa katulia, kama vile hayupo.

Tuendelee na kisa chetu,

‘Wakili mwanadada unaweza kuendelea…’akasema hakimu

Mwanadada alimsogelea mtaalamu na wakawa wanaangaliana, kabla hajaanza kumuuliza maswali, na yule jamaa alihakikisha haangilii pembeni akamkazia macho mwanadada, na huku akiwa anabenua mdomo kwa dharau, na mwanadada aliangaliana na mtu huyo kwa muda, kabla hajageuka kumwangalia hakimu na kusema;

‘Ndugu muheshimiwa hakimu, hawa ndio watu wanatumia tamaa zao binafsi na kutafuta visingizio vya kuhalalisha matakwa yao binafsi, hawa ndio wanaotumia majukwaa ya kisiasa, kuwarubuni watu, ili watu wafanya maasi, na baadaye wao waweze kufanya mambo yao, kwa masilahi yao binafsi…’akatulia mwanadada na kugeuke kidogo kumwangalia mtaalamu, na mataalamu akawa anatabasamu.

‘Hawa ndio wale anaotumia maeneo ya dini, na kutafuta vipengele vichache wakachanganya na mambo yao na kuwahadaa waumini wao, ambao huenda sio wajuvi sana wa dini, na kutapakaza sumu za matakwa yao, wakiwa na malengo yao ya siri, kwa manufaa yao binafsi….ndio hawa, na ndio hawa hawa wanaotumia ukabila, mila na desturi, kwa kuzipotosha, huku wakitafuta wafuasi, kwa manufaa yao binafsi….na mila na desturi zinaonekana ni mbaya kumbe ni kutokana na watu kama hawa.’akatulia na kumwangalia hakimu.

‘Muheshimiwa hakimu, mimi sioni kwa nini eti mtu utafute jambo jema kwa kutumia njia ya ubaya siyokubalika  kisheria…haiji akilini,kama ni jambo jema, basi kuna utaratibu wake, ambao ukiufuta utaweza kuliwezesha hilo jambo liwepo , sio kwa kuwarubuni watu, na kuleta maasi, sio kwa kupoteza roho za watu wasio na hatia, eti wanakuwa vikwazo kwako, hilo haliingi akilini, na huo ni ushetani….’akasema mwanadada.

‘Kama ni kweli, mwenzetu huyo aliona hayo, kuwa aridhi ina madini, ardhi ina mali asili, ambayo kwa mtizamo wake, itakuja kuchukuliwa na wageni, alikuwa na njia nyingi halali za kufuata,….kuna taratibu zipo, kisheria, na angeliweza kufanikiwa hilo bila kutumia `ubaya’…usihalalishe ubaya wako, eti kwa vile una malengo mzuri baadaye…haiwezekani….fuata sheria, fuata utaratibu, tuneglikuelewa..kama kweli unayodai ni sahihi’akasema mwanadada.

‘Ya Marekani na nchi za Ulaya tuwaachie wao wenyewe, tusijfananishe na wao, kwani wao wana uwezo wao, na wanajua ni nini wanachokifanya na wana sheria zao, na kwani kama kweli tuna malengo mema, kwanini tusijifananishe na wao kwa mambo mazuri wanayoyafanya, tukawa wazalishajisihaji wazuri, wasomi wazuri, tukaweza hata kwenda mwezini..’akagauka kumwangalai mtaalamu.

‘Ndugu Mtaalamu, uliyofanya sio sahihi, na uliyowafanyia watu sio mambo mema, unahitajika kutubu, kuwaomba msamaha, na msamaha hautakubalika, kama hutatubu dhmabi zako, utasema ukweli kwa jinsi ulivyo fanya…ili kweli watu wajue kuwa wewe ulikuwa na malengo mema, lakini ulitumia taratibu ambazo wewe ulizania ni sahihi kumbe ni makosa…’akasema mwanadada. Na akawageukiwa watu na kusema;

‘Huweze kuumiza raia wasio na hatia…kwa ajili ya kufanikisha malengo ya ndoto zako ambazo hazikubaliki, …hilo umekosea sana, na watu kama nyie mkiachiwa kwenye jamii, mnaweza kuwa ni kero…kero kubwa sana,amani itatoweka, angalieni wenzetu wanavyoishi kwa shida, wanakuwa wakimbizi, wanatangatanga, watoto wanapoteza maisha, ...jamani hatujifunzi kutokwa kwa wenzetu, mnaua wazee kwa kisingizio cha uchawi, kumbe ni watu kama nyie, mnawapotosha watu...hiyo sio halali...’akatulia, na baadaye akamgeukia huyo jamaa.

‘Nchi ikiwa haikalili, amanai ikatoweka, uchumi utaporomoka, ....hali zitakuwa duni, na mpaka make sawa, mje mrejeshe uchumi wenu, wengi watakuwa wamepoteza maisha, ...na huenda msiweze kabisa kuurejesha uchumi wenu kuwa kama ilivyokuwa awali...wengi watabakia na mafundo moyoni, visasi...hakuna faida, ...tuache hayo, tutubu, na tuwe na mtizamo chanya..’akasema mwanadada na kumwangalia mtaalamu, huku akisema;

‘Ili tukuelewe vyema kuwa kweli ulikuwa na malengo mema, kwa mtizamo wako...’akatulia halafu akageuka kuwaangalia watu , halafu akamgeukia tena huyo jamaa na kusema;

‘Kama unavyodai wewe kuwa, ulikuwa na nia njema, ....kwa jinsi ulivyokuwa ukifikiria wewe...kumbe sio sahihi, na sasa umeshafahamu ukweli,... ninataka ujibu maswali yangu haya kwa uwazi, na kwa kujiamini, kama kweli hayo uliyokuwa ukiyafanya uliona ni sahihi kwa kipindi hicho…’akasema mwanadada akawa kamkodolea macho huyo jamaa na yule jamaa akatabasamu huku akiwa na yeye kamtizama mwanadada, na huku akitikisa kichwa kama kukubali na huku akiendelea kutabasamu, na kujifanya hana wasiwasi na hayo maswali akasema;

‘Uliza nitakujibu, …utakavyo..hamna shida, kwani sioni tofauti….uliza nakusikiliza muheshimiwa wakili mwanadada….’akasema na maneno hayo ya mwisho akayatamka kwa taratibu, kama ana yakariri.

‘Je wewe ndiye uliyekwenda hospitalini na kumuua Jemedari kwa sumu?’ akaulizwa na swali hilo lilikuwa kama la kushitukizia kwake, akawa kama kashituka, halafu akatabasamu na kusema;

‘Mimi nilishasema  mengi niliyoyafanya nilikuwa nafanya kwa nia njema …kuhakikisha kuwa mali asili, viasili na rasilimali ya nchi vinabakia mikononi mwa wanachi, lakini watu kama Jemedari walikuwa ni kikwazo,hawajui,… siwezi kuwalaumu…elimu na uoni wa mbal ulikuwa shida kwao, lakini je hapo ningelifanya nini, kwa mtu kama huyo,…’akamwangalia mwanadada.

‘Wewe unamfahamu vyema Jemedari, ni wale watu wanaojifanya wanajua sana sheria na wanataka kuzifuata kama zilivyo,…wewe, hata hawa unawaita muheshimiwa hakimu, mnajifanya mnafhafuati kila kitu, kama kilivyo…..wakati mwingine unafumba macho,…sasa nikuambie uuata sheria….mnajidanganya…lakini siwalaumu….’akatulia kitikisha kichwa.

‘Sasa kwa, mtu kama Jemedari,  ilibidi afanyiwe hivyo, kwasababu alijifanya mfuata sheria, na hakujua kuwa sheria zipo, na hata hawo watungaji wenyewe wa hizo zinazoitwa sheria hawazifuati kihivyo…nawafahamu sana mambo yenu, lakini kwa vile mumeshika mpini, sasa hivi siwezi kusema kitu….’akawa anamuonyeshea hakimu kidole.

Wakili mwanadada akataka kumsimamisha ajibu swali, lakini kabla hajamwambia kitu , jamaa huyo akaendelea kuongea;

‘Usiwe na wasiwasi, subiri nikujibu, usiogope, mimi ndiye ninayekujibu,….na nitawajibika mimi, usimuogope muheshimiwa, niliwahi kukutana waheshimiwa zaidi yake…aah, ok….’akasema na kuonyesha mkono kama kudharau.

‘Nikuambie ukweli, wale waliopewa majukumu hayo ya kusimamia hizo mnazoziita sheria,….ili eti wajahakikisha sheria zinafuatwa, , ndio hao hao  wa kwanza kuzivunja…japokuwa unasema nisiyataje hayo mataifa makubwa,…lakini ndio mfano halisi,…ni nini wanachokifanya,angalieni kwa makini, demokrasia wanayoitaka itumiwe, je kweli wanaifuata kama inavyotakiwa..kwao wao sawa, lakini kwa wengine…sivyo hivyo, ….wao ni kwa jinsi watakavyo wao iwe, sio wananchi wa nchihusika watakavyo, kama wao hawataki iwe hivyo…umenielewa…?’ akawa kama anauliza

‘Angaieni  mifano hai, mnaona wenyewe yanayotokea kila kukicha…sio bahati mbaya  wenzetu walitumai akili, ….wanajua nyie bado mumelala,…manachonganishwa mnagombana, na mkigombana kwao ni sawa na mlevi, akishalewa, siumnasukuma tu…..hamjui kabisa, …lakini hawanidanganyi mimi kwasababu nimesoma nafahamu hayo…’akasema na kutulia kidogo.

‘Kwahiyo ukisema sheria, …bado zipo na zitaendelea kuvunjwa, kama watendaji na wasimamizi wenyewe wnaongoza kwa kuzivunja …..viongozi wetu wenyewe sio waadilifu,..kama ni waadilifu hebu chunguza mishahara yao, na mali walizo nazo,….wamazipatia wapi, kama sio sio kuvunja sheria…mtaendelea kulala, wenzenu wananeemeka…’akatulia.

‘Kama kweli watendaji na wasimamizi wa hizo sheria, wangelikuwa wakizifuata vyema wakawa waadilifu, na kuhakikisha kuwa kila mtu anawajibika kwa kosa lake kwa haki,mimi nisingelikuwa hapa, mimi ningelikuwa mtu mwingine, kabisa, muheshimiwa au afande,…lakini nikatendewa ubaya, na sheria zikapindishwa kwa vile mimi sio mtoto wa mtu fulani……unafahamu sana…kama hufahamu ndio hivyo….’akatulia na kabla mwanadada hajasema neno yeye akadakia na kusema kwa haraka;

‘Yaliyonipata huko, ndiyo yaliyonisukuma niwe hivi nilivyo….wamenikomaza wenyewe, waache niwafundishe, na nijitolee kwa ajili ya nchi yangu na vizazi vijavyo, najua leo nyie hamtanielewa, alkini vizazi vijavyo vitanishukuru sana….watanikumbuka, …’akatulia huku akitikisa kichwa.

‘Hujajibu swali langu….naona umegaukwa mwanasiasa, ungeenda ukajiunga na vyama vya kisiasa, ungeliweza kufanya hayo kwa urahisi zaidi, lakini sio kwa njia hiyo, sasa nataka ujibu swali langi, je wewe ndiye uliyemuua Jemedari, kwa sumu?’ akaulizwa

‘Jibu unalo tayari..hiyo ni kazi yako kuthibitisha…., kama mliweza kuingia ndani ya lile handaki na kuingia kwenye chumba changu cha maabara, mumeona kila kitu, na jinsi gani nilivyofanya, yote yapo kwenye mikanda mliyoiona humo ndani sikuficha kitu, …siwezi kujibu hilo swali, kuwa ni mimi au sio mimi…hiyo ni kazi yako kuwathibitishia watu wako, mimi nimeshajielezea lengo langu lilikuwa ni nini.’akasema

‘Wewe ndio uliyetengeneza hizo sumu, je ilikuwaje yule uliyemtuma akawa hana soda yenye sumu kama mlivyopanga…na ukaja kuipeleka wewe…?’ akauliza na mtaalamu akacheka

‘Kila jambo lilipangwa kitaalamu, sikuwa na haja ya kuwaingiza watu wengine kwenye mambo yangu, japokuwa nlitaka jamii ione hivyo,…ile sumu, ilitengenezwa, lakini hakiuwa sumu,niliwaelekeza lakini nilijua haiwezi kuleta madhara,…na nilijua kuwa kuna watu waliiga, lakini hawakujua jinsi ya kuichanganya…..’akatulia.

‘Ina maana ni kweli kuwa hiyo sumu iliyopelekwa ilipelekwa na kiongozi wa kijiji?’ akauliza

‘Hilo utajijibu mwenyewe, maana mimi nilikuwa sehemu zote, kiongozi wa kijiji, na mtaalamu, siwezi kukutafunia kila kitu….nyie watu vipi,akili zenu ni butu ehe….’akashika kichwa kuashiria kutokuelewa.

‘Nilichotaka ni mtu aingie kule na ajulikane kuwa yeye ndiye kamuwekea hiyo sumu, ili na mimi nije baadaye kufanya mambo yangu, na ndivyo ilivyokuwa,…..yeye alimpa ile soda, lakini haikuwa na nguvu, na mimi nikaingia nikaweka chupa iliyokuwa na soda yenye sumu,…na siku za mjamaa zilishafika, akainywa…’akakunja uso kuashiria kuhuzunika.

‘Ilivyokuwa ni kwamba nilipoingia nilimkuta jemedari kapitiwa na usingizi, mimi nikaiweka ile chupa ya soda pale mezani, nilijua, kwa ujuvyi wa kiakili za kibinaadamu, jemedari ataamuka a kuinywa hiyo soda, na ndivyo ilivyokuwa. Jemedari, alizindukana kutoka usingizi, akaona chupa ipo pale akajua ni soda kaletewa, akaichukua na kunywa,….hakujua kuwa hiyo ndio ilikwa tiketi ya kifo chake alichokuwa akikitaka,..na ndiyo ilikuwa njia ya kusafisha vikwazo, katika kutimiza yale niliyokusudia….yenye malengo mema kabisa kwa wenyewe kuelewa…’akatulia.

‘Mtu kama Jemedari angeliendelea kuwepo nisingeliweza kuulinda ardhi ya wazawa, maana yeye ndiye aliyepewa dhamana ya ulinzi wa kijiji, jemedari alikuwa kiongozi wa mali ya kijiji , na alijifanya kufuata sheria, ….hata pale nilipojaribu kumuelezea dhamira ya waheshimiwa wetu wa kuuza ardhi zetu kwa wakuja, hakunielewa,…..kwanini nisimuondoe kwa sasa, ili ardhi isje ikachukuliwa na wakuja baadaye….hapo nina kosa gani..’akasema akitikisa kichwa kwa kutamba.

Mwanadada akamwangalia muheshimiwa hakimu,na kutabasamu, halafu akamgeukia mtaalamu na kumuuliza swalii jingine;

‘Na wale vijana waliohusika kuchoma moto kwa mama mkunga kwanini uliwaua?’ akaulizwa

‘Hao vijana walishanigundua …..kuna jambo lilitokea, wakanigundua kuwa mimi ni mtu wa sura mbili, na nilijua kuwa itafika muda watatoa siri,…kwa wengi wanafahamu kuwa walikufa kwa vile walichanganyikiwa kwa kumchomea mama mkunga nyumba……haikuwa hivyo…ilikuwa kwasaabbu nilijua itafka muda wataongea ukweli kunihusu mimi…nikawaondoa kwa sumu maalumu, ambayo mumeikuta kwenye maabara yangu….umesikia sana, nawaambia ukweli ili mnitie kitanzi mapema, sijali, kwani nimetimiza wajibu wangu.’akasema huku akikunja uso kwa hasira.

‘Lakini kuna mmoja aliokoka, kwanini?’ akauliza mwanadada.

‘Huyu aliyeokoka, aliokoka kwa vile hakunijua mim, na hakuwepo siku hiyo, na nikatumia mbinu ya kumwambia babu yake, kuwa amkanye kijana wake, asije akanywa hiyo dawa, na kweli huyo kijana alipofika siku hiyo akasingizia kuwa amefunga, na nikamwambia atakunya akifika nyumbani jioni…na ukumbuke muda huo nilikuwa kama kiongozi wa kijiji,hakunitambua,….’akatulia.

‘Unaona sikuwa na lengo baya kwa mtu ambaye hana lengo baya kwangu..ni wale ambao nilifahamu kuwa watakuwa ni kikwazo, kwangu…..ndio niliowaondoa, au kutumia njia ya wao kuondolewa, sio lazima nifanye mimi…kwanini niwaumize wale wasio husika, hapana mimi sio mbaay kihivyo….’akasema.

‘Ukiangalia wengi watanilamu sana kuhusu mama mkunga, ni kweli inasikitisha sana, mama kama huyo kufanyiwa aliyofanyiwa,lakini kulikuwa hakuna njia nyingine…..na yeye kama angeendelea kuwepo, ingekuwa vigumu kwangu kuipata ile sehemu…nasikitika kuwa hilo halikufanikiwa, na ….na ina maana eneo hilo sasa litakuwa mali ya wakuja…wenyewe mtakuja kuona, ….’aakgeuka kumwangalia hakimu.

‘Muheshimiwa ahkimu, haya ninayoongea nataka yaandikwe, ili mje kuwa mashahidi,….watakuwa hawo wanaoitwa wawekezaji, watapewa hilo eneo, na mali asili yote itakwenda nje…..kazi yangu yote niliyoifanya inakuwa kazi bure…sawa ..lakini mimi nimejaribu kadri ya uwezi wangu….mtaona itakavyokuwa….’akasema.

‘Je hawo mabinti  ulikuwa ukiwachukua kwa kazi gani…?’ akaulizwa.

‘Mabinti?!..’akauliza kwa mshangao, halafu baadaye akawa kama kaumbuka jambo, na kusema

‘Hahaha, unamaanisha, binti wa mkuu wa kitengo cha upelelezi, nilimchukua, kwasababu ile ile, kuwa nilisingiziwa kuwa nimembaka binti wa mkuu wangu, kwanini nisifnaye hilo kiukweli ili nije kuhukumiwa kiukweli..hata hivyo, mabinti niliowachukua kabla, niliwachukuwa kwa ajili ya uchunguzi wangu ….kama ningepata muda mngekuja kuona baadaye hilo nilichokuwa nikikifanyia utafiti…’akasema huku akiangalai chini.

‘Tatizo ni kuwa nyie mnatafuta umaarufu, ndio maana mumenikatili, lengo langu muhimu sana, ..nakumbuka umesema kuwa kwanini tusiwaige wazungu, kwa utaalamu wao..hiyo ni hoja nzuri sana, lakini unaitamka kinadharia, mimi naitenda, ...’akatikisa kichwa kama kukubali.

‘Mimi siifanyi kinadharia, kama nyie ndilo maana nilikuwa na maabara, nilikuwa nalifanyia kazi hilo…..lakini sikupata muda,….kwahiyo hilo halikuweza kukamilika kwasababu yenu, lakini sivyo kama mnavyojua nyie, kuwa labda nilikuwa nimefanay hivyo kwa tamaa zangu, au kwa ubinafsi wangu. Hakuna kitu kama hicho kwangu, tatizo ni kuwa hamnielewi…mimi sio hivyo mnavyofikiria nyie, kwa akili zenu ndogo,...’akawa anaonyesha kichwani kwa kidole.

‘Ama kwa, huyu binti wa mkuu, ilibidi afanyiwe hivyo, kwa kulipiza yale mabaya niliyobambikiwa, yeye mwenyewe alikuwa huko, kabla ya kuhamishiwa hapo, anayafahamu hayo yaliyotokea huko, lakini hakusiaidia kitu, kama anakumbuka vyema, atanikumbuka ...anayway, hayo ni mambo ya siri, hamstahiki kuyafahamu…..ni hivyo tu.’akatulia na mwanadada akamwangalia kwa jicho lililojaa hasira.

‘Hayo unayoongea ni kwa ajili ya kujitetea, kamwe huwezi kufanya ubaya eti kwa ajili ya wema,hilo halipo, ubaya huzaa ubaya...labda kama utafanya ubaya, kwa minajili ya kutetea haki, kwa minajili iliyokubalika kisheria...lakini hayo yako  hayakubaliki kisheria, ....unachofanya sasa ni yale ya mfa maji unajitetea kwa vile umegundulikana ubaya wako,…wewe utadirikije kumteke binti mdogo kama huyo, na kumdhalilisha,hukuona kuwa yule ni sawa na binti yako, hivi kweli kama angelikuwa ni binti yako kafanyiwa hivyo, ungelifurahia?’akauliza mwanadada kwa hasira.

‘Usijifanya unajali, kwanini hawakunijali mimi, hata mimi nilikuwa mtoto wa mkulima, tena masikini wa kutupwa...je wazazi wangu hawana uchungu kama huo, unaounadi wewe,.., hawakujali hilo, kuwa wazazi wangu walikuwa wakinitegemea mimi angalau na wao wapate kakibanda, ukumbuke waliuza kila kitu chao ili nisome,…je baada ya hapo ulitaarajia nini,.... msiangalia kwenu tu, angalieni na kwetu ,walalahoi…..sijitetei kwa kuwa mnanona nimekosa, mimi sijafanya kosa....tatizo lenu ni kuwa hamnielewi tu....’akasema huku akiwaangalia watu.

‘Kama ni tamaa za kimwili, kwanini nisingelitumia pesa na kuwachukua wasichana wanaojiuza, wapo wengi, tena wazuri tu, ni kazi rahisi,….lakini sikuwa na kusudio hilo…..kwa hawo mabinti wengine, nilikuwa nawafanyia utafiti, ambao mwisho wa siku ningegundua kitu, dawa, ambayo ingekuja kuwasaidia wao wenyewe...lakini ooh, watu nyie, mumenikatili...na uchunguzi wangu huo haukuweza  kukamilika, kama mnahitajia kuufahamu ni utafiti gani, basi nipeni mwaka mmoja, mtaona ni kitu gani nilikuwa nakitafuta..kwasasa siwezi kuwaambia ni kitu gani….’akasema.

‘Na kuhusu eneo la mwanamama,….’akauliza na kabla hajamaliza mtaalamu akadakia na kusema;

‘Mwanamama, hakuwa tatizo sana kwangu, tatizo kwangu ilikuwa ni jemedari, na kwahiyo nilichofanya ni kuwachonganisha tu, ndio dunia ilivyo sasa, ukiwa na akili, utawachezea watu upendavyo…..nilichofanya ni kupiliza fitina kidogo tu, kuwa wakina mama hawastahili kumiliki ardhi, hiyo haikuwa kazi kubwa, wengi wanafahamu hivyo, siunajua tena mfumo dume….’ Akawa baadhi ya hayo maneno anaongea kama ananong’ona.

‘Hiyo fitina ikafanya kazi yake, na Jemedari bila kujua, akanisaidia kukamilisha hilo, japokuwa nilikuja kugundua kuwa wewe ni kikwazo, ndio maana nikamtafuta mtu akumazlie, na kama ningedhamiria kukumaliza, ningelifanyahivyo mapema, lakini kwanza nilitaka ujue unapambana na mtu gani….hilo la kugongwa na gari, ilikuwa kama kukutisha tu,..bahati yako…lakini sikupenda wewe ufe….nilitaka uje upambane na mimi.....’akasema huku akitabasamu.

Mwanadada aliposikia hayo maneno, akamwangalia huyo mtu, na baadaye akamgeukia hakimu na kusema;

‘Muheshimiwa hakimu, huyu mtu hayupo sawa…kwa kumsaidia naomba akachunguzwe akili yake vyema, nahisi kuna tatizo,….’akasema mwanadada na Mtaalamu akacheka, alicheka kwa muda, halafu akasema;

‘Hivi mimi na nyie ni nani anahitajika kuchunguzwa akili, ….mimi sina matatizo ya akili, ….hilo eleweni , ila naitumia akili yangu ipasavyo, nyie, hamtaki kuzitumia akili zenu vyema, na kama mngelizitumia akili zenu vyema, mngelinielewa…nyie ndio mnastahili kuchunguzwa akili zenu...sio mimi’akasema huku akitiksia kichwa kwa kujiamini.

‘Kwa kauli yako hiyo, naona umesihiwa maswali, tumuachie muheshimiwa hakimu afanye vitu vyake, nafahamu atafanya nini…..na sitajutia kwa hayo niliyoyafanya,….kamwe, ….sijutii, kwasababu niliyafanya hayo kwa maslahi ya nchi na vizazi vijavyo….eleweni hivyo,....nashukuruni sana, …’akasema an kuinama kidogo halafu akashika mashavu na kuwa kama mkiwa, au mtu anayesubiria jambo na baadaye akaiondoa na kutabasamu....huku akiwa kashika shavu moja, hakuonyesha wasiwasi..

Hakimu alimwangalia kwa muda, na baadaye akawaita mawakili wote wawili wa utetezi na huyo muendesha amshitaka, akawa anateta nao na baadaye akasema;

‘Tunaiahirisha hi kesi, na siku ya hukumu itatajwa, mtafahamishwa….na mshitakiwa ataendelea kuwa rumande, …kwa ulinzi mkali....’akasema na kuinuka kwa haraka, ilionekana hakimu alikuwa kakerwa sana na kauli ya huyo jamaa , lakini hakutaka kusema zaidi alimtupia jicho mara moja na kuondoka zake.

Wakili mwanadada akamgeukia mtaalamu ambaye alikuwa akipitishwa kupelekwa rumande huku akilazimisha kusimama , na huku akigeuka kumwangalia mwanadada, lakini wale askari wakawa wakamsukuma atembee...

Wakili mwanadada alipoona hivyo akataka kujua ni kwanini jamaa huyo anavutana na wale askari, je kuna kitu anataka kumwambia, akawageukia wale askari na kuwaambia wamuacha aongee anachotaka kuongea, na huyo jamaa alipoachiwa akawa kama anajipuliza kuondoa uchafu, kwa dharau,  na kugeuka kumwanglia mwanadada, wakawa sasa wanatizamana uso kwa uso, na huyo jamaa , kwanza huyo jamaa akatabasamu, tabasamu lake la dharau, halafu akasema sauti;

‘Hongera binti Kibaraka, msaliti….hongera sana, maana watakuvisha nishani ya ushujaa, lakini haina maana yoyote kwako wala  vizazi vijavyo….hiyo nishani ya kukukoga kwa ujinga wako….’akawa kama anatema mate chini kwa kashifa.

‘Wewe na hawa wanaojifanya ni askari, nyote ni vibaraka, wasaliti, wajinga, wasio taka kutumia akili zao vyema, wakaona mbali...wasiojua ni nini wanachokifanya, wanaigiza kama mbwa anayetumwa na bwana wake,….kamata huyo..kimbia, kule…hana lolote analopata, zaidi ya kutumikishwa, lakini akizarauliwa kama mnyama tu,….mmh, nawasikitikia sana….’akawa anatikisha kichwa.

‘Unasikia sana wewe binti, mimi mbele ya mungu, nitakuaj kuvishwa nishani iliyotukuka, ….japokuwa machoni mwenu, mnaniona ni mtu mbaya sana, lakini sivyo hivyo kamwe….kwa yule anayefahamu lengo langu atanishukuru, na hao nio vizazi vijavyo, sio nyie….nyie mnachojali ni masilahi, a sifa ndogo tu, hamna lolote…lakini mwisho wa siku wanakuja kufaidi wengine, wenye vichwa kama changu….wajanja, wataalamu…’akawa anajitahidi kushika kichwa lakini yule mlinzi akawa kamshikili barabara.

‘Niachie wewe, siwezi kufanya lolote, ninachotaka ni kumpasha huyu kibaraka mwenzenu,…na nawaambia iliyo wazi, nyie viabara, ole wenu iwakute hiyo siku, siku ambayo wenye mali hizi, watawashitukia,….ole , wenu,…na kama na mimi nipo hai, ole wenu nipata muda nitoke jela, nikiwa hai,..’akakunja uso kwa hasira.

‘Ole wenu nitoke jela nikiwa na nguvu zangu, wewe na huyo unayemuita muheshimiwa hakimum na nyote mlioshirikiana, nitahakikisha nawafanyia jambo ambalo hamtalisahau, kitu mbaya….mtaona…ole wenu….maana mumenikatili kuilinda mali asili ya vizazi viajavyo…’ akageuka kuwaangalia hawo maaskari, na baadaye akamgeukiwa mwanadada na kusema;

‘Nyie hamjui tu, mtakuja kujau ikiwa `too late’ muda huo, yamebakia mashimo yasiyo na kitu,..ardhi isiyo  ardhi tena, maana ardhi ikiwa na madini, ikiwa na rutuba thamani yake hupanda, sasa wajanja wameshachukua kila kitu, thamani yake itakuwa haipo tena , sana sana, itakuwa ni ardhi kwa ajili ya kukuzikieni tu wasaliti nyie, mtakuwa mizigo isiyo na thamani….’akawa kama anathema mate.

‘Sawa hamna shida, nifungeni TU…..wema wangu hauna maana kwenu….lakini hautaoza kamwe, utakuja kukumbukwa kwa wenye akili, kama zangu….’akasema huku akitoa macho ya hasira na huzuni.

‘Wewe una matatizo, haupo sawa….mpelekeni huko, akasubiri hukumu yake’akasema mwanadada

‘Hahaha…mtabakia hivyo hivyo….usisahau maneno yangu,…muombe mungu waninyonge….lakani hata wakininyonga, maneno yangu yapo, lengp langu jema, liatendelea kukumbukwa, na kifo change kitakuwa cha kishujaa…..hilo halipingiki…’akasema na huku akisukumwa kuondoka.

NB: Ni hayo kwa leo

WAZO LA LEO: Tunapokuwa kwenye jamii, tukawa na mawazo, ambayo tunahisi yanaweza kuisadia jamii, ni vyema tukawahusisha wanajamii, tukayajadili kwa pamoja, kwani huenda yakawa na manufaa, a huenda kwa mtizamo wako uliona yana manufaa, na wakikutana watu wengi, yatachambuliwa na kukubaliwa au kukataliwa kwa manufaa ya uma, huo ndio utaratibu mwema, kwani kwenye wengi hapaharabiki neno.

Ni mimi: emu-three