siri ya mtungi aijua kata

                                     
  ‘Mbona nyumba yenyewe haionyeshi dalili ya msiba’ tuliuizana huku tukiikaribia hiyo nyumba ambayo kwa taarifa tulizozipata mmiliki wake ambaye ni baba wa nyumba amefariki, cha ajabu tulipofika kwenye nyumba yenyewe tulipakuta kimya . Tukasema labda msiba unafanyika kwa ndugu yake mwingine, lakini tumjuavyo haingewezekana kwani yeye ndiye aliyekuwa mkubwa katika familia yao, na pia nyumba yake ni kubwa na yenye nafasi, ndugu zake wanaishi nyumba za kupanga.


‘Jamani kama mumekuja kwenye msiba, msiba haupo hapo upo nyumba ya jirani mtaa wa pili’ Jamaa mmoja akatuelezea na kutuelekeza nyumba ambayo msiba upo na wote tukaelekea huko tukiwaza kwanini imekuwa hivyo.

Nikakumbuka siku moja nilikuja kumuona huyu jamaa niliposikia kuwa anaumwa na hali niliyomkuta nayo ilikuwa ya kusikitisha. Alikuwa kakonda na cha ajabu alikuwa akilalamika kuwa tangu asubuhi hajapata chakula. Nilipomuuliza mke wake yupo wapi akasema ametoka tangu asubuhi na hajui alipoelekea huenda yupo kwa yao. Nikamuuliza kwanini asingefanya mpango wa chakula kwanza ikizingatiwa kuwa yeye ni mgonjwa . Akasema kwa huzuni ,

‘Acha tu ndugu yangu, siri ya mtungi anaijua kata, na jamii inayonizunguka inanilaumu sana kwa kusema kuwa mimi ndiye niliyesababisha yote haya. Lakini sio kweli mimi nilikuwa nikitimiza wajibu wangu kama mume ampendaye mke wake. Nilijitahidi kila kitu hata kumsaidia kufanyakazi za nyumbani na hili wengi walinisakama nalo wakisema nimepewa limbwata. Ndugu zangu walikuwa wakija hapa wanakuwa hawapatani na mke wangu, nikawa namtetea sana mke wangu, nikijua kuwa natetea mpendwa wangu, ikafikia ndugu zangu wote wakasusia kabisa kuja hapa, wanaokuja ni ndugu za mke wangu.

‘Yote haya niliyafanya kwa nia njema kabisa nikijua mwenzangu tupo naye. Kibarua changu kikaisha nikawa sina kazi, mambo hapo yakaanza kubadilika, mke akawa si mke tena, tukawa hatuelewani, kila nikisema sisikilizwii. Na mwenzangu akabahatika kupata kazi kwenye shirika moja nikashukuru sana nikijua kuwa ule umasikini wetu na mtihani wa kukosa kazi sasa umekwisha.

Hutaamini nilikuwa na gari imebidi niliuze ili tuweze kuishi na kumridhisha mke wangu, kwani alikuwa akinilaumu mimi kuwa siwajibiki. Nikauza kila kitu cha thamani na kubakia na hii nyumba unayoiona, lakini hela zote mke wangu alikuwa haridhiki na kila hela ikipatikana ananunua vitu visisvyo na umuhimu na pesa nyingine anazichukua na sijui alikuwa akizipeleka wapi.

‘Nikaanza kuumwa, na huu ugonjwa ulipoanza sikujua mapema, nikawa nakohoa natumia dawa za kawaida, na siku nilipozidiwa nikaend kupimwa na kuonekana nina TB, na hapo nikakata tama ya maisha, kwani ugonjwa huu ulinipata kipindi ambacho sina kazi, lakini nilijua kwasababu mke wangu ana kazi atanisaidia, lakini hutaamini kuwa alikuwa hanijali kabisa, hasa aliposikia kuwa nina ugonjjwa huu wa TB, akaamua na kunitenga kitanda, na hata chumba. Sikumlaumu sana, kwani aliogopa nitamuambukiza.

‘Kumbuka kuwa ndugu zangu walishanisusa, kwahiyo sikuwa na msaada wowote, na nilichotegemea ni huyu mke wangu kunisaidia, lakini haikutokea hivyo. Akawa haachi hela ya matumizi , na akipika chakula anakula na Watoto mimi hanijali. Watoto wangu inabidi waniibie chakula na kuniletea huku chumbani, wakigundulika wanapata kipigo kisicho cha kawaida. Nilijiuliza kwanini ananifanyia hivyo, yeye anadai kuwa mimi ni mvivu sijui kuhangaika na kazi kufukuzwa ni uzembe wangu. Kwahiyo ananifanyia hivyo ili akili ipevuke, na kuhangaika kutafuta kazi. Kazi nimetafuta sijapata, sasa naumwa nani atachukua mgonjwa.

‘Hutaamini nilitaka niuzehata hii nyumba ili nipate angalau pesa za matibabu lakini nyumba nilikuwa nimeandikisha mimi na mke wangu na katika hati za urithi niliandika kuwa nikiondoka mimi basi mke wangu ana haki zote za urithi, na utashangaa kuwa hati zote hizo alizificha sijui ziko wapi, nikimuuliza anadai hata yeye hajui zipo wapi.

‘ Ndugu zangu wameamua kunichukua, na huyu mke kaapa kuwa nikitoka hapa ndani nisirudi tena, yeye anadai hajashindwa kuniuguza. Aliposema hivyo ndugu zangu wakaogopa kuja kunichukua , lakini juzi nikapoteza fahamu kwasababu ya njaa, nilipozindukana ikabidi niwatumie ujumbe waje wanichukue, kwasababu huyu mke hana nia njema na mimi.’. hayo ndio maneno ya marehemu wakati nilipomtembelea.

Je nini kiliendelea kwenye tukio hili, ngoja niache hapa, kwani kuna mengi yaliyotokea pale msibani ambayo yana mafundisho, nitakimalizia pindi, ngoja kabla muda haujaisha niwape tukio jingine,

Ni mimi:
emu-three