WEMA HAUOZI-56

Ilikuwa siku ambayo mshitakiwa mkuu, alitakiwa kusimama kama alivyoomba kujielezea mwenyewe, na hakuna aliyemuamini tena, baada ya kesi hiyo kuendeshwa kwa siku tatui mfululizo, na kama ilivyotarajiwa mshitakiwa mkuu,ambaye alikamatwa hivi karibuni, alikana mashitaka yake yote, na kudai kuwa hayo aliyoyakubali awali, alifanya hivyo baada ya kuteswa na askari polisi.

Kesi ilipoanza siku ya kwanza mshitakiwa alisema yeye hahitajii wakili, atajitetea mwenyewe, lakini siku ya pili, akapata wakili, ambaye alijitahidi kumtetea kadri ya uwezo wake, na kila  ushahid ulipotolewa ilionekana wazi mshitakiwa ana hatia, japokuwa yeye mwenyewe hakuonyesha dalili ya kuogopa, na wakati wote alikuwa akijaribu kutabasamu, kuonyesha kuwa yeye hana hatia.

Siku ile aliposimamishwa mama mkunga ndipo mambo yalipoanza kuharibika kwa mshitakiwa huyo, kwani ukumbuke mama huyo alikuwa hajaonyeshwa dhahiri, na wengi walikuwa bado wanaamini kuwa mama huyo alikuwa keshafariki, na hata huyo mshitakiwa alikuwa hana imani kuwa hata kama mama huyo atasimamishwa, asingelweza kuleta chochote kipya cha kumfanya yeye aingie hatiani.

Tukumbuke kuwa mama huyu kwa mara ya kwanza alifika akiwa kajifunga khanga mwili mzima, lakini safari hii alipofika, alikuwa kavalishwa gauni rasmi, pana, ambalo lilikuwa kama vipande vipande vilivyounganishwa na ungeliweza kufunua sehemu sehemu za gauni hilo maalumu, bila kucha sehemu nyingine wazi, na  ilifanyika hivyo kwasababu maalumu.

Leo hiii mwanadada, alitakiwa kuhitimisha ushahidi wake, na alianza kuelezea kwa kirefu toka kesi ilipoanza na akaanza kuhitimisha kwa kusema ;

‘Tangu awali keshi ilipoanza, washitakiwa walidai kuwa mama mkunga hakuwa huyo mama mkunga wanayemdai wao, eti ni mama tuliyemchukua na kumpa usifa huo wa mama mkunga, na wakadai kuwa wanachojua wao ni kuwa mama huyo alitoweka ghafla na haijulikani wapi alipo…’akatulia.

‘Kwa kauli yao hiyo iliashiria kwa wao wanafahamu ni kitu gani kilimpata mama mkunga, japokuwa kulitokea maelezo awali yenye utata, watu wawili kila mmoja akidao kuwa yeye ndiye aliyemchukua mama mkunga na kumtibia, lakini sasa mama mkunga mwenyewe atathibitisha ni nani aliyemtibia na kutokana na ushahidi mbalimbali, washitakiwa wanahisi mama huyo alifariki kweye huo moto, kama walivyotaka wao iwe hivyo, ….na kuonekana kwake, ikawa ni pigo kwa dhamira yao…’akatulia.

‘Wakati tunaanza kesi yetu, aliyeonekana kuwa ni mshitakiwa mkuu, aliomba mama huyo atolewe na aonekane hadharani, …hii ilitokana na y a kuwa hakuwa na uhakika na hilo, kwa vile yeye  ni ndugu yake, na taarifa za nyuma zilionyesha kuwa dada yake huyo kauwawa,….na kutokana na ujanja wa mshitakiwa mkuu, yaani mtaalamu, ilionekana kuwa kiongozi wa kijiji ndiye aliyefanya njama za kumuua dada yake, kitu ambacho sio kweli…na hili leo tutalithibistisha. Na kwa vile kama mtu alijua kuwa dada yake keshafairiki na kuonekana kwake sasa ni jambo hakulitegemea, akawa na hamu sana amuone huyo ndugu yake, …na aliomba sana apate muda wa kuongea naye…’akatulia.

‘Mpango huo tukaufanya tukiwa na lengo maalumu na kweli ndugu hawa wakakutana, na hapo kaka na dada wakaonana, mkiona hilo tukio la kuonana kwa ndugu hawa, mtathibistisha ukweli wa mambo kuwa kweli ndugu hawa walikuwa wakipendana, na sio kweli kuwa kaka mtu ndiye aliyepanga njama za kumuua ndugu yake, ushahidi huo upo, wa makutano ya ndugu hawa, kama muheshimiwa hakium atakubali tunaweza kuuonyesha …..’akatulia akimwangalia hakimu ambaye alikuwa akindika jambo na hakimu akasema

‘Endelea kwanza na maeelzo yako…’akasema hakimu, akimwangalia wakili upande wa utetezi kama anapingamizi, na alipoona wakili yule hana pingamizi akasema wakili mwanadada aendelee na maelezo yake, haina haja ya kuonyesha hayo hilo tukio la kukutana ndugu hawo wawili kwa sasa, na mwanadada akaendelea kuongea kwa kusema;.

‘Kutokana na ushahidi mbali mbali, tulioutoa, na kauli za mashahidi waliotangulia kuwepo hapa mbele, aliyepanga tukio hilo ni mtaalamu, akiwa na sura ya kiongozi wa kijiji, kama mlivyoona kwenye ushahidi uliopita kuwa ndugu hawa walikuwa wakifanana, sana, utafikiri mapacha, kinachowatofautisha ni ile alama ya kuzaliwa.

‘Mwanzoni tulimuita mama mkunga kuja kumtambua huyo mshitakiwa mkuu, na mnakumbuka ilivyotokea…..na jinsi gani alivyojielezea, na leo kama mlivyosikia kuwa mshitakiwa mkuu anataka kujielezea, lakini tunataka ieleweke wazi, kuwa tunachokitafuta hapa ni haki, na haki ipo kwa pande zote mbil, na nia yetu sio kumkandamiza yoyote yule, kwahiyo mshitakiwa anayo haki ya kujitetea…

‘Sisi kama waendesha mashitaka hatuna kipingamizi kwa hilo, na hapo mwanadada akatulia, akikumbuka tukio la jana yake ambapo, mama mkunga alisimamishwa na kuwepo kwake, ikaleta athari kubwa mioyoni mwa watu, na huenda hata mshitakiwa mwenyewe iliona unyama wake ndio maana aliamua leo kusimama na huenda kutubu dhambi zake, au kuendelea kuleta ukaidi, lakini yote hayo hayatamsaidia kitu.

Mwanadada akawa anarejea kwenye meza yake huku akijaribu kukumbuka tukio la jana yake, wakaiti mama mkunga aliposimamishwa;

*********

‘Mama mkunga, tumekuita hapa tena, ili uweze kuelezea ilivyotokea, hebu tuelezee siku ile ya tukio ilikuwaje? Mwanadada akakumbuka jinsi alivyoanza kumuweka sawa mama mkunga ili aelezee tukio la kuchomwa kwake moto na jinsi alivyokoka na moto huo, hakutaka kumkatiza, akamuacha aongee mwenyewe jinsi ilivyokuwa.

‘Siku hiyo, tulikuwa na mume wangu nyumbani kwetu, na baada ya kazi za mchana kutwa, tulijikuta tumechoka sana, na kila mmoja alitamani kulala tu, na kweli, tulijikuta tukilala kama magogo, na mara ilipofika saa sita za usiku, ….nakumbuka sana muda huo, kwani tulikuwa na saa kubwa ya ukutani tuliyowahi kupewa kama zawadi, na wakati mlio kwa kuashiria kuwa ni saa sita na ndipo hodi hiyo ikawa inasikika toka mlangoni,…mgongaji aligonga kwa fujo kiasi kwamba sote tuliamuka tukiwa na wasiwasi.

Mume wangu aliamuka na kuchukua panga lake, kwani huwa na kawaida ya kutembea na panga hilo mara kwa mara, na mimi sikuweza kulala tena, nikainuka pale kitandani kusikiliza ni nani aliyekuja muda kama huo, na huko nje nikasikia mume wangu akiongea na huyo mtu;

‘Unaitwa kwa mjumbe haraka, …kuna tatizo limetokea, na wewe kama mmoja wa wazee wa kijiji, unahitajika kusaidiana kulitatua…’nikasikia akiambiwa na kweli mume wangu ni mmoja katika baraza la wazee wa kijiji, hasa katika mambo ya usuluhishi.

‘Ni tatizo gani, na mbona ni usiku sana?’ akauliza mume wangu.

‘Ndio mzee, ni usiku lakini matatizo mengine hayachagui muda cha muhimi ni wewe twende, tunahisi ni kesi za ugomvi, wa wakazi wa hapa,…..sisi tumetii agiza la kiongozi wetu kuwa tukuite haraka iwezekanavyo, hatukuwa na muda wa kudadisi zaidi…’akasema huyo mtu aliyetumwa, na nahisi hakuwa peke yake.

‘Kwanini wasisubiri hadi asubuhi, maana huu ni usiku sana, saa sita za usiku, tutaongea nini muda kama huu…si alifajiri itatukuta tukiwa tunaongea kwani hamna tetesi ni tatizo gani? ’akalalamika mume wangu.

‘Mzee sisi hatujui, hata sisi tumekurupushwa hivyo hivyo tuje kukuita, na kwa kifupi mzee sisi hatuna muda , tunahitajika kurejea huko kwenye malindo yetu, unafahamu kazi yetu, kama hutaki tukatoe taarifa, nyie ndio wazee mnaotarajiwa kutatatua matatizo, na ujue kuwa ni muhimu sana, ndio maana tumetumwa kwako….’akasema huyo mtu aliyetumwa.

Mume wangu alirudi na kuniambia kaitwa kwa mjumbe, na nihakikishe kuwa nimefunga milango yote, na kutokumfungulia yoyote kabla yeye hajarudi, na kweli nikafanya hivyo, na mume wangu akaondoka…’akasema mama mkunga.

‘Haikupita muda, nikasikia michakato huko nje, na hapo nikaingiwa na wasiwasi, nikafunua pazia la dirisha, kwani tulikuwa tumeweka khanga kama pazia la dirisha nikawa nachungulia nje…na mara nikaoana vijana wakizunguka, wakiwa na magongo, nikahisi kuna tatizi, lakini sikuhisi kuna tatizo gani…’

‘Baadaye nakihisi harufu ya mafuta ya taa,au petrol, nikafunua tena pazia, na kwa mbali nikamuona mtu kasimama akiwa anatoa maelekezo, nikamchungulia vyema, na aliposogea sehemu yenye mwanga, nikamgundua kuwa ni nani…

Alikuwa ni kiongozi wa kijiji, …nikaanza kujiuliza kuna nini, maana mume wangu kaitwa kwenda kwa kiongozi huyo, lakini kwa muda ule namuona yupo hapo, akiwa anatoa maelekezo kwa vitendo, na nilisikia wazi wazi akisema;

‘Mwagia kote-kote, hakikisha hatoki mtu hapo, na lindeni sehemu zote asitoke…’nikasikia kauli hiyo na hapo nikajua kuna hatari, na nilichofanya ni kutoka pale kitandani na kuvaa nguo za kikazi zaidi,  …na kuelekea chumba chetu tunachofanyia ibada, nikaanza kufanya ibada, kumuomba mungu…

‘Mara moto ukaanza kuwaka kwa kasi, ulikuwa mkali sana, na hata pale nilipokimbilia mlangoni, sikuweza kufika, moto huo utafikiri ulianzia ndani, na nyumba nzima ilikuwa imetanda moto, nikajua tena mimi sio wa kupona, lakini sikukata tamaa, kwani nilishamkabidhi mungu, maombi yangu.

Nikatembea kwa shida, maana kote kulikuwa ni moto, nilikwenda hadi jikoni, tunapopikia na kuweka, mitungu ya maji, na hapo kulikuwa na mtungi mmoja mkubwa wa maji, nikamuomba mungu, na kujitumbukiza ndani ya mtungi huo, japokuwa haukuweza kunihifadhi lakini angalau sehemu ya mwili iliweza kuzama kwenye maji hayo, na maji yaliyomwangaika yakazima moto sehemu hiyo iliyokuwepo karibu,…kwa wakati huo maji yalishaanza kupata moto kwa jinsi moo ulivyokuwa mkali..

Nilikaa mle hadi maji yanachemka, nikaona siwezi kuvumilia, ni bora nitoke maana nitaiva kama nyama, ndio nikatoa taratibu, na kwa muda huo nje kulikuwa hakuna watu nikatoka na kuanza kukanyaga kwenye moto, sikujali tena, maana mwili mzima ulikuwa umekufa ganzi, na nilipofika kwenye mfereji wa maji machafu, mrefeji ambao tuliutumia kumwanga maji kwa ajli ya mabata,nikashikwa na kizungu zungu na kudondoka ndani ya mfereji huo, kichwa kikiwa chini, ..Nikapoteza fahamu.

Nilipozindukana ndio nikajiona nikiwa nimepakawa majani ya dawa, na majani hayo nayatambua vyema kuwa yanatibu majeraha ya moto kwa haraka sana, na nilipotizama kwa mbali nikamuona mtu,….nikajifanya kama bado nimezimia, ..nikamchunguza huyo mtu, na nikagundua kuwa ni mganga, mganga wa kijiji cha jirani…

Na yule mganga aliponiona, ninaanza kama kupata unafuu, nikamuona akiondoka, na sikuweza kumuona tena…’akasema mama mkunga

‘Una uhakika huyo uliyemuona ni mganga, sio mtaalamu?’ akaulizwa

‘Sio mtaalamu…japokuwa alivaa kama yeye,…lakini uvaaji wa mtaalamu na huyo unajulikana, na isingelikuwa vigumu kwangu kumgundua kuwa ni mtaalamu au ni huyo mganga wa kijiji cha jirani..’aaksema

‘Unasema uliyemuona akielekeza watu katika uchomaji moto ni kiongozi wa kijiji, hebu tuambie ni yule pale?’ akaulizwa akionyeshwa mshitakiwa mkuu, aliyekuwa kakaa, nahakimu akamuamrisha mshitakiwa huyo asimamishwe, na mshitakiwa akasimama huku akitabasamu

‘Ndio yeye, ….’akasema mama mkunga

‘Unauhakika gani kuwa ndio yeye…?’ akaulizwa

‘Hata nguo alizokuwa kavaa siku ile ndio hizo hizo alizovaa leo…ndio huyo huyo kiongozi wa kijiji’akasema

‘Unafahamu kuwa kiongozi wa kijiji ni ndugu yako?’ akaulizwa

‘Ndio ninafahamu, na nilishangaa kweli, kwa jinis ninavyomfahamu ndugu yangu, sikuamini…, kama kweli ndio yeye aliyekuwa akiwaelekeza watu wafanye hilo lililofanyika, sikuamini, maana mara nyingi ninaongea naye, na sikuwahi kuona chuki za kiasi hicho…kwakweli dunia hii imeharibika, …na acha ajabu siku ile mliponikutanisha na yeye anasema sio yeye aliyekuwepo hapo siku hiyo….’akasema na mwanadada akamkatisha kwa kumuuliza

‘Hamjawahi kuzozana na ndugu yako huyo kuhusu, maswala ya eneo lako?’ akaulizwa.

‘Hilo lilikuwepo, na tulifikia muafaka wa jinis ya kulitatua, lakini hakukuwa na chuki kubwa kiasi hicho, na hatukuwahi kugombana kuhusiana na hilo..kwangui mimi sikujali sana, na hata kama wangelitaka kulichukua, sikuwa na tamaa kiasi hicho…lakini nilijua kwa vile ni mali yangu, ndugu yangu hataweza kunidhulumu….’akasema

‘Sasa iweje aamue kuja kukuchoma moto, au ni kwasababu ya imani za kishirikina ulizowahi kuambiwa unazo?’ akaulizwa.

‘Na mimi nahisi ni hivyo,… lakini sio kutoka kwa kaka yangu, maana hata yeye alilipinga hilo, na alisema yeye atajitahidi hadi watu waamini kuwa mimi sio mshirikiana, na kama mimi ni mshirikina ina maana hata yeye atakuwa mshirikina, na sisi mama yetu hakuwa na tabia hiyo…je huo uchawi nimeupatia wapi, sasa hapo sielewi jamani…’akasema mama mkunga

‘Je unamfahamu mtaalamu kuwa ni ndugu yenu?’ akaulizwa

‘Namfahamu sana, ila sikuwahi kuishi naye kwa karibu sana, kwahiyo simfahamu fika, …niliporejea hapa kijijini na kuolewa, muda wote anakuwa na nguo zake za kitaalamu, kwahiyo sijawahi kuwa naye karibu na kumjua vyema zaidi ya kutambua kuwa ni ndugu yetu, ambaye tuliachana tukiwa wadogo…na alishabadilika sio yule mtoto nilyekuwa nikimjua…hasa kwa vile muda wote kavaa manguo yake.

‘Je mtaalamu na ndugu yako, yaani kiongozi wa kijiji wanafanana?’ akaulizwa

‘Ndio ankumbuka, wakati huo tukiwa watoto, kabla mimi sijaachana nao, watu walikuwa wakiwaita mapacha, yaani kaka na huyo wanayemuita mtaalamu walikuwa wakifanana sana…’akasema

‘Kama walifanana kihivyo wewe uliwezaje kuwatofautishai, kwa kipindi hicho?’akaulizwa

‘Kaka yangu alikuwa na alama kama hii yangu iliyopo hapa shingoni, ni kitu kama kidoti, na kma unavyoona ni kikubwa, na hata niliporejea kutoka huko nilipokuwa nilikiishi na kuja hapa baada ya kuolewa, nilikiona hicho kidoti kwenye shingo ya  kaka kikiwepo kama kilivyo changu , lakini huyo mtaalamu hana kitu kama hicho….’akasema.

Wakili mwanadada akamgeukia hakimu na kusema;

‘Muheshimiwa hakimu, mwenzetu mtaalamu, alitumia umbile, lake la kufanana na ndugu yake na kuanza kufanya machafu, kwa kupitia kwa jina la ndugu yake….na kutokana na mipango yake, alitumia udhaifu wa wanakijiji, kuwezesha kufanikiwa mambo yake hayo, na, ili kuyathibitisha hayo, kuwa ndugu hawa wanafanana, ningelimuomba kiongozi wa kijiji aletwe hapa, na asimama karibu na mshitakiwa mkuu…’akasema mwanadada

Kiongozi wa kijiji aliitwa kutoka chumba cha mashahidi baada ya kuonekana hana hatia na alitakiwa kuja hapo kama shahidi, akaitwa, na kuja kusimama karibu na mshitakiwa mkuu…kila mmoja alishikwa na butwaa;

Mwanadada akamgeukia mama mkunga na kumwangalia kwa makini na wakati huo mama mkunga naye alikuwa naye kashikwa na butwaa na alipoulizwa;

‘Ni yupi kati ya yule ni kiongozi wa kijiji, unayesema ulimuona akitoa maagizo, na hapo mama mkunga akabakia ameduwaa, na kusema;

‘Mimi ninachokumbuka ni kuwa nilimuona ….oh, …ina maana kweli, maana isingeliwezekana, ndugu yangu afanye hayo …haiwezekani, kumbe …wewe, …. nimeelewa, …huyo mtaalamu ndiye aliyekuwa akitoa maagizo, ….ndio yeye..angalia na jinsi anavyo….oh, ndio yeye ’akasema mama mkunga akionyesha uso wa kutahayari

‘Kwanini unasema hivyo, umegundua nini?’ akaulizwa

‘Kichwa…, kichwa cha kaka kwa nyuma hakina kisogo kirefu kama cha mtaalamu, na …nakumbuka usiku ule nilipomuona huyo kiongozi wa kijiji,…hakuwa….oh,…nimekumbuka, pale alipgeuka, na kuvua lile kofia pana alilokuwa kalivaa, kisogo chake sio kama cha kaka,…ingawaje kwa muda huo sikuwa na akili ya kuwaza hilo…lakini sasa nimekumbuka, …ndio huyu huyu…aliyekuwa akiagiza nichomwe moto….’akasema mama mkunga.

‘Haya hebu sogea pale kwa watu hawa wawili uwaangalia kwa makini na kweli uliyemuona pale kwenye tukio  ni yupi,…usiangalie ukaka, angalia ukweli, maana tunahitajia haki itendeke….’akaambiwa na kusogea akawachunguza kwa makini, na akasema huku akimwangalia mshitakiwa mkuu kwa hasira;

‘Yaani wewe unajiita mtaalamu kumbe ni muuaji,…nilishaanza kukushuku toka awali, pale niliposikia kuwa umewaambia watu kuwa mimi ni mwanga….mungu atakulipa kwa uovu wako huo…’akasema akimwangalia mshitakiwa mkuu kwa hasira, na mshitakiwa mkuu akawa anatabasamu kama vile haogopi.

Na baadaye mama mkunga akamgeukia kaka yake wakaangaliana kaka yake aliyekuwa akitokwa na machozi, na wote wakaanza kulia.

Ilipita dakika chache kila mmoja akishuhudia tukio lile, kwa hisia za huzuni, na baadaye mama mkunga alirejea kwenye sehemu ya ushahidi hapo mwanadada akasema;

‘Ili muone huo uovu, sasa natambulisha ushahidi wa mama mkunga, ambaye watu walidai, wathibitishe hilo, haitakuwa vizuri kuondoa nguo zake zote, lakini tumetayarisha jinsi gani ataweza kuonyesha sehemu chache za mwili wake, …sehemu kubwa ya mwili, mgongoni, na tumboni, …hadi miguuni, kuliungua, na ngozi yote imekunjanama, ila dawa alizowahiwa kupakwa ndizo zilizomuokoa,…

Mwanadada akawa anaangalia kwenye laptop yake akionyeshea kwa vitendo sehemu za nyuma yake kuwa mama mkunga kaungua, na alionyeshea hivyo akiwa anaangalia picha kwenye lap top yake,….na kuendeea kusema;

‘Hata wataalamu wa ngozi, madakitari, wameshangaa, kwa mama huyu kupona, kwani inaonyesha aliungua asilimia kubwa ambayo kihali halisi asingeliweza kupona, ni kwa mapenzi ya mungu, lakini pia tumshukuru mganga wa kijiji cha jirani liyewahi na kumpaka hizo dawa….’akasema mwanadada

Ikafika wakati mama mkunga anaonyesha baaadhi ya mwili wake, akageuka na kufunuliwa sehemu ya mgongoni,, na miguuni, kilichofuata hapo ni kilio, watu wengi hawakuweza kuvumilia, walijikuta wakilia…ni unyama usioelezeka, mwili wa mama huyu ulikuwa na mgamba magamba na umkunjamana,japokuwa sehemu mbali mbali zilishaanza kubabuka ngozi…..

‘Huo ndio ushahidi wetu muheshimiwa hakimu, na shahidi anaweza kuulizwa maswali na upande wa utetezi. 

Wakili wa upande wa utetezi, alibakia ameduwaa, na kugeuka kumwangalia mteja wake, na alipogeuka tena, akawa kama kashikwa an butwaa, akasema;

‘Sina swali …na mara mshitakiwa mkuu, akasimama, na kusema kwa sauti

‘Kama wakili wangu hana swali mimi nina swali….?’ Akasema kwa sauti kubwa na hakimu, akamwangalia wakili wa utetezi, na wakili huyo, akageuka kuteta na mteja wake huyo, wakawa kama hawalewani, na baada ya kuongea wao wawili wakili huyo akageuka na kumwangalia hakimu na kusema;

‘Mteja wangu anasema yupo tayari kuelezea kila kitu, lakini anahitajia muda wa kutafakari vyema, aliniambia hili kabla hatujafika hapa, na nikamshauri kisheria, lakini kwa hali tuliyoiona leo, mimi nipo tayari yeye mwenyewe asimame,na kuelezea, hilo analotaka kulisema;

Muheshimiwa hakimu, akawaita mawakili wote wawili, na kuteta nao kwa muda, halafu wakili wale waliporejea sehemu zao, hakimu akasema;

‘Kesi hii tunaiahirisha hadi kesho, na waendesha mashitaka mutahitimisha ushahidi wenu na baada ya hapo tutamsimamisha mshitakiwa …..’akatulia hakimu, na baaadaye akamgeukiwa wakili mtetezi na kusema;

‘Wakili upande wa utetezi kazi yako ni kumtetea mteja wako, ili kuhakikisha kuwa haki inatendeka, na sio kuonyesha hisia zako…natumai umenielewa..’akasema na kesi ikaahirishwa, hadi kesho yake.

NB: Nafikiri kila kitu sasa kipo wazi, je mshitakiwa huyu atasema nini,..

WAZO LA LEO: Unapokosa na ikadhihiri hivyo, lililo jema ni kukiri kosa na kutubu, huenda kwa kufanya hivyo ikawa ni heri kwako,…ujanja, uwongo,na kupindisha maneno na wakati unafahamu kuwa wewe umekosa kweli hilo ni kosa jingine na inaonyesha dhamira yako sio njema.  Kutenda kosa sio kosa , kosa ni kurudia kosa. 

Ni mimi: emu-three