Kikulacho ki nguoni mwako(Somnambulism story) 1

 Nilimuangalia mdogo wangu akibebwa kwenye machela huku machozi yakinilengalenga. Nilimuomba mungu sana awe hai…


Niliwageukia askari wa upelelezi , ambao walikuwa wakipima huku na kule bila kuelewa ni nini wanachokifanya badala ya kumuwahisha mdogo wangu hospitali huenda akapona. Nikainama chini kwa huzuni, na baadaye hawa polisi walimaliza kazi zao, na kiongozi wao aliniita pembeni na kuniuliza maswali kadhaa, alitaka kujua kama mdogo wangu alikuwa na maadui wowote, na kutaka kujua marafiki zake waliokuwa wakija mara kwa mara hapo nyumbani ni nani….

Nikawaza sana kukumbuka marafiki zake lakini sikumkumbuka hata mmoja aliyekuwa akipenda kuja nyumbani mara kwa mara. Na sijawahi kumsikia mdogo wangu akigombana na mtu

‘Kwakweli sina ninayemjua kabisa, yeye mara nyingi hapendelei makundi, na akirudi hurudi mwenyewe.’ Nikasema kwa uhakika

‘Je unaweza kunielezea kulitokea nini kutwa nzima jana, Tuanzie asubuhi mpaka mnakwenda kulala, na tafadhali uwazi wa maelezo yako utatusaida sana kumpata mhalifu huyu.

Nikatafakari kukumbuka matukio yalivyokuwa siku iliyopita, na ukitafakari sana, matukio yalivyotokea unahisi kuwa huenda mhalfu huyu anaweza kutokea humuhumu ndani. Haiwezekani, sidhani kuwa kati ya wanafamilia waliopo humu wanaweza kufanya lolote, hapana, …nikakana mawazo hayo kichwani

Akilini kukawa na sauti inaniambia kuwa `kikulacho kinaweza kuwa nguoni mwako…’ Nikasonya kwa nguvu , niliisonya ile sauti akilini mwangu, nikiiona ni mchonganishi wa familia yangu. Msonyo huu ulimfanya yule askari aniangalie kwa mashaka.

Akaendelea kunihoji, lakini wakati huo akili yangu ilikuwa ikiwaza tukio zima la siku iliyopita, ili kupima ukweli wa hisia zangu. Niliona kuwa kama nitaelezea kila kitu na kuweka hisia zangu kwa hawa polisi, familia yangu itatiwa hatiani, na nijuavyo polisi walivyo watalichukulia haraka na mwisho wa siku tutakosana na kila mtu ndani ya familia, hata hivyo kulikuwa hakuna ushahidi wowote ulio wazi. Nikajaribu kuivuta kumbukumbu kuwaza mambo yalivyokuwa jana…

Siku iliyopita ilianza kwa mimi kukuta saa yangu imepotea nikaanza kumuuliza mke wangu ….

***

‘Hivi kuna nini humu ndani, mbona sielewi ,kila mara vitu vynagu vya thamani vinapotea, na cha ajabu vinapotea humuhumu ndani. Leo saa yangu ya bei mbaya siioni, nani kaichukua,?’ nikauliza kwa sauti na kwa hasira. Mke wangu akaniangalia kwa huzuni na kuniambia kuwa hata yeye anashangaa, kwani vitu vyote hivyo vimepotea nikiwa na uhakika kuwa niliviweka chumbani.

Kuacha hiyo saa, kuna vito vyangu vya thamani, kwani katika shughuli zangu za biashara wakati mwingine nanunua mikufu ya dhahabu, pete za dhahabu na kwenda kuviuza katika safari zangu, na hii imekuwa biashara yangu ya zida. Cha ajabu kila nikileta kitu nyumbani kwangu hupotea kimiujiza. Na wanafamilia waliopo nyumbani kwangu hakuna hata mmoja mwenye dalili ya wizi.

Mke wangu nimemuoa sasa tuna miaka mitano, na ametokea katika familia yenye uwezo hata kuliko familia yangu. Katika ndoa yetu tumebahatika kuwa na Watoto wawili. Na tangu tuoane sijawahi kumhisi na jambo kama hili. Kwahiyo kwa ujumla mke wangu, hawezi kuniibia hata siku moja na kwanini aniibie, kwa shida gani aliyo nayo, kwani kila akitakacho hupata, na akienda kwao anapewa kila akitakacho, sasa sioni kwanini aniibie, haiwezekani. Nikawaza na kumwangalia akiwa anajaribu kutafuta huku na kule kama labda kuna sehemu niliiweka hiyo saa nikasahau, lakini mimi nina uhakika kuwa niliiweka kwenye kabati, kwa vile nilijua kuwa karibuni nina safari na nikiiuza nitapata hela nzuri tu.

Mwingine tunayeishi naye ni shemeji yangu, mdogo wake mke wangu, huyu hata kuingia chumbani kwetu ni kwa nadra sana, labda awe ameitwa na dada yake kumsaidia kitu Fulani, ni mpole na mwenye adabu sana. Tulimchukua kwa ajiili ya kuwa karibu na shule anayosomea, ambayo ipo karibu na nyumba yetu, anajitahidi sana katika masomo yake. Sidhani kwamba anaweza kufanya kitendo kama hicho na muda gani aliingia chumbani kwangu, nikawaza, na kumuondoa kwenye hisia za wizi.

Yupo mdogo wangu yeye anaingia kidato cha sita, ni mcha mungu sana, na mara chache utamuona yupo, au akiwa nyumbani bila kushika kitabu, na mara nyingine anakwenda kwenye nyumba za ibada, hapana mdogo wangu hawezi kuniibia, namjua sana toka utotoni, wizi katika familia yetu ni mwiko kabisa! Sidhani kama anaweza kubadilika kwa siku hizi chache alizokuja kuishi na mimi!

Watoto wangu ni wadogo, mkubwa yupo darasa la pili na ingawaje anaingia ndani mara kwa mara na mdogo wake, lakini yeye hawezi kufanya vitendo kama hivyo, hawa bado ni Watoto wadogo, hawana tama ya vitu kama hivyo, na kwanza wataiba wapeleke wapi. Hapana hawa hawawezi kufanya vitendo kama hivyo. Nikakuna kichwa kwa mawazo. Nikasimama na kujaribu kutafuta kila mahali bila mafanikio!.

Kitu kingine cha ajabu ni kuwa upoteaji wa vitu hivi umeanza kipindi nilipowachukua hawa wanandugu, shemeji yangu na mdogo wangu. Kabla ya hapo, matatizo kama haya hayakuwepo, kwahiyo inaniweka katika hali ya kuwahisi hawa watu wawili zaidi. Ni mdogo wangu au ni shemeji yangu, ni nani …

**********
 Naona tuishie hapa kwa leo, tusicheze mbali kwani kisa hiki ni cha kushangaza kidgogo, na hata kutisha. Vitu vimeanza kupotea kimiujiza, ni kweli kuna kidudu mtu ndani, anayeiba, au ....?

Ni mimi: emu-three