Kikulacho ki nguoni mwako(Somnambulism story) 11

 Sasa leo hii Maua anataka kuniuliza swali kwa mtindo ule ule wa miaka miwili nyuma, je ni swali gani na lina maana gani kwake na kwangu.  Hebu tuendelee na kisa hiki, ambacho kitafichua swali hilo .....

                                              **************
 ‘Mume wangu je unanipenda ukweli wa kunipenda, na kwa upendo huo upo tayari kukubali chochote nitakachokuomba ilimradi kiwe kwa manufaa yetu , ilimradi kitanisaidia mimi kupona, ilimradi kitasaidia kuwaokoa wengine, ilimradi…ehe, je unanipenda kiasi hicho?’ Akaniangalia tena usoni na sasa alikuwa akiyazuia machozi yasitoke.

Unajua machozi huvuta hisia za mtu, ukimuona mtu analia inaweza ikakuvuta na wewe utamani kufanya hivyo hata kama hujui analia nini. Hata kucheka inakuwa hivyohivyo. Nilipomuona Maua machozi yanamlengalenga, Huruma ikanijia na kuhisi kuwa mke wangu ana nia ambayo inaweza ikaniumiza sana. Nikamvuta na kumshika begani huku nikimuomba mungu kuwa `anisaidie kulimaliza hili tatizo kwa amani’

‘Kwani toka lni nikawa sikupendi Maua, au kuna kitu nimekifanya ambacho kinaonyesha sina mapenzi ya kweli na wewe, je ungelitaka mapenzi gani ili nikuonyeshe kuwa na kupenda…’ nikamshika mikono yake na kuivutia kifuani kwangu.

Kwa maneno haya akaniachilia na kusogea nyuma kidogo, lakini mikono yetu ilikuwa bado imeshikana.

‘Mume wangu utajisikiaje kama ukipata watoto wenye matatizo kama mimi?’ akaniuliza na kunikazia macho.

‘Kwani nani kakuambia ukizaa watoto watapata matatizo kama hayo, hili ni sawa na matatizo mengine sio lazima yaaambukizwe kama malaria..’ nikamwambia, huku nikijua fika kuwa tatizo kama hilo linarithiwa, ingawaje sio lazima litokee.

‘Mume wangu usikwepe swali, hili ni swali la msingi, mimi kama mama nina Huruma sana na watoto, nah ii leo nimegundua kuwa nina tatizo ambalo huenda linaweza likampata mtoto wangu, na najua hilo, kwanini nisiwe na moyo wa Huruma. Mume wangu kama kweli tuna Huruma na watoto wetu wakati wa kuwahurumia ni sasa, utaonaje nikisema kuwa ndoa yetu iishie hapa ili tuwaokoe hawo Watoto wasijewakarithi tatizo hili..’ akatoa neno lilionivunja nguvu, ilikuwa kama mtu kapitisha kisu kwenye moyo wangu, nikamwachia mikono yake na kumwangalia kwa macho yaliyojaa uchungu

‘Unasema nini, mbona sikuelewi, mbona umekwenda mbali kiasi hicho, hilo halipo, na sitakubali kabisa..’ nikasem kwa msisitizo.

‘Kama ukiamua hivyo nitajua kuwa kweli hunipendi, na mapenzi yako kwangu sio ya kweli, kwani umesema kuwa upo tayari kunikubalia kwa lolote ambalo litanisaidia mimi kupona, na mojawapo ni hilo kuniachia mimi niwe huru na ‘Unajua mume wangu kuzaa Watoto wakapata maradhi ya kurithi kama hujui inakuwa haiumi, lakini najua kabisa uwezekano huo upo, najua kabisa kutokana na tatizo hili sitakuwa na amani katika maisha yangu, najua kabisa kutokana na tatizo hili jamii na familia nitakayoishi nayo itakuwa haina amani…jamani mimi nitakuwa na moyo gani, usiojali wenzangu. Hapana mume wangu, uamuzi wangu ni huo sina zaidi, ukubali usikubali, naona tuhitimishe ndoa yetu hapa, tubakie kama marafiki tu, kama kaka na dada, kama ndugu wema, ila….’

Kabla hajamaliza alichotaka kuongea mlango ukagongwa, akanitizama usoni halafu akasema `karibu, Tausi, mlango upo wazi’

Mara akaingia binti mmoja mzuri, nikahisi ni moja ya ndugu zake , mawazo yangu yalikuwa mbali kiasi kwamba hata kumsalimia huyo binti au kumuitikia salamu yake sikuweza. Nilitamani atoke haraka ili nipate njia ya kumshawishi mke wangu aachane na dhana hiyo, lakini Yule binti alikuja akakaa kwenye kitanda…

‘Mume wangu sitaki nikuache ukiwa mkiwa, sitaki nikuache ukihangaika kutafuta mke wa kuishi naye, hili nalijua kuwa utateseka sana, lakini nilifanya juhudi kubwa sana za kukutafutia mtu ambaye ataweza kuliziba pengo langu. Ninawependa sana watoto wetu, ninakupenda sana, na nainaipenda sana familia yangu, hili limeleta huzuni sana katika familia yangu, kwani tangu jana mama analia kwa uamuzii wangu, lakini nimemwambia na swala la muda, watasau na watafurahia uamuzi wangu huu..’ akasema na kumwendea Yule binti na kumshika mkono.

‘Huyu ndiye atakayekuwa mrithi wangu, huyu ana sifa zote ambazo mimi ninazo, na huenda zaidi yangu, nimjua na familia yao inajulikana. Kama kweli unanipenda basi muoe huyu binti awe mmke wako. Upendo sio lazima, na upendo ni makubaliano ya wawili wapendanao, hili halina shaka, lakini kwa mwanaume yoyote anayemjua huyu binti hatajuta akiwa mke wake. Yeye anakujua na nilipomshawishi alikiri kuwa `anakupenda pia’ tatizo ni wewe…’ akamtizama Yule binti kama anamkagaua halafu akanitizama na mimi.

Nilitabasamu kwa kebehi, nikitafakari pendekezo lake, nililiona kam mtu anayefanya mzaha, hivi wewe uachwe na mke wako, halafu aletwe ntu mwingine, eti ni badili ya mkeo, kweli kama mlipendana itakujia akilini, hapana naona Maua anafanya mzaha na akili za watu.

‘Nilibadilika na kujawa na hasira, nikamwangalia Maua na kutamani kutamka maneno makali lakini nikamuonea Huruma, kwani alichofanya ni kwasababu ya upendo, na sijui ana naia gani baadaye. Na kabla sijasema kitu mlango ukafunguliwa na walioingia ni mama mkwe na baba mkwe.

‘Wameshafika na una dakika tano za kujiandaa..’ akasema baba mkwe

‘Wamefika akina nani baba..?’ nikauliza kwa huzuni

‘Hajakuambia, kuwa yeye kajiunga na kundi la wasamaria wema, kundi hili limeundwa na akina mama ambao kwa nia yao safi wameamua kutoolewa na kazi yao kubwa ni kuwasaidia watoto na wajane. Wao watakuwa kambini kwamafunzo ya dini , na jinsi gani ya kuwalea watoto, kuwafundisha, na kadhalika, ni kama wanvyofanya watu wa dini, lakini hawa kila mmoja anakuwa katika dini yake, ila cha muhimu ni kujitolea wakati wote kuwahudumia wasiojiweza, watoto, wagonjwa wazee …’ akasema na malngo ukagongwa tena.

Niliona wanannichanganya, maana sipewi muda wa kujitetea, naona kila kitu walishaamua kama familia, na hili liliniumiza sana, kuwa mamlaka yangu kama mume yalipuuzwa, au kwasababu wao wanajiweza na hawataki kunithamini mimi…’ iliniuma sana, ilinifanya niwaone familia nzima hawana Huruma na mimi.

‘Aaah, kama mumeamua kiasi hicho, mimi nitafanya nini, lakini mjue kuwa mimi nitabakia na jeraha kubwa sana, inanifanya nijione sina thamani kwenu…maamuzi mumechukua na sikushirikishwa…’ nikasema huku machozi yananitoka, na mama mkwe kuona vile akanijia na kunishika bega. Mama mkwe wangu huyu tulizoeana kama mama mzazi, na wakati nahangaika kumpata binti yake ndiye aliyekuwa kufua mbele kunisaidia. Na hutaamini alikuja na kunikumbatia kama mwanae alieyemzaa. Na hapo pamoja na kudeka nikajikuta machozi yakitoka kama maji. Nilipoinua uso wangu nilimuona Maua keshabadili nguo, na anatabasamu.

‘Mume wangu ni swala la muda, mwisho wa siku utanisifia kwa uamuzi wangu huu, na kama nilivyokuambia, kama kweli unanipenda, basi binti huyo awe ndiye mke wako, na natumai baada ya mwaka ambao nitakuwa huko kwa mafunzo, nikija nitawakuta mna mtoto. Huko ninakokwenda haturuhusiwi kuonana na mtu mwingine yoyote, na hakuna mawasiliano na mtu yoyote, hadi mwaka uishe….samahani kwakuchukua uamuzi huu mimi na familia yangu, sio nia yetu, na hatukuwa na nia mbaya, ni kwa masilahi ya wote, mama alipinga sana, lakini nilishawaambia mwenye maamuzi ya mwishi ni mimi…’ akanishika mkono akachuku begi lake na kumkumbatia mama yake, halafu baba yake, akamkumbatia Yule binti, na mwisho akaja kwangu. Sikuweza kumkumbatia kama vile tufanyavyo, nilimwangalia kwa macho yasiyoamini kuwa kweli huyu mke wangu anaondoka, kweli ndio mwishoo wa ndoa yetu…hapana! Nikambusu kichwani nikiwa na hisia kuwa atarudi tu…

Ndugu wapendwa sasa imepita mwaka, sijaweza kumsahau mke wangu, siakata tama ya kumsubiri nikijua baada ya mwaka akirudi tutaendelea kama mke na mume. Yule bintiu aliyechaguliwa na mke wangu kuwa awe mke wangu mrithi, anaishi na mimi kama mtu wa kuisaidia familia yangu, na hatuna mahusiano yoyote, inagawaje anafanya kila liwezekanalo kunibadili mawazo lakini hajafanikiwa.

Lengo langu na nia yangu ni kuwa baada ya mwaka, Maua atarudi akiwa kapona kabisa, ana tutaishi naye kama ilivyokuwa , lakini hayo ni mawazo yangu, amabyo mama mkwe aliniambia niyaondoe kabisa akilini, kwani kwa ufahamu wake wale wote wanaopelekwa huko wakirudi sio wenzako tena, hawana tamaa na mambo ya kidunia, wao na ibada, wao na kusaidia watu…kwahiyo, nisipoteze muda, nimuoe Yule binti ,au kama simtaki nitafute mke mwingine…!

Hapa ndio mwisho wa kisa chetu, najua wengi wana maswali mengi ya kuuliza, sasa ilikuwaje, sasa mbona nimekatisha. Sijakatisha, kwani hapa ndipo mahala mhusika alipomalizia kuelezea kisa chake na mwaka umefika lakini Maua hakurejea kama ilivyokusudiwa, kwa taarifa ni kuwa yeye kateuliwa kuwa mwalimu wa taasisi hiyo na kurudi kwake labda baada ya miaka mitano.!

Ni mimi: emu-three