Mbio za sakafuni huishia ukingoni-sehemu ya pili-5

 

Nilichofanya nikumwambia mwenzangu ambaye ndiye mwenyeji wangu, kuwa natoka kidogo, anisaidie kuangalia biashara yangu, na yeye kwasababu ndiyo kazi yake ya kila siku akasema hakuna shida. Mimi nikaanza kuwafuatilia wale watu kwa nyuma huku nimeshikilia simu, ambayo kila mara ilikuwa ikisema bado inatumika.

‘Huyu mtu anaongea masaa mangapi, kila mara nikimpigia simu inasema kuwa yupo anaongea na mtu, na mimi hapa sio mwenyeji sana, ninaweza kuwafuatilia hawa watu na kuingia kusipofaa, …lakini vyema niwafutalie, wasije wakatupotea, mimi hawa siwaachii, mpaka nione mwisho wake…’nikawa naongea peke yangu huku nikiwafuatilia kwa nyuma, kwa muda ule walikuwa mbali kidogo na mimi.

Walipofika kwenye hoteli moja iliyojificha ni kama unatoka nje, na ilikuwa sio mbali na hoteli tuliyofikia sisis, ni nje kidogo ya mji, wakaingia hapo na mimi nikaharakisha na kuingia. Hoteli hiyo ilikuwa imezungukwa na miti mingi kinyume na hoteli nyingine, wale watu walipoingia getini, na mimi nikaja kuingia baadaye, walionekana hawana wasiwasi, nafikiri hawakutarajia kabisa kuwa kuna mtu anawafuatilia.

Mara simu yangu ikaita nikapoipokea , alikuwa mwanadada, alisema ;’Simu yangu imeisha chaji tutaongea baadaye ‘ na ikakatika, sikuweza kumpata tena, nikaona sasa hilo jambo ni la kwangu mwenyewe, nikasema vyovyote iwavyo, ushahidi kamili nitaupata mwenyewe, hapa sihitaji mtu, nikaishika simu yangu ambayo ina sehemu ya kuchukua picha na video, nikasema kimoyomoyo hii itanisaidia sana..

Nipita pale getini, sikuulizwa, inavyoonyesha wanawake hawaulizwi, kama walivyo wanaume, na na sijui kwa heshima au vipi, wao waliniambia karibu na kunielekeza niingia ndani. Mimi sikuelekea moja kwa moja ndani, nilisubiri muda kiasi na baadaye nikaingia kwenye jengo lenyewe la  hiyo hoteli, na nilipofika mapokezi, nikajikuta nikiulizwa na mtu wa kupokea wageni  ninahitaji kinywaji gani, ninahitaji chumba au kunamtu namuhitaji…mimi nikawaambia kuna mtu namsubiri, ..

‘Haya karibu hapa, nikupatia kinywaji gani?’ nikaulizwa.

‘Soda, tu nikasema, huku nikiwaza mengi , je nitafanyaje baada ay hapo, na soda ilipoletwa nikawa nakunywa, na mara akaja kijana mmoja, na kukaa karibu yangu, akaanza kuniuliza maswali mengi lakini sikuwa na mskiliza, lakini mara akaongea jambo lilonifanya nimuongeleshe;

‘Hawa jamaa walioingi sasa hivi wanaonekana wana pesa ,maana wakija hapa matumiz yao sio kawaida, mbuzi mzima anaagizwa, na watoto wao ni wale wa bei mbaya’akasema.

‘Kwani wao ni akina nani na wanatokea wapi?’ nikauliza.

‘Hawa si wanatokea bongo, ni waheshimiwa, walikuwa kwenye kikao chao, na muda kama huu wanakuja kujiliwaza, wenyewe wanasema wapo kwenye fungate, na vimwana wao’akasema.

‘Hao vimwana wao na wao wanaotokea huko huko, au ni wenyeji wa hapa?’ nikauliza.

‘Hawa ni wenyeji wa hapa, ila ni watoto wa geti kali, kutoka kwao ni kwa watu kama hawa, huwezi mtu kama mimi kumsogelea mtu kama huyo, ‘akasema.

‘Kwahiyo sasa hivi watakuwa wapi?’ nikauliza.

‘Watakuwa wapi, wapo juu , huko ni sehemu maalumu kwa watu kaam hawa, huwezi kusogea huko, huko ni kwa wanachama tu, ulinzi wake,s io wa kawaida,’akasema.

‘Kwa mafano mtu kama mimi nikitaka kwenda huko, nitafanyaje?’ nikamuuliza.

‘Labda unitumi mtu kama mimi, maana mimi ni mhudumu, naweza kupeleka vinywaji, na naweza…lakini kwani wewe si umesema kuna mtu wako, kwanini tena unahitaji kwenda huko,…kwasababu nakuona wewe ni mrembo, na mahali pakoni kama huko juu, hapa hapakufai, huyo jamaa yako ni muheshimiwa?’ akaniuliza.

‘Ndio ni muheshimiwa, lakini sijamuona akitokea,  ndio maana nataka nikamsubiri huko juu, ila nashindwa jinsi ya kwenda huko juu peke yangu, ..nikuulize hawa watu watakaa mpaka saa ngapi?’ nikamuuliza.

‘Hawa wakiingia muda kama huu ni mpaka usiku, ….ukitaka uwafaidi vyema ufike muda wa usiku wakishalewa, hapo wanaweza kugawa pesa, kuwanunulia watu vinywaji, na sisi hapo tunajipatia angalau kidogo….’akasema.

`Mimi inabidi niondoke, nitarudi usiku, huenda mwenzangu kapatwa na dharura,..’nikasema.

‘Kama unajua chumba chake ninaweza kukupekeka ukamsubiri huko,..’akaniambia.

‘Hapana itakuja baadaye, na hawo waheshimiwa unajua vyumba vyao?’ nikamuuliza.

‘Ninajua lakini haturuhusiwi kuwatajia watu, kamaukihitaji ukija baadaye nitakubonyeza, maana nakuona wewe ni mrembo sana, kama ningelikuwa na uwezo ,…mmh, lakini mimi hata pesa ya kula yenyewe inapiga chenga, siwezi kupata binti mrembo kama wewe’akasema.

‘Kwani katika kupendana ni lazima uwe na pesa…?, unanishangaza kweli, hebu nikuulize ndege, au wanyama, wa aina hiyo wanaopendana wana pesa? Hiyo ni hisia na  wasiwasi wako tu, ila mimi sikuja hapa kwa ajili ya kutafuta mapenzi au kutumia pesa ya mtu yoyote, nimekuja hapa kwasababu nina mtu wangu nimemfuata…’nikamwambia na kuondoka.

‘Nilipofika pale ambapo tuliweka bidhaa zetu, nikakuta mwanadada keshafika, aliponiona akashituka kidogo, na kuniuliza;

‘Vipi ulikwenda wapi,na naona umebadilika kama mtu aliyekutwa an dhahama?’ akaniuliza akiniangalia kwa uso wa udadisi.

‘Nilitoka kidogo, kutizama mji wa makao makuu, kumbe ni mkubwa kiasi hiki’nikasema nikijitahidi kuvunga.

‘Ni wa kawaida tu, lakini mambo yake ndiyo makubwa, …nilikuambia kuwa utulie hapa, ili baadaye tutoke, sasa wewe unajiendea ovyo, wateja wanahitaji uwasubiri hapa, ili baadaye tukitoka kwenda kumuona mteja mkubwa, tuwe tumeshaweka mamb sawa, ..haya jiandae tutoke, …’akasema.

‘Tunakwenda wapi?’ nikamuuliza.

‘Hayo maswali siyataki, ….mimi hapa ndio bosi wako, na muda kama huu, unatakiwa uwe sio mke wa mtu, …’akasema mwanadada.

‘Eti nini….?’nikauliza kwa mshangao.

‘Hii ni kazi maalumu, usipojifanya hivyo huwezi kupata unachohitaji, wakati mwingine inabidi ufanya yale usiyopenda kufanya ili upate kile unachohitaji, sio kwamba unapenda, sasa jiulize unataka kupata huo ushahidi au hutaki?’ akaniuliza.

‘Kama ni ushahidi nimeshaupata, sihitaji zaidi, mimi kesho narudi kwangu,..’nikamwambia.

Umeupataje huo ushahidi, maana muda kama huu, unaweza ukawaona wameongozana na wanawake,  na hawo labda ni wenzao kikazi, huwezi ukasema walikuwa na mahawara, ….huwezi kumsemakuwa alikuwa anafanya jambo baya, muda wa kumnasa huyo mtu bado’akaniambia,

 Basi baadaye tulikwenda kujiandaa, na kuvaa nguo ambazo sikupenda kabisa kuzivaa,halafu tukajiweka kinamna niliyoelekezwa, tukaingia mitaani. Tulichukua taksi hadi kwenye hiyo hoteli, na tulipofika pale mwenzangu kwasababu anajulikana tulipewa sehemu maalumu ambayo ni ya wanachama peke yao.

Mwenzangu aliagiza vinywaji, na tukaanza kunywa,akaniambia ili kuondoa aibu machoni,na ili kazi ifanyike vyema tunahitajika kunywa kilevi kidogo.

‘Eti nini mimi sijawahi kunywa pombe hata siku moja, na sitakikunywa kabisa, …’nikasema kwa hasira, na tukaanza kusigishana. Yeye alizidi kunishawishi na mwishowe akasema.

‘Tatizo lako umekaa kishamba mno, ndio maana hata mume wangu na ndugu zake walikuwa wakikuita hivyo,’akasema, na kauli hii iliniuma sana, nikajikuta nimeshika chupa ya kinywaji kikali na kuanza kunywa, ilikuwa chungu mdomoni, lakini nilitaka kuwaonyesha kuwa mimi sio mshamba,…

‘Mambo si hayo, baada ya muda sasa utakuwa msichana na kileo.

Nilianza kunywa bila mpangilio na hali ikaanza kubadilika kichwani, nikawa sio mimi yule msichana niliyelelewa kwenye maadili ya kikwetu, …nikawa naongea tu, natukana, na sijui hawa wanaume walitokea wapi, maana nilijikuta nipo na mwanaume pembeni yangu, akinishika apendavyo, kitu ambacho nisingeliruhusu kama ningelikuwa mzima.

‘Sasa umelewa mpendwa twende sehemu nyingine, hapa naona hapatufai hatuwezi kabisa kufanya kazi yetu…’akaniambia.

‘Mimi siende popote, namtaka mume wangu..kama hayupo, kama yeye ana hawara na mimi namtfauta bwana wangu, huyu paha anakuwa bwana wangu.’nikawa naongea kilevi na kuanza kumshika shika yule mwanaume, na yeye akawa hajivungi.

‘Sikiliza wewe mshamba, tunaondoka hapa, utaharibu kila kitu.

‘Mshamba nani, ….mimi unaniita mshamba, sasa nitakuonyesha kuwa mimi ni mtoto wa mjini, kwanza hizi nguo zinanipa joto, nikaanza kupunguza nguo na kubakiwa na nguo chache mwilini .

‘Sikiliza mpwenda huko unapokwenda ni kubaya,…jamanii huyu kalewa, naomba tusaidieni tumpeleke chumbani kwake, ..’akawaambia wale wanaume, sikujua kuwa wanajuana naye, na nilishikwa juu juu,,sikujitambua, kabisa, nilijitambua ikiwa ni asubuhi.

‘Mpendwa sasa umefanya nini?’ nikaulizwa swali nikiwa bado nina mauza uza kichwani.

‘Kwani nimefanya nini?’ nikauliza.

‘Ni nani alikuambia uende kule kwenye chumba cha watu usiku, huoni umeharibu, na hili ni tatizo kubwa sana, sijui hata tutafanyaje?’ akasema huku akionyesha uso wa mashaka.

‘Kwani nimefanya nini?’nikauliza.

‘Wewe hukumbuki lolote,..jana tulipokurudisha hapa nasikia ulitoka tena, ulikwenda wapi, na huko ulifanya nini? Akaniuliza.

‘Sikumbuki kabisa.. nimeota ndoto mbaya ajjabu, sijui ni ndota gani hii,.. ina maana ilikuwa ni kweli?’ nikauliza huku sijijui kabisa.

‘Ilikuwa ni ndoto au umefanya kweli, …mungu wangu mbona hili balaa kubwa,sikujua wewe ni mshamba kiukweli, yaani kuonja pombe kidogo tu ndio umakuwa kama mwehu, ….sasa hili janga utalibeba mwenyewe, mimi sikuwa na mpango huo kabisa, hilo ni lako wewe mwenyewe.

‘Unasema nini…wewe ndiye uliysababaisha yote haya, wewe ulinishawsihi nija huku, mbaya zaidi ukanishawsishi ninywe pombe, kitu ambacho sijawahi kunywa, katika maisha yangu,…sasa sijui kuna ninii kimetokea, lakini sikufaya kwa matakwa yangu, kama kweli….ina maana ile ilikuwa sio ndoto…kichwa kinaniuma kweli..’nikawa nalalamika huku nashika kichwa.

‘Hiyo sio ndoto mpenda, hiyo ni kweli, sijui huko ulipokwenda ulifanya nini, maana nasikia kulisikika mlio wa bastola, sasa sijui ni wewe au kuna nini kilitokea,nasikia polisi wametanag kwenye hiyo hoteli wanafanya uchunguzi, ….sijui utafanyaje?’ akasema huku akibonyeza namba kwenye simu yake, akitaka kupiga simu, na kabla hajafanya hivyo simu yake ikalia, akageuka kuniangalia kwa macho ya mashaka

‘Eti nini ina maana nimeua, hapana, ile ilikuwa ni ndoto, ….’nikasema huku nikiinuka kitandani na kutaka kukimbia, yeye akaniashiria kwa kidole, kuwa nitulia maana anataka kuongea na simu. Niliinuka pale kitandani na kutembea huku na kule, kama mwehu, akaipokea, simu nakusikiliza kwa muda halafu akawa kama kashituka na kusema.

‘Unasema nini, amekufa…oohi,…mungu wangu, na eti nini polisi wanamtafuta,ooh, basi tena atalikoga mwenyewe, na mumewe kashikiliwa , hayupo, ina maana alitoroka usiku huo, kazi ipo, ….sasa wamepatikana’akasema na kukata simu, aligeuka na kuniangalia,a kionyesha ile sura ambayo inaashiria shari.

‘Sasa mpendwa unalo, ….kwasasa siwezi kukusaidia lolote, …nasikia polisi wanakutafuta kama mpira wa kona, sasa wewe kwa usalama wako usitoke humu ndani kabisa, ukitoka tu hapa unakwenda kunyea debe, sijui mpaka lini, kesi ya mauaji sio mchezo, na sijui ulipata wapi hiyo bastola,…..unanitia kwenye majanga nisiyoyatarajia,,,,,,,’ Wewe subiri hapa, jiandae, anaweza akaja mtu kukuchukua’akasema.

‘Hapana mimi nitakwenda mwenyewe polisi kujisalimisha,

‘Ujisalimishe, una akili wewe kweli, ….hapa ni kutoroka hadi bongo, na safari hii tubatakiwa tufanye haraka, hapa hotelini utahamishwa, na utakwenda kweney hoteli nyingine, huko usiku ndio tunaondoka.

‘Ina maana nimeua kweli, ina maana ile ilikuwa sio ndoto, mungu wangu, ….’nikasema huku kumbukumbu za usiku zikianda kunijia, ….

NB Hizo ndio mbio za sakafuni bwana mpo wapendwa, mambo sio shwari kidogo, lkn nitajitahidi hivyo hivyo, hapa nipo kwenye internet cafe za mitaani

WAZO LA LEO: Kwanini mtu akitenda kosa hataki kukubali ukweli,kuwa yeye ndiye aliyekosea…inafikia mtu kumsingizia mwingine ambaye hana kosa, ili yeye aonekane hana hatia, hiyo sio sahihi kwa muadilifu.

Cha muhimu tukumbuke kuwa kutenda kosa sio kosa bali kurudia kosa ndio kosa, ukitenda kosa,kubali kosa na jisahihishe na sio kuzidi kutenda kosa kwa kumsingizia mwingine asiyelitenda hilo kosa.

Ni mimi: emu-three