Ni nani kuwa kiongozi wetu 3?

Watu walikuwa wanazidi kuongezeka kila muda ulivyokuwa ukipita, mpaka walizi wakakata wakashindwa
nini wafanye ili kuwazuia watu wasidi kuongezeka. Na huku Yule kichaa akizidi kupoteza muda, kama vile alikuwa akiwasubiri watu wote wafike kwenye mkutano huo, kabla hajamtaa huyo kiongozi wa matumaini.


‘Jana asubuhi alinijia mgeni nyumbani kwangu…’ Yule kichaa akaanza kusema kwa unyenyekevu na sauti ambayo ilionyesha dhamira ya kile alichokuwa akitaka kusema. Alipotamka maneno hayo watu wakaguna, wengine walishindwa kujizuia na kusema, `nyumbani kwako wapi, vibarazani mwa watu au majalalani.

‘Mgeni huyu nilipomuona tu, nikafikiria shari, kwani shari na ubabe ndio sera yake, na alipofika kwangu alisimama kama asikari akasema kwa sauti ya ukakamavu ‘mimi ndiye ninayefaa kuiongoza nchi ya matumaini, kwasababu kwanza jina langu ni `NGUVU’ na uwezo wangu unadhihiri hili, ninahistoria ndefu ya kutawala sehemu mbalimbali kwa kutumia wasifa wangu, sina haja ya kuongea mengi, kama wanataka kunichangua hawatajuta kwa hilo…’ akageuka kama askari na kuondoka zake.

Kwakweli nilitafakari sana, na kusema, hivi kweli katika dunia hii ya sasa, nyakati hizi tunahitaji `Ubabe katika uongozi, udikiteta umepitwa na wakati. Mimi naona tusubiri huenda atakuja mwingine ambaye ataendana na nyakati hizi.

‘Wakati nimekata tama ya kusubiri mara mlango ukagongwa, na sasa uligongwa mbele ya kichwa changu mpaka nikasikia ubongo kama unataka kutoka…’ aliposema haya maneno watu wakaguna, kila mmoja aliwaza lake, wengine wakasema nyumba anayozungumzia huyu kichaa, kumbe ni kichwa chake au ni huko kuchanganyikiwa nini..

‘Mgeni huyu alikuwa mtanashati, tai na kila kitu kuonyesha mpangilio wa maisha yake, nilitabasamu nilipoona tabasamu lake likiongezeka usoni. Nikamkaribisha vizuri naye bila kupoteza muda akaanza kuniambia nini kilichomleta kwangu. Alisema dunia nzima huongozwa na wasomi, watu wenye akili kama jina lake lilivyo. Yeye anaitwa AKILI, na ndiye mwenye haki ya kuitawala nchi ya matumaini. Akasema, kuwa zamani kabla ya uhuru mtawala `NGUVU’ ndiye alistahili kwasababu tulihitaji uwezo huo, vita na nguvu nyingi ili kujikomboa, lakini sasa tuna uhuru, kinachohitajika ni kuujenga uhuru wetu na wasomi ndio wanaoweza kuijenga nchi ya matumaini.

‘Huyu aliongea sana, si unajua tena ukiwapa hawa watu nafasi huongea zaidi na zaidi , mpaka nikachoka kumsikiliza. Niliwaza sana, ndio tunahitaji watu wenye `akili’ wasomi wa kila namna, lakini wasomi wengi wameididimiza hii nchi kwenye mambo ambayo huleta maendeleo lakini yana madhara kwa upande mwingine. Ina maana bado ili kuwe na matumaini kunahitajika aina Fulani zaidi ya uwezo, ili hawa wasomi, ambao nembo yao ni AKILI, wakishirikiana na walinzi, wenye nembo ya NGUVU, kuwekwa pamoja na kuleta kile tunachotaraji.

‘Sasa hivi wasomi ni wengi, je ni msomi yupi anastahili kutawala, dakitari, injinia, mkemia , mwalimu, mwanasiasa n,k. ni yupi tumpe nchi ya matumaini. Nikashindwa kupata jibu, na nikakumbuka wale madakitari waliovumbua mambomu ya kuangamiza watu, nikakumbuka wale wasomi waliotumia usomi wao kuihujumu nchi….mwisho wa siku nikaona bado sijampata kiongozi sahihi. Nikasema ngoja nivute muda, huenda akaja anayestahili.

Ilipofika jioni wakati nimekata tama, mara mlango ukakongwa. Na aliyeingia sasa hivi, alikuwa jamaa aliyechoka, nafikiri kwasababu ya safari ndefu au kuwaza sana au …nikashindwa hata kumtambua umri wake au ni mtu wa namna gani.

‘Najua hata wewe umenisahau, kama ilivyo dunia na walimwengu. Dunia sasa hivii inayumba kwasababu ya kukosa watu kama sisi. Dunia inatikisika kwa mabomu, uangamizi usio na faida, kwasababu ya kutumia na akili pasipoo na mapangilio. Dunia sasa hivi inahitajika kurejea enzi za watu wa zamani, watu wenye kutumia akili kwa mpangilio, watu wenye kutafakari, nini nikifanya leo kitaleta athari gani baadaye, nini nipange ili mpangilio huo usadie wote, tajiri au masikini , mkubwa au mdogo, ili kila mtu apate kile kilichomsatahili bila kuoneana. Dunia ya sasa inahitaji watu wa namna yangu…’

‘Watu hao ni nani?’ nikamuuliza kwani nilshachoka na nilidhani huyu naye anaweza kuendelea kuongea kama alivyoongea Akili.

‘Dunia hii inamuhitaji HEKIMA. Hekima ndiye kiongozi muadilifu, hekima ndiye atakayeweza kuwaunganisha wenye nguvu na dhaifu, hekima ndiye atakayeweza kuzielekeza akili zetu na elimu yetu katika mambo yenye manufaa, kuliko maangamizi. Waambie watu wako kama wanataka nchi ya matumaini basi nitakuja tushirikiane nawo na ni matumaini yangu tutafanikiwa….’ Akaondoka.

Nilipumua na kutabasamu na nikasema hatimaye tumempata kiongozi wa nchi ya matumaini, na ninawaambia, kiongozi mwenye sifa zote alizotaja mkuu wetu ni Hekima, kwasababu akiwa kwa warefu yeye ni mrefu kuliko wote, akiwa kwa wafupi yeye ni mfupi kuliko wote, akiwa kwa mijitu yenye nguvu yeye ana nguvu kuliko wao, halikadhalika, wanyonge, wasomi na wote atakuwa kama wao na kuziweka akili zao kihekima, kwani yeye hutumia hekima katika maamuzi yake. Ahsanteni.

Nderemo vifijo, vigelegele, vikatanda, hewani, kila mmoja akimkumbatia mwenzake na kusema `hatimaye tumempata kiongozi wa matumaini ‘. Hali ili iliendelea na hakuna hata mtu mmoja aliyekumbuka kwenda kumpa mkono Yule kichaa, ambaye alitoweka kiajabu na haijulikani tangu leo huyo kichaa kaenda wapi!

Ni mimi: emu-three