Kikulacho ki nguoni mwako(Somnambulism story) 3

Damu zilikuwa bado zinatoka kwenye kifua cha mdogo wangu, na kisu kilikuwa kikionekana wazi, kuwa muuaji hakutaka kukitoa. Kwa mshituko nilioupata, nilitaka nikivute kile kisu, lakini nikashituka, kwani kwa kufanya vile, damu zingetoka zaidi na ....nikabakia kupiga kelele tu. Na hizo kelele zangu zilimwamsha mke wangu na mdogo wake wakaja haraka, na bila kupoteza muda, mambo yalienda harakaharaka bila hata ya mimi kutegemea kwani nilishachanganyikiwa. Shemeji yangu bila kupoteza muda akaita gari la wagonjwa na mke wangu akawafahamisha polisi.


Ilichukua muda mfupi tu polisi wakawa wameshafika, na wao wakaanza kazi ya haraka, na gari la wagonjwa lilifika muda huohuo na dakitari wao, na mara mdogo wangu akatolewa na machela kupelekwa hospitali, na hili lilitokea baada ya polisi kuchukua picha zao muhimu. Nilimuomba mungu anisaidie kwa hili, kwani mdogo wangu ni kipenzi chetu katika familia. Kila mtu anampenda, hana ugomvi na mtu, na akikosea ni mwepesi sana kukubali na kuomba msamaha, sikudhani kuwa ana maadui wowote wakufikia kumfanyia kitendo kama hicho.

Tulipofika hospitali, mke wangu alikuwa pembeni yangu muda wote akijaribu kunipa matumaini kuwa shemeji yake atapona tu. Na wakati tunaongea mara dakitari akatokea.

Akaniita kwenye chumba chake , niliomba aseme haraka , asizungukezunguke, kwani nilishachoka kusubiri.

‘Tumejitahidi sana, kuokoa maisha ya ndugu yenu, na lilobakia ni uwezo wa mwenyewe muumba, kwani ile hatari haipo tena, kisu hakikugusa sehemu mbaya, ila damu nyingi sana imepotea kwahiyo imebidi kumuongezea damu. Hajazindukana, ndio maana nasema iliyobakia ni kumuomba mungu, lakini matumaini yapo…’

Nikashusha pumzi na kumshukuru mungu, nikaona sasa ni muda muafaka wa kuwapigia wazazi huko mikoani kuwafahamisha kilichotokea, lakini nikaona nisubiri mpaka azindukane.

‘Huyu jinsi kisu kilivyoingia, ni kuwa alichomwa akiwa usingizini, kwahiyo kauli ya kuwa huenda alitaka kujiua mwenyewe, ina mashaka kidogo, na hainiingii akilini…’akamalizia dakitari na kuniacha njia panda, kwani mimi nilishaamini hivyo.

‘Lakini yote watafahamu polisi, …’ akasema na kuturuhusu tutoke nje.

Mke wangu alikuwa wa kwanza kuongea tulipotoka nje, akasema’ hata mimi siamini kuwa shemeji anaweza kufanya vile, kujiua, hapana, labda….’ Akakatisha

‘Labda nini..’ nikamuuliza

‘Isije ikawa ugomvi wa jana yeye aliuchukulia hasira akaamua kweli kujiua, lakini sio shemeji ninayemjua’ akasema mke wangu.

‘Ni kweli Deni hawezi kufanya kitendo kama hicho, ninamjua sana akiwa mdogo, lakini hebu tutafakari, kama ni mtu kuja kumfanyia hivyo aliingia saa ngapi, na ni nani, bado naona wazo la kutaka kujiua lina uzito zaidi, lakini naapa kama kuna mtu anahusika na hili, nitahakikihs napambana naye mwenyewe…’ nikaweka kidole cha kuapa!

‘Hata mimi mume wangu nipo pamoja na wewe, shemeji ni mwema sana, na kugombana naye ni hiyo jana tu, sijawahi kujibizana naye kabla, ni mwema mkarimu na mwenye adabu…

Mara dakitari akatuita tena akisema kuwa mgonjwa wetu kazindukana, tunawza kwenda kumuona. Tuliinuka haraka haraka na kuelekea chumba cha wagonjwa mahututi, tulimkua mdogo wangu akihangaika na maumivu, lakini alipotuona akatulia kidogo.

'Kaka nitakosa mitihani mimi jamani ......'

 Naona muda umekwisha tuonane tena kwenye sehemu inayofuta, ili tujue kilichoajiri, na swali letuu ni kujiuliza je, ni nani huyu alitaka kumuua huyuu kijana?

*****
Ni mimi: emu-three