Maji yakimwagika hayazoleki

`Kwanini unaogopa kusema ukweli kuwa hiyo mimba ni yangu, na nimekuambia kuwa nipo tayari kukuchukua kama mke wangu…’


Kila mtu alishituka kusikia kauli hiyo. Unajua huyu alikuwa nani!

Kauli hii ilitoka kwa shemeji mtu, na anamwambia mdogo wa dada yake na ni mbele ya mke wake, mkwe wake, yaani mama wa mkewe na wanafamilia wengine. Kila mtu aliduwaa, kwani huyu jamaa ni mtaratibu sana na hana tabia yoyote ya kihuni. Na angeamini kuwa huyu jamaa angefanya hili, ama kweli umdhaniye siye kumbe ndiye.

Maua alikuja kwa dada yake hapa mjini, safari hii hakuja kwa likizo tu bali pamoja na mataibabu, kwani kwa kipindi cha miezi miwili hivi kumekuwa kukija taarifa kuwa Maua anaumwa magonjwa yasiyojulikana na anakosa vipindi mara kwa mara. Basi dada mtu akaona amchukue ndugu yake huku mjini ili pate matibabu na mara nyingi huja kwakwe akiwa likizo na kupata ada za shule.

Hata likizo iliyopita alikuja na akaa likizo nzima, na aliondoka akiwa hana matatizo ya kiafya zaidi ya homa, homa na tumbo, kwahiyo walihisi safari hii ameondoka na malaria sababu ya mbu za Dar!

‘Naona tumchukue shemeji yako aje hapa ili apate matibabu na uchunguzi zaidi’ mke akamwambia mumewe

‘Sawa, mimi sina matatizo na hata ikiwezekana aje asomee huku, naona maisha ya shule za kijijini yanamshinda’ akasema mumewe kwa furaha.

‘Hapana, hiyo sikubalini nayo, maisha yenyewe hapa ni yakubangaiza, isitoshe vyumba tulivyo navyo ni viwili, yeye akija analala kwa shida na watoto. Lakini kwa dharura sio mbaya, akija akikaa mwezi sio mbaya, lakini sio aje asomee hapa, una pesa za kumtafutia chumba chake..’ mkewe akasema.

‘Nilikuwa na mpango wa kutafuta nyumba yenye nafasi, vyumba viwili na sebule, unaonaje mpango huo’ akasema mumewe.

‘Hahahahah..hebu usinichekeshe, hali yenyewe ngumu, hapa tunatakiwa kuwatafutia watoto shule nzuri, kwani huoni jinsi kiwango chao cha elimu kilivyoshuka safari hii. Wewe unataka kutafuta nyumba kubwa ya kupanga, kama hizo hela zipo kwanini tusianze kufyatua matofali tujenge kibanda chetu angalau viumba viwili, kiwanja kipo kwanini tuendelee kupanga’ mkewe akasema huku akimrekebisha mumewe nguo alizovaa.

‘Wewe hayo niachie, huji nina mipango gani kichwani, tutajenga nyumba muda si mrefu ngoja tuyamalize haya matatizo madogo madogo’ Mumewe akasema huku anatoka kwenda kwenye mishemishe zake.

Maua alifika akiwa mnyonge na alimkuta dada yake akiwa katika biashara zake ndogondogo, walisalimiana na maongezi yao yalikuwa sio mazuri kama kipindi cha nyuma mpaka dada mtu akashangaa.

‘Vipi mbona upo hivi, ndio huko kuumwa kumekubadili namna hiyo. Hebu chukua chakula hapo juu ya kabati ule’ akasema dada mtu akipanga vyombo vyake vilivyotoka kwenye biashara ya mama lishe.

Mara Maua akatoka mbio kuelekea nje, kiasi kwamba dada mtu akashituka na kumfuatilia huko nje, akahisi kuwa huenda mdogo wake ana mashetani, asije akakimbia na kupotelea mitaani na mara akasikia akigugumia kutapika toka chooni. Mhhh, dada mtu nguvu zikamuisha, akajisemea moyoni huenda ni malaria hiyo, mmmh, lakini mbona namuona kama ….hata haiwezekani. Akawa anajisemea hadi Maua alipotoka chooni.

‘Wewe Maua hebu sema ukweli upo sawa wewe’ dada mtu akadadisi kwa hasira.

‘Sawa kwa vipi, najisikia vibaya tu, sijui sababu ya usafiri na kule kuumwaumwa…’ akasema huku anarudisha chakula bila kula.

‘Sasa mbona huli chakula…

Sauti ya mumewe ilisikika ikipiga hodi na alipoingia akasalimiana na shemeji yake na mara Maua akakimbilia chumbani, na huko akaangusha kilio kwa chinichini.

Baada ya wiki ya kukaa hapo siri ikagundulika, kwani walipompeleka hospitali iligundulika kuwa ana ujauzito na kivumbi kikawa ni ujauzitoni wa nani!.

Mara akasema ni kijana aliyekuwa akisoma naye ndiye aliyempa uja uzito huo, mara akasema ni jirani yao wanayeishi naye huko kijijini. Ilimradi kila aliyembana alitoa jibu tofauti hadi Ikabidi kiitishwe kikao cha wanandugu akiwemo mama wa huyo binti , kaka wa mume mtu na mzee mmoja wa huko kijijini mwenye mafungamano na wazazi wa mke.

‘Wewe binti, hiki ni kikao ambacho tunataka kujua ni nani kakupa hiyo mimba, nia yetu ni kutafuta ufumbuzi wa kudumu wa tatizo hili, na ukitudanganya ujue unajidanganya mwenyewe. Hii ni kwa faida yako na kwa faida ya familia yako pia. Hebu tuambie kwa uhakika ni nani kakupa huo ujauzito…’ akaanza yule mzee.


‘Mimi nilishawaambia sina uhakika ni ninani hasa..’ akaanza kulia kwa sauti.

‘Ina maana wewe ulikuwa Malaya, unatembea na wanaume kibao na udogo wote huo, hiyo tabia imetoka wapi kututia doa katika familia…’ dada mtu akakurupuka kwa hasira akitaka kumpiga mdogo wake.

‘Mimi sio Malaya, nimetembea na huyo huyo aliyenipa mimba sijawahi kutembea na mtu mwingine…sasa, …’ akaanza kulia kwa sauti.

Mara shemeji mtu aliyekuwa kimya muda mwingi akainuka na kutembeatembea na baadaye kuelekea mlangoni na alipohakikisha huko nje hakuna mtu akasogea hadi alipokuwa yule binti akilia na kumshika bega.Maneno yalimtoka kwa shida , lakini yalieleweka na aliyoyasema yaliwafanya chumba kizima kitulie kimya kwa muda

Wote walishindwa kuamini kuwa kweli huyo jamaa anaweza kufanya hicho alichokisema. Kila mtu aliguna, na kabla mzee ambaye ndiye kama mwenyekiti hajasema neno, mkewe jamaa akasimama kwa haraka kama mtu aliyeapagawa na mara akaingia chumbani, alipotoka alikuwa kashikilia kisu kirefu na mbio akaelekea alipokaa mdogo wake. Isingekuwa mama yake ambaye alikaa karibu na binti yake aliyebebeshwa mimba ambaye kwa haraka alikiona kile kitendo na kumdaka mkono mke mtu na bahati nzuri kile kisu kikamkosakosa Maua na kuzama ndani ya godoro la kochi.

Ikawa kukuru kakara, hadi walipofanikiwa kumnyanganya yule mke mtu hicho kisu.

‘Nasema ama mimi ama yeye , lazima mmoja atatangulia ahera, simtaona. Kama yeye kaona mimi nafaidi basi aniondoe duniani kwanza ili aishi na huyu baradhuli wake, vinginevyo mimi nitammaliza…’ Na kauli hiyo ikamfanya mama yao mzazi apandishe shinikizo la damu, na kudondoka chini na ikawa hekahekka nyingina ya kumuwahisha hospitali.

Sijapata zaidi ya hayo na ni-nini kimeendelea lakini, mume mtu alishasema yeye kafanya hivyo kwasababu amempenda mdogo mtu na yupo tayari kumuuoa. Kila mtu alimshangaa kwa kauli yake hiyo na walimwabia wazi hiyo haiwezekani kwasababu hawezi kumuoa mtu na dada yake

'Hiyo ni laana unatuletea katika familia ulisikia wapi mtu anaoa mke na mdogoo wake, umekosa mke mwingine, wanawake wapo kibao...hiyo ni tamaa yako tu '

Yeye akasema, kama haiwezekani basi, limetokea la kutokea, na maji yameshamwagika hayazoeleki.



Haya kisa hicho nimekileta kwenu, kimetokea karibuni naomba tusaidiane kwa hili. Wewe kama mtu wa hekima ungewashauri nini hawa, Kwani ndoa ipo hatarini, na matatizo ya watoto yanahatarisha afya za wazazi je maswala kama haya tutayamaliza vipi, kwani sio siri yanaongezeka na ni nani hasa wa kulaumiwa. Wanawake wansema ni tama za wanaume. Wanaume wanasema ni makosa ya wanawake kutokujali wajibu wao wa ndoa. Wajibu upi?

Ni mimi

emu-three